ដាក់ឡាក់ ៖ បងប្អូនប្រជាពលរដ្ឋខ្មែរ ជាពិសេសអ្នករស់នៅតាមខ្សែបន្ទាត់ព្រំដែនក្នុងខេត្តមណ្ឌលគិរី គួរមានការប្រុងប្រយ័ត្នខ្ពស់ ចំពោះការទិញអំបិលអ៊ីយ៉ូត យកមកប្រើប្រាស់ ក្រោយសមត្ថកិច្ចវៀតណាម ទើបតែបង្ក្រាបបានករណីផលិតអំបិលក្លែងក្លាយទ្រង់ទ្រាយធំ ក្នុងខេត្តដាក់ឡាក់…
ដាក់ឡាក់ ៖ បងប្អូនប្រជាពលរដ្ឋខ្មែរ ជាពិសេសអ្នករស់នៅតាមខ្សែបន្ទាត់ព្រំដែនក្នុងខេត្តមណ្ឌលគិរី គួរមានការប្រុងប្រយ័ត្នខ្ពស់ ចំពោះការទិញអំបិលអ៊ីយ៉ូត យកមកប្រើប្រាស់ ក្រោយសមត្ថកិច្ចវៀតណាម ទើបតែបង្ក្រាបបានករណីផលិតអំបិលក្លែងក្លាយទ្រង់ទ្រាយធំ ក្នុងខេត្តដាក់ឡាក់ (Dak Lak) ដែលជាខេត្តជាប់ព្រំដែនផ្ទាល់ជាមួយខេត្តមណ្ឌលគិរី ។
យោងតាមការចុះផ្សាយរបស់សារព័ត៌មាន Vietnamnet នៅថ្ងៃទី១២ ខែកុម្ភៈ ឆ្នាំ២០២៦ នាយកដ្ឋាននគរបាលសេដ្ឋកិច្ចខេត្តដាក់ឡាក់ បានឃាត់ខ្លួនស្ត្រីម្នាក់ឈ្មោះ Van Thi On អាយុ៦៨ឆ្នាំ ជាកនាយិកាក្រុមហ៊ុន Kieu Hung ពីបទផលិត និងចែកចាយអំបិលអ៊ីយ៉ូតក្លែងក្លាយ ។
តាមការស៊ើបអង្កេតបានឱ្យដឹងថា ត្រឹមតែក្នុងឆ្នាំ២០២៥ប៉ុណ្ណោះ ក្រុមហ៊ុននេះ បានលក់អំបិលក្លែងក្លាយទៅលើទីផ្សារអស់ចំនួន១,៧០០តោន ដោយក្នុងមួយថ្ងៃៗបញ្ចេញលក់ពី៤ ទៅ ៥តោន ដែលមានន័យថា អំបិលទាំងនេះ មានកម្រិតអ៊ីយ៉ូដទាបជាងស្តង់ដារកំណត់រហូតដល់ទៅជិត១០ដង ដែលវាស្ទើរតែគ្មានជាតិអ៊ីយ៉ូតទាល់តែសោះ ។
សំណួរសួរថា តើអំបិលអ៊ីយ៉ូតក្លែងក្លាយ ក្នុងបរិមាណដ៏ច្រើនសន្ធឹកសន្ធាប់នេះ បានធ្លាក់ទៅដល់ដៃអ្នកប្រើប្រាស់ប៉ុន្មាននាក់ទៅ?
ជាក់ស្តែង លទ្ធផលពិសោធន៍បង្ហាញថា កម្រិតជាតិអ៊ីយ៉ូតក្នុងអំបិលនោះមានទាបជាងស្តង់ដារកំណត់រហូតដល់ទៅជិត១០ដង (មានត្រឹមតែ២.៥៧ ទៅ ៥.៩៣ មីលីក្រាម/គីឡូក្រាម ខណៈសំបកវេចខ្ចប់សរសេរថា ២០ទៅ៤០មីលីក្រាម) ។
អ្វីដែលគួរឱ្យភ្ញាក់ផ្អើលនោះ គឺល្បិចកលរបស់ម្ចាស់ក្រុមហ៊ុន ដែលបញ្ជាឱ្យកម្មករប្រើអ៊ីយ៉ូតត្រឹមតែ១កញ្ចប់តូចលាយជាមួយអំបិលរហូតដល់ទៅ៣ ទៅ៤តោន ដើម្បីកាត់បន្ថយដើមទុនផលិត ។
ជុំវិញរឿងរ៉ាវអំបិលអ៊ីយ៉ូដក្លែងក្លាយនេះ ជាសារដាស់តឿនសម្រាប់បងប្អូនខ្មែរនៅតាមព្រំដែន ដោយសារខេត្តដាក់ឡាក់ របស់វៀតណាម) មានព្រំប្រទល់ជាប់នឹងខេត្តមណ្ឌលគិរី របស់កម្ពុជា ដែលជារៀងរាល់ថ្ងៃរយៈច្រកទ្វារទ្វេភាគីដាក់ដាំ (ស្រុកអូររាំង) និងច្រកដាក់ឌឿ គឺជាច្រកសេដ្ឋកិច្ចដ៏សំខាន់ក្នុងការដោះដូរទំនិញកសិផល និងគ្រឿងឧបភោគបរិភោគ ដូចនេះហានិភ័យនៃការហូរចូលអំបិលគ្មានគុណភាពទាំងនេះអាចនឹងមាន ។
យ៉ាងណាមិញ ប្រសិនបើលោកអ្នកប្រើប្រាស់អំបិលដែលខ្វះជាតិអ៊ីយ៉ូតក្នុងរយៈពេលយូរ មិនត្រឹមតែបង្កឱ្យមានជំងឺពកកប៉ុណ្ណោះទេ ប៉ុន្តែវាក៏ប៉ះពាល់ធ្ងន់ធ្ងរដល់ការលូតលាស់សតិបញ្ញារបស់កុមារ និងសុខភាពទូទៅរបស់មនុស្សពេញវ័យផងដែរ ។
ដើម្បីការពារកុំឱ្យទិញប៉ះអំពិលអ៊ីយ៉ូតក្លែងក្លាយទាំងនេះ អាជ្ញាធរមានសមត្ថកិច្ច និងមន្ត្រីជំនាញ ក៏បានដាស់តឿនឱ្យបងប្អូនប្រជាពលរដ្ឋ ត្រូវពិនិត្យមើលស្លាកសញ្ញា និងប្រភពអំបិលឱ្យបានច្បាស់លាស់ មុននឹងទិញយកមកប្រើប្រាស់ ជាពិសេសត្រូវជៀសវាងទិញអំបិលដែលតម្លៃថោកខុសធម្មតា៕
ចែករំលែកព័តមាននេះ