ខេត្តប៉ៃលិន ៖ មានសេចក្តីរាយការណ៍ពីប្រជាពលរដ្ឋដែលធ្វើដំណើរតាមដងផ្លូវឱ្យដឹងថា មានករណីអគ្គិភ័យឆាបឆេះព្រៃនៅលើកំពូលកូនភ្នំមួយកន្លែង ក្បែរផ្លូវជាតិលេខ៥៩ ដែលធ្វើឱ្យអ្នកភូមិរស់នៅទីនោះ ម្នាក់ៗមានការព្រួយបារម្ភពីការឆាបឆេះរាលដាលដល់ផ្ទះសម្បែងរបស់ខ្លួន ព្រោះភ្លើងនេះបានចាប់ផ្តើមឆេះតាំងពីក្បាលល្ងាច រហូតមកដល់យប់ជ្រៅទៅហើយនៅមិនទាន់រលត់ទាំងស្រុងនៅឡើយទេ ។…
ខេត្តប៉ៃលិន ៖ មានសេចក្តីរាយការណ៍ពីប្រជាពលរដ្ឋដែលធ្វើដំណើរតាមដងផ្លូវឱ្យដឹងថា មានករណីអគ្គិភ័យឆាបឆេះព្រៃនៅលើកំពូលកូនភ្នំមួយកន្លែង ក្បែរផ្លូវជាតិលេខ៥៩ ដែលធ្វើឱ្យអ្នកភូមិរស់នៅទីនោះ ម្នាក់ៗមានការព្រួយបារម្ភពីការឆាបឆេះរាលដាលដល់ផ្ទះសម្បែងរបស់ខ្លួន ព្រោះភ្លើងនេះបានចាប់ផ្តើមឆេះតាំងពីក្បាលល្ងាច រហូតមកដល់យប់ជ្រៅទៅហើយនៅមិនទាន់រលត់ទាំងស្រុងនៅឡើយទេ ។
ហេតុការណ៍អគ្គិភ័យឆាបឆេះព្រៃកូនភ្នំ បង្កឱ្យមានការភ្ញាក់ផ្អើលកាលពីវេលាម៉ោង៦ និង៣០នាទី រហូតដល់ម៉ោង៩ និង៥៥នាទីយប់ថ្ងៃទី១០ ខែកុម្ភៈ ឆ្នាំ២០២៦ ថ្ងៃដដែល ស្ថិតនៅក្នុងភូមិបុស្អំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីបុរសម្នាក់ឈ្មោះ កុល សុខណា ដែលបើកបររថយន្តនៅតាមបណ្តោយដងផ្លូវជាតិលេខ៥៩ ហើយបានប្រទះឃើញអគ្គិភ័យឆាបឆេះព្រៃកូនភ្នំខាងលើ បានរៀបរាប់ឱ្យដឹងថា ៖ នាព្រលប់យប់ថ្ងៃកើតហេតុ គាត់បានបើកបររថយន្តចេញពីផ្ទះនៅក្បែរផ្សារសាលាក្រៅ ឆ្ពោះទៅក្រុងប៉ៃលិន ដើម្បីនាំក្រុមគ្រួសារទទួលទានអាហារនៅក្នុងហាងមួយកន្លែងរហូតដល់ម៉ោងជិត១០យប់ថ្ងៃដដែលនេះ គាត់ក៏បានធ្វើដំណើរត្រឡប់ទៅផ្ទះវិញក្នុងទិសដៅពីត្បូងទៅជើង ស្រាប់តែនៅឃើញភ្លើងបន្តឆាបឆេះព្រៃកូនភ្នំដដែល ដោយរាលដាលតាំងពីលើមកក្រោមនៅក្បែរៗផ្ទះប្រជាពលរដ្ឋ ដែលធ្វើឱ្យពួកគាត្ម់ម្នាក់ៗ មានការព្រួយបារម្ភពីការឆេះឆ្លងចូលដល់ផ្ទះសម្បែងរបស់ខ្លួន ទើបពួកគាត់បានត្រៀមទឹកធុង និងទឹកទុយោនៅក្បែរផ្ទះរបស់ខ្លួន សម្រាប់បាញ់ពន្លត់ភ្លើងឆេះព្រៃខាងលើនេះ ។
លោកបានបញ្ជាក់ទៀតថា ការឆេះព្រៃនេះ មិនដឹងមូលហេតុនោះទេ ប៉ុន្តែគេដាក់ការសង្ស័យថា អាចមកពីព្រានដើររកសត្វព្រៃ ឬដើររកឃ្មុំព្រៃ លុះដុតភ្លើង អត់បានពន្លត់ ទើបបណ្តាលឱ្យឆាបឆេះរាលដល់ពេញព្រៃភ្នំ និងឆេះរាលចុះមកក្រោម ដល់ក្បែរៗ ផ្ទះប្រជាពលរដ្ឋតែម្តង ។ លោកបញ្ជាក់ទៀតថា ការឆាបឆេះនេះ មើលទៅហាក់ដូចជាមិនសូវជាមានកម្លាំងខ្លាំងប៉ុន្មាននោះទេ ខណៈដែលរថយន្តពន្លត់អគ្គិភ័យរបស់ស្នងការនគរបាលខេត្តប៉ៃលិន ក៏ត្រៀមរួចរាល់ជាស្រេច ដើម្បីចេញទៅជួយអន្តរាគមន៍ បើស្ថិតនៅក្នុងករណីធ្ងន់ធ្ងរណាមួយ ។
រហូតមកដល់វេលាម៉ោង១០យប់ថ្ងៃដដែល ប្រជាពលរដ្ឋបានបន្តរាយការណ៍ថា ភ្លើងឆេះព្រៃកូនភ្នំខាងលើ បានស្ងប់ស្ងាត់បន្តិចវិញហើយ ខណៈដែលព្រៃនៅក្បែរៗ នោះមិនសូវមានច្រើនប៉ុន្មានទេ ដោយភាគច្រើនគឺឆេះស្មៅងាប់ស្តើងៗប៉ុណ្ណោះ។
ទោះបីជាយ៉ាងណាក៏ដោយ ពួកគាត់ក៏មិនធ្វេសប្រហែសដែរ គឺត្រៀមការពារផ្ទះរបស់ខ្លួន មិនឱ្យភ្លើងឆេះដល់នោះឡើយ ដោយម្នាក់ៗមានទឹកបម្រុងនៅក្នុងពាង និងនៅក្នុងធុងគ្រប់គ្រាន់ទាំងអស់ ៕
ចែករំលែកព័តមាននេះ