ខេត្តបាក់និញ ៖ អាជ្ញាធរវៀតណាមបង្ក្រាបទីតាំងផលិត «ម្សៅរំដេងក្លែងក្លាយ» ដែលយកមើមចេកមកកិនលាយជាមួយថ្នាំជ្រលក់ពណ៌ក្រណាត់ ដែលជាសារធាតុគីមីហាមឃាត់ដាច់ខាតក្នុងចំណីអាហារ ។ ម្សៅរំដេងក្លែងក្លាយសម្រាប់ប្រលាក់សាច់ទាំងនេះ ត្រូវបានចែកចាយលើទីផ្សារ និងផ្គត់ផ្គង់ទៅតាមរោងចក្រ…
ខេត្តបាក់និញ ៖ អាជ្ញាធរវៀតណាមបង្ក្រាបទីតាំងផលិត «ម្សៅរំដេងក្លែងក្លាយ» ដែលយកមើមចេកមកកិនលាយជាមួយថ្នាំជ្រលក់ពណ៌ក្រណាត់ ដែលជាសារធាតុគីមីហាមឃាត់ដាច់ខាតក្នុងចំណីអាហារ ។
ម្សៅរំដេងក្លែងក្លាយសម្រាប់ប្រលាក់សាច់ទាំងនេះ ត្រូវបានចែកចាយលើទីផ្សារ និងផ្គត់ផ្គង់ទៅតាមរោងចក្រ ក្នុងចំនួនរាប់តោនមកហើយ ។
អាជ្ញាធរខេត្តបាក់និញ ទើបតែបានវាយខ្នោះម្ចាស់សិប្បកម្មផលិតម្សៅរំដេងម្នាក់ ក្រោយពីស្រាវជ្រាវរកឃើញការពិតថា ម្សៅរំដេងទាំងនោះ គឺជាម្សៅរំដេងក្លែងក្លាយ ដែលពោរពេញទៅដោយសារធាតុគីមី បង្កហានិភ័យមហារីកខ្ពស់បំផុតដល់អ្នកបរិភោគ ។
ជាក់ស្តែង នៅថ្ងៃទី១១ ខែកុម្ភៈ ឆ្នាំ២០២៦ នគរបាលសេដ្ឋកិច្ចនៃស្នងការដ្ឋាននគរបាលខេត្តបាក់និញ បានសម្រេចចោទប្រកាន់ និងឃាត់ខ្លួនបុរសខាងលើ ដែលមានឈ្មោះ Nguyen Văn Vinh ពីបទរំលោ.ភលើបទបញ្ញត្តិសុវត្ថិភាពចំណីអាហារយ៉ាងធ្ងន់ធ្ងរ ។
តាមចម្លើយសារភាពរបស់ជនសង្ស័យរូបនេះ បានឱ្យដឹងថា ចាប់តាំងពីឆ្នាំ២០២៤ មក រូបគេបានដើរទិញមើមចេកស្រស់ និងរំដេងពីអ្នកភូមិយកមកកិនលាយគ្នា ដើម្បីកាត់បន្ថយដើមទុនផលិត និងកើបប្រាក់ចំណេញបានច្រើន ។ ដើម្បីឱ្យម្សៅរំដេងក្លែងក្លាយនេះមានពណ៌លឿងស្រស់ឆើតឆាយ ស្រដៀងនឹងរំដេងសុទ្ធ និងទុកបានយូរ ជនសង្ស័យបានលួចប្រើប្រាស់សារធាតុគីមីហាមឃាត់ដ៏គ្រោះថ្នាក់ចំនួនពីរប្រភេទ គឺ ៖
– ល័ក្ខពណ៌លឿង ឬ Auramine O ៖ ជាប្រភេទថ្នាំជ្រលក់ពណ៌ក្រណាត់ និងក្រដាស ដែលជាសារធាតុគីមីឧស្សាហកម្ម ។ សារធាតុនេះ ត្រូវបានអ្នកវិទ្យាសាស្ត្របញ្ជាក់ថា ជាភ្នាក់ងារបង្កហានិភ័យជំងឺមហារីកខ្ពស់បំផុត និងត្រូវបានហាមឃាត់ដាច់ខាតមិនឱ្យប្រើក្នុងចំណីអាហារ ។
-ម្សៅខាត់ស សូដ្យូម ហ៊ីដ្រូស៊ុលហ្វីត (Sodium Hydrosulfite)៖ ជាសារធាតុដែលមានប្រតិកម្មគីមីខ្លាំង ដើម្បីរក្សាផលិតផលទាំងនោះកុំឱ្យរលួយ និងអាចរក្សាទុកបានយូរ ។ នៅក្នុងប្រតិបត្តិការបង្ក្រាបនេះ កម្លាំងនគរបាលសេដ្ឋកិច្ចបានរឹបអូស ម្សៅរំដេងក្លែងក្លាយ ដែលជាផលិតផលសម្រេចបានចំនួនជិត២តោន ។
អ្វីដែលគួរឱ្យបារម្ភបំផុតនោះ គឺ ក្នុងមួយថ្ងៃៗទីតាំងនេះ ចែកចាយផលិតផលដែលពោរពេញទៅដោយសារធាតុគីមីពុលទាំងនេះប្រមាណ៣០០គីឡូក្រាម ទៅកាន់គោលដៅធំៗដូចជា ៖ ១. ផ្សារបោះដុំ និងផ្សារប្រពៃណីទូទៅ ៖ សម្រាប់លក់ឱ្យពលរដ្ឋទិញយកទៅស្លស្លុក ឬប្រលាក់សាច់តាមផ្ទះ ។ ២. តំបន់ឧស្សាហកម្ម៖ ផ្គត់ផ្គង់ឱ្យបណ្ដាក្រុមហ៊ុនកែច្នៃអាហារ ដើម្បីរៀបចំជាអាហារសម្រាប់កម្មកររោងចក្ររាប់ពាន់នាក់ដែលបរិភោគប្រចាំថ្ងៃ ។
អាជ្ញាធរវៀតណាម បានបញ្ជាក់ថា សារធាតុល័ក្ខគីមីជ្រលក់ក្រណាត់ដែលជនសង្ស័យប្រើប្រាស់ គឺស៊ីបំផ្លាញសុខភាពពីខាងក្នុងយ៉ាងសាហាវ ។
បច្ចុប្បន្ន ជនសង្ស័យត្រូវបានឃុំខ្លួនជាបណ្តោះអាសន្ន ដើម្បីបន្តស៊ើបអង្កេតស្វែងរកបណ្តាញពាក់ព័ន្ធផ្សេងទៀតមកផ្តន្ទាទោសតាមច្បាប់៕
ចែករំលែកព័តមាននេះ