ខេត្តកំពង់ចាម ៖ គិតរហូតមកដល់រសៀលថ្ងៃទី១២ កុម្ភៈ ឆ្នាំ២០២៦ នេះ ករណីភ្លេចកាបូបដាក់គ្រឿងអលង្ការ និងលុយសរុបជាង៥០០០ដុល្លាររបស់អាជីវករលក់បង្អែមម្នាក់នៅផ្សារសាមគ្គី ស្ថិតក្នុងសង្កាត់កំពង់ចាម ក្រុងកំពង់ចាម…
ខេត្តកំពង់ចាម ៖ គិតរហូតមកដល់រសៀលថ្ងៃទី១២ កុម្ភៈ ឆ្នាំ២០២៦ នេះ ករណីភ្លេចកាបូបដាក់គ្រឿងអលង្ការ និងលុយសរុបជាង៥០០០ដុល្លាររបស់អាជីវករលក់បង្អែមម្នាក់នៅផ្សារសាមគ្គី ស្ថិតក្នុងសង្កាត់កំពង់ចាម ក្រុងកំពង់ចាម គឺមិនទាន់រកឃើញអ្នកដែលរើសបាននៅក្នុងបន្ទប់ទឹកប្រគល់ជូនម្ចាស់វិញនៅឡើយទេ ។
ស្ត្រីអាជីវករឈ្មោះស៊ុន ប៊ុនធី អាយុ៦៧ឆ្នាំ មានទីលំនៅក្នុងសង្កាត់កំពង់ចាម ក្រុងកំពង់ចាម បានរៀបរាប់ទាំងទឹកមុខស្រពោនថា ពេលដែលគាត់កំពុងតែអង្គុយលក់បង្អែមនៅក្នុងតូបរបស់គាត់ គ្រាហ៍នោះនៅវេលាម៉ោងប្រហែល១២ថ្ងៃត្រង់ បានដើរទៅបត់ជើងតូចនៅបន្ទប់ទឹក ចម្ងាយពីកន្លែងលក់ប្រមាណ៥០ម៉ែត្រ ពេលចូលទៅគាត់បានយកកាបូបស្ពាយនិងស្មាដោយដាក់ព្យួរជញ្ជាំងហើយក៏ប្រញាប់មកកន្លែងលក់វិញ ។
អាជីវកររូបនេះបានរៀបរាប់ស្ទើរតែបង្ហូរទឹកភ្នែកឲ្យដឹងទៀតថា ស្របពេលមកដល់អង្គុយលាងចានក្នុងតូបលក់ដូរវិញបានបន្តិច ស្រាប់តែមានគេមកទិញបង្អែមគាត់មួយចាន ពេលស្ទាបនិងចង្កេះមិនឃើញកាបូប ទើបដឹងថា ភ្លេចនៅបន្ទប់ទឹករួចក៏រត់ទៅមើល តែមិនឃើញកាបូបនោះទេ មិនដឹងអ្នកណារើសបាន ឬយកចេញទៅ ។
ចំពោះទ្រព្យដែលមាននៅក្នុងកាបូបនោះមានប្រាក់ដុល្លារចំនួន៧៥០ដុល្លារ លុយខ្មែរ៥០ម៉ឺនរៀល ខ្សែក ខ្សែដៃ ជាង១ដំឡឹងសរុបគិតជាលុយជាង៥០០០ដុល្លារ ។
ជារៀងរាល់ថ្ងៃ គាត់ពុំដែលទុកកាបូបដាក់លុយនៅនឹងផ្ទះនោះទេ ព្រោះមិនមានសុវត្ថិភាព ជានិច្ចកាល តែងតែយកជាប់តាមខ្លួន ។ ចំពោះលុយដែលលក់បាន សន្សំទិញមាសម្ដងមួយហ៊ុន គឺប្រឹងសន្សំទម្រាំបានប៉ុណ្ណឹង គឺជាង២០ឆ្នាំមកហើយ ។ ថ្ងៃដែលបាត់កាបូបនោះគឺថ្ងៃទី៥ មករា ឆ្នាំ២០២៦ គាត់បានយំសោកស្ដាយរបស់ទ្រព្យមិនគួរណាបាត់បែបនេះសោះ ព្រោះជាស្ត្រីមេម៉ាយមានកូនបីនាក់ ដោយរាល់ថ្ងៃនេះ គឺនៅជាមួយកូនប្រុសម្នាក់។
ហើយផ្ទះដែលគាត់ទិញ គឺនៅក្រោយធនាគារឯកជនមួយកន្លែងក្នុងសង្កាត់កំពង់ចាម ចម្ងាយពីផ្សារសាមគ្គីមកផ្ទះប្រហែលជា៣០០ម៉ែត្រ ។ នៅថ្ងៃបាត់កាបូបលុយនោះ គឺមិនមានអ្នកទិញចូលមកនោះទេ គឺមានតែអ្នកលក់ដូរទាំងអស់នៅក្នុងផ្សារ ។
ពាក់ព័ន្ធករណីខាងលើ កាលពីរសៀលថ្ងៃទី១២ កុម្ភៈ ឆ្នាំ២០២៦ ភ្នាក់ងាររបស់យើងបានទាក់ទងតាមតេឡេក្រាមទៅលោកវីរសេនីយ៍ឯកអ៊ីង ប៊ុន អធិការនគរបាលក្រុងកំពង់ចាម សួរនាំពីបញ្ហាករណីភ្លេចកាបូបក្នុងបន្ទប់ទឹករបស់អាជីវករលក់បង្អែមខាងលើ តែពុំមានការឆ្លើយតបទេ ។
ចែករំលែកព័តមាននេះ