ខេត្តបាត់ដំបង ៖ ដើម្បីសន្តិសុខ សុវត្ថិភាព និងសណ្ដាប់ធ្នាប់សាធារណៈ មន្ត្រីគ្រប់ស្ថាប័នរដ្ឋ តាមបណ្ដាស្រុក ក្រុង និងសមត្ថកិច្ច ត្រូវធ្វើការផ្សព្វផ្សាយ…
ខេត្តបាត់ដំបង ៖ ដើម្បីសន្តិសុខ សុវត្ថិភាព និងសណ្ដាប់ធ្នាប់សាធារណៈ មន្ត្រីគ្រប់ស្ថាប័នរដ្ឋ តាមបណ្ដាស្រុក ក្រុង និងសមត្ថកិច្ច ត្រូវធ្វើការផ្សព្វផ្សាយ និងចុះណែនាំដល់ប្រជាពលរដ្ឋ ឬអាជីវិករលក់ដូរ មុនថ្ងៃចូលឆ្នាំចិននិងវៀតណាម ចូលមកដល់នាប៉ុន្មានថ្ងៃខាងមុខនេះ ដោយហាមមិនឲ្យមានការ «ដុតផាវ កាំជ្រួច ឬបង្កសំឡេងរំខាន ព្រមទាំងប្រព្រឹត្តល្បែងស៊ីងសងគ្រប់រូបភាព» ក្នុងថ្ងៃចូលឆ្នាំចិន-វៀតណាមឡើយ ។ នេះបើយោងតាមសេចក្ដីណែនាំរបស់រដ្ឋបាលខេត្ត ដែលបានប្រកាសជាសាធារណៈ កាលពីថ្ងៃទី១០ កុម្ភៈ ។
កម្លាំងជំនាញនៃអធិការក្រុងបាត់ដំបង បានចុះអនុវត្តនូវសេចក្តីណែនាំរបស់រដ្ឋបាលខេត្តនេះ នៅព្រឹកថ្ងៃទី១៣ កុម្ភៈ ដល់អាជីវករលក់ដូរនៅតាមបណ្ដាផ្សារ និងទីប្រជុំជននានា ក្នុងក្រុងបាត់ដំបង ដើម្បីធ្វើការផ្សព្វផ្សាយពីខ្លឹមសារនៃសេចក្ដីណែនាំរបស់រដ្ឋបាលខេត្ត ។
កម្លាំងជាដំបូងនេះ សមត្ថកិច្ចបានចុះណែនាំដល់អាជីវករតាមបណ្ដាផ្សារនានា ហាមមិនដាក់តាំងលក់ «ផាវ ឬកាំជ្រួច» សម្រាប់ដុតក្នុងឱកាសចូលឆ្នាំចិន-វៀតណាមឡើយ ។ ហើយក៏មិនឲ្យមានការដុតបំផ្ទុះបន្លឺសំឡេងនៅតាមលំនៅឋាន នៅកន្លែងលក់ដូរ ឬនៅតាមទីតាំងផ្សេងៗដែរ ដែលនាំឲ្យមានការភ្ញាក់ផ្អើលក្នុងមូលដ្ឋាន ។
កាលពីថ្ងៃទី១០ កុម្ភៈ រដ្ឋបាលខេត្តបានចេញសេចក្ដីណែនាំស្ដីពី«ការរៀបចំរក្សាសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ ក្នុងឱកាសបុណ្យចូលឆ្នាំចិន-វៀតណាម»ក្នុងខេត្តបាត់ដំបង ។ សេចក្ដីណែនាំនេះ មានគោលដៅទូលំទូលាយ មិនថា បណ្ដាអង្គភាពរដ្ឋ ឯកជន ឬអង្គការនានាឡើយ គឺត្រូវចូលរួមរក្សាសន្តិសុខ សុវត្ថិភាព និងសណ្ដាប់ធ្លាប់សាធារណៈនៅក្នុងឱកាសបុណ្យចូលឆ្នាំចិន-វៀតណាម ដែលប្រព្រឹត្តទៅចាប់ពីថ្ងៃទី១៦ ដល់ថ្ងៃទី១៩ កុម្ភៈ។
បំរាម៖ ទី១-មិនឱ្យដុតផាវ កាំជ្រួច ឬបង្កសំឡេងរំខាន ព្រមទាំងការប្រព្រឹត្តរាល់ល្បែងស៊ីសងគ្រប់រូបភាព ។ ទី២-បណ្ដាគ្រឹះស្ថានសាធារណៈ រោងចក្រ សហគ្រាស ក្រុមហ៊ុន តាមលំនៅឋាន និងគ្រប់ទីកន្លែងកម្សាន្តនានា ត្រូវរក្សានូវសន្តិសុខ សុវត្ថិភាព សណ្ដាប់ធ្លាប់សារធារណៈ និងមានការប្រុងប្រយ័ត្នខ្ពស់ចំពោះអុចធូប ទៀន ក្រដាសសែន ភ្លើងចង្ក្រាន ចរន្តអគ្គិសនី ដែលអាចបង្កឲ្យមានគ្រោះអគ្គិភ័យ ឬគ្រោះថ្នាក់ផ្សេងៗដោយថាហេតុ ។
រដ្ឋបាលក្រុង និងស្រុកទាំង១៤ ឬបណ្ដាអង្គភាពរដ្ឋនានា ត្រូវចាប់ផ្ដើមអនុវត្តនូវសេចក្ដីណែនាំនេះ តាមរយៈផ្សព្វផ្សាយបន្តឲ្យបានទូលំទូលាយ និងចុះណែនាំផ្ទាល់ដល់អាជីវករលក់ដូរ ឬតាមទីផ្សារនានា ព្រមទាំងណែនាំដល់ប្រជាពលរដ្ឋនៅក្នុងមូលដ្ឋានឲ្យចូលរួមគោរព និងអនុវត្តឲ្យមានប្រសិទ្ធភាព ។
បើតាមមន្ត្រីជំនាញនៃអធិការក្រុងបាត់ដំបង ដែលបានចុះផ្សព្វផ្សាយស្ដីពីសេចក្ដីណែនាំរបស់រដ្ឋបាលខេត្តនេះ បាននិយាយថា ជាដំបូង មន្ត្រីជំនាញបានចុះណែនាំដល់អាជីវករលក់ដូរនៅតាមទីផ្សារនានាក្នុងក្រុងបាត់ដំបង ជាពិសេស ទីតាំងដែលមានលក់គ្រឿងផ្ទុះ «ផាវ និងកាំជ្រួច» ។
មិនអនុញ្ញាតឲ្យដាក់តាំងលក់ «ផាវ កាំជ្រួច ឬគ្រឿងលំអរផ្សេងៗ ដែលមានជាតិផ្ទុះ» និង ជម្រុញឲ្យបងប្អូនអាជីវករនានា ត្រូវចូលរួមសហការ ដើម្បីបង្ការ និងទប់ស្កាត់រាល់ហានិភ័យនានាដែលបានកើតឡើងដោយយថាហេតុ ៕
ចែករំលែកព័តមាននេះ