វៀតណាម ៖ វៀតណាមទៀតហើយ ម្តងនេះជួញដូរជីកសិកម្មក្លែងក្លាយក្នុងទ្រង់ទ្រាយធំ ។ នគរបាលសេដ្ឋកិច្ចនៃស្នងការដ្ឋាននគរបាលក្រុងកាំងថឺ ប្រទេសវៀតនាម ទើបតែបង្ក្រាបបានក្រុមសង្ស័យមួយក្រុម ដែលមានសកម្មភាពផលិត និងជួញដូរជីកសិកម្មក្លែងក្លាយក្នុងទ្រង់ទ្រាយធំ…
វៀតណាម ៖ វៀតណាមទៀតហើយ ម្តងនេះជួញដូរជីកសិកម្មក្លែងក្លាយក្នុងទ្រង់ទ្រាយធំ ។ នគរបាលសេដ្ឋកិច្ចនៃស្នងការដ្ឋាននគរបាលក្រុងកាំងថឺ ប្រទេសវៀតនាម ទើបតែបង្ក្រាបបានក្រុមសង្ស័យមួយក្រុម ដែលមានសកម្មភាពផលិត និងជួញដូរជីកសិកម្មក្លែងក្លាយក្នុងទ្រង់ទ្រាយធំ ដោយប្រើប្រាស់វិធីសាស្ត្រយ៉ាងស្មុគស្មាញ ដើម្បីបន្លំភ្នែកសមត្ថកិច្ច និងបោកប្រាស់ប្រជាកសិករ ដែលបង្កជាហានិភ័យធ្ងន់ធ្ងរដល់ផលិតកម្មកសិកម្ម ។
យោងតាមការចុះផ្សាយរបស់ទីភ្នាក់ងារសារព័ត៌មានរដ្ឋវៀតណាម កាលពីថ្ងៃទី៦ ខែកុម្ភៈ ឆ្នាំ២០២៦ បានឱ្យដឹងថា បន្ទាប់ពីទទួលបានសេចក្តីរាយការណ៍សម្ងាត់ពីមូលដ្ឋាន កាលពីថ្ងៃទី០២ ខែកុម្ភៈ កម្លាំងនគរបាលសេដ្ឋកិច្ចបានដាក់ពង្រាយកម្លាំងស្ទាក់ឃាត់រថយន្តដឹកទំនិញប្រភេទ Pick-up មួយគ្រឿង ស្លាកលេខ 63C-160.56 បើកបរដោយឈ្មោះ Tran Phuong Vu អាយុ ៣១ឆ្នាំ ខណៈកំពុងធ្វើដំណើរទៅកាន់ឃុំថាញ់ហ្វា (Thanh Hoa) ក្រុងកាំងថឺ ។
ឆ្លងកាត់ការឆែកឆេរសមត្ថកិច្ច បានរកឃើញជីកសិកម្មជាច្រើនប្រភេទ ដែលបិទស្លាកសញ្ញារបស់ក្រុមហ៊ុនល្បីៗ ប៉ុន្តែធាតុពិតសុទ្ធតែជាផលិតផលក្លែងក្លាយ ។
វត្ថុតាងដំបូងរួមមាន ៖ ជីចម្រុះ PK 40-25 ចំនួន២៤០ គីឡូក្រាម, ជីសរីរាង្គ ORGACA CRF1 ចំនួន ៤០០ គីឡូក្រាម និងជីទឹកបាញ់ស្លឹក DOTA KALI40 ចំនួន ២០ លីត្រ ។
តាមចម្លើយសារភាពរបស់អ្នកបើកបរ ជីទាំងនេះ គ្មានវិក្កយបត្រ ឬឯកសារបញ្ជាក់ប្រភពដើមឡើយ ដោយវាត្រូវបានផលិតដោយក្រុមហ៊ុន Ba Con Su Tu (តោបី) ស្ថិតក្នុងខេត្តវិញឡុង (Vinh Long) ដើម្បីដឹកយកទៅចែកចាយនៅហាងលក់សម្ភារកសិកម្ម Viet Doan ក្នុងក្រុងកាំងថឺ ក្នុងតម្លៃ ៤០លានដុង ។
ដោយសង្កេតឃើញថា ជាករណីស្មុគស្មាញ សមត្ថកិច្ចបានពង្រីកការស៊ើបអង្កេត ដោយចុះឆែកឆេរ និងដកហូតទំនិញពីហាង Viet Doan, ហាង Toan Tuyen ក្នុងក្រុងកាំងថឺ, ទីតាំងពាក់ព័ន្ធចំនួន ២ កន្លែងទៀត ក្នុងខេត្តវិញឡុង រួមទាំងក្រុមហ៊ុនកសិកម្មមួយនៅខេត្តដុងថាប់ (Dong Thap) ផងដែរ ។
ជារួម ក្នុងប្រតិបត្តិការឆែកឆេរនៅតាមទីតាំងពាក់ព័ន្ធក្នុងក្រុង និងខេត្តទាំង៣នេះ សមត្ថកិច្ចបានរឹបអូស ៖ ជីកសិកម្មប្រភេទម្សៅ/គ្រាប់ ៖ ៤.៥៩៨ គីឡូក្រាម។ ជីកសិកម្មប្រភេទទឹក៖ ១.៣៣៥ លីត្រ។ សម្ភារៈបម្រើការផលិត៖ គ្រឿងចក្រ, សំបកវេចខ្ចប់, វត្ថុធាតុដើម និងទិន្នន័យអេឡិចត្រូនិកជាច្រើន។ តម្លៃសរុបនៃវត្ថុតាង ៖ ប៉ាន់ប្រមាណជាង ១,៨ ប៊ីលានដុង ។
យោងតាមការបញ្ជាក់ពីតំណាងក្រុមហ៊ុន ដែលរងការបន្លំស្លាកសញ្ញា រួមមាន ក្រុមហ៊ុន Dong Tay និងក្រុមហ៊ុន Carton បានឱ្យដឹងថា ពួកគេមិនដែលមានកិច្ចសន្យាផលិត ឬអនុញ្ញាតឱ្យក្រុមហ៊ុន Ba Con Su Tu ប្រើប្រាស់ម៉ាកសញ្ញារបស់ខ្លួនឡើយ ។
ជាក់ស្តែង ចាប់តាំងពីខែមេសា ឆ្នាំ២០២៥ មក មេខ្លោងឈ្មោះ Nguyen Van Thiet បានបង្កើតក្រុមហ៊ុនចំនួន ៤បន្លំភ្នែកសមត្ថកិច្ច ដែលសុទ្ធតែគ្មានអាជ្ញាប័ណ្ណផលិតជីត្រឹមត្រូវ ។
ដោយឡែក ភរិយារបស់មេខ្លោងឈ្មោះ Tran Thi Trieu បានប្រើប្រាស់បណ្តាញសង្គម TikTok ដើម្បីធ្វើការ Livestream លក់ផលិតផលក្លែងក្លាយទាំងនោះ ។
បច្ចុប្បន្ន នគរបាលក្រុងកាំងថឺ កំពុងបន្តនីតិវិធីស៊ើបអង្កេត ដើម្បីផ្ដន្ទាទោសជនល្មើសតាមច្បាប់ និងដើម្បីការពារស្ថិរភាពទីផ្សារកសិកម្មក្នុងតំបន់៕
ចែករំលែកព័តមាននេះ