ទីក្រុងសេអូល ៖ ឯកឧត្តមបណ្ឌិត ឆាយ សុផល រដ្ឋលេខាធិការក្រសួងព័ត៌មាន ក្នុងនាមជាប្រធានសមាគមអ្នកសារព័ត៌មានអាស៊ី (Asian Journalist Association…
ទីក្រុងសេអូល ៖ ឯកឧត្តមបណ្ឌិត ឆាយ សុផល រដ្ឋលេខាធិការក្រសួងព័ត៌មាន ក្នុងនាមជាប្រធានសមាគមអ្នកសារព័ត៌មានអាស៊ី (Asian Journalist Association ហៅកាត់ថា AJA) នៅសប្តាហ៍នេះ បានដឹកនាំប្រធានស្ថាបនិក និងនាយកប្រតិបត្តិនៃសមាគមនេះ ចូលជួបសម្ដែងការគួរសម និងពិភាក្សាការងារជាមួយឯកឧត្តម ឃួន ផុនរតនៈ ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ។
នៅក្នុងជំនួបនារសៀលថ្ងៃទី៥ ខែកុម្ភៈ កន្លងទៅ បណ្ឌិត ឆាយ សុផល បានជម្រាបជូនឯកឧត្តមឯកអគ្គរាជទូតថា សមាគម AJA មានលេខាធិការដ្ឋានប្រចាំនៅរដ្ឋធានីសេអ៊ូល ដែលមានសមាជិកជាអ្នកសារព័ត៌មាន មកពីជិត៣០ប្រទេស នៅក្នុងទ្វីបអាស៊ី និងមជ្ឈឹមបូព៌ា។
ឯកឧត្តមបណ្ឌិតបានជម្រាបជូនថា លោក Lee Sang-ki ជាប្រធានស្ថាបនិកនៃសមាគម AJA និងជាបណ្ណាធិកានៃទស្សនាវត្ដី និងគេហទំព័រដំណឹង AsiaN របស់សមាគម AJA ហើយគេហទំព័រដំណឹងប្រចាំថ្ងៃនេះមាន៤ភាសា គឺភាសាកូរ៉េ ភាសាអង់គ្លេស ភាសារុស្ស៊ី និងភាសាប៉ាគីស្ថាន ដោយសមាជិក AJA ទាំងអស់អាចផ្តល់ និងយកទៅផ្សាយបន្តសម្រាប់ស្ថាប័នសារព័ត៌មានរៀងៗខ្លួន។
ឯកឧត្តមបណ្ឌិតបន្តថា កន្លងមកតាមរយៈឯកឧត្តមបណ្ឌិត គឺទស្សនាវត្ដី និងគេហទំព័រដំណឹង AsiaN បានផ្សាយដំណឹងខ្លីៗជាច្រើនស្តីពីវប្បធម៌ ប្រពៃណី និងទេសចរណ៍ កសិកម្ម ពាណិជ្ជកម្ម និងវិនិយោគរបស់កម្ពុជា ជាពិសេស បញ្ហាដែលយោធាថៃបានឈ្លានពានកម្ពុជាកន្លងមក និងការរំលោភបំពានយ៉ាងធ្ងន់ធ្ងរលើបទឈប់បាញ់ពីសំណាក់យោធាថៃឈ្លានពានរហូតមកដល់បច្ចុប្បន្ន។
ពាក់ពាក់ព័ន្ធនឹងឃាតកម្មលើនិស្សិតកូរ៉េម្នាក់កន្លងទៅនៅកម្ពុជា ដែលនាំឱ្យជនជាតិកូរ៉េមួយចំនួនយល់ច្រឡំ និងមិនសប្បាយចិត្តនឹងកម្ពុជា គឺលោក Lee ដែលធ្លាប់មកកម្ពុជាចំនួនពីរលើក ហើយបានយល់ដឹងបានច្រើនពីប្រជាជន និងប្រទេសកម្ពុជា ក៏បានសរសេរអត្ថបទទស្សនៈមួយចំនួនពាក់ពាក់ព័ន្ធនឹងរឿងនេះ ដោយលោកបានពន្យល់ និងបកស្រាយពីហេតុការណ៍ដែលជនជាតិផ្សេងជាអ្នកប្រព្រឹត្តនៅលើទឹកដីកម្ពុជា ហើយជនសង្ស័យបានគេចខ្លួនទៅប្រទេសថៃ រហូតត្រូវបានចាប់ខ្លួននៅក្នុងប្រទេសនោះ ។
លោក Lee បានស្នើសុំឯកឧត្តមឯកអគ្គរាជទូតកម្ពុជា អាចជួបយ៉ាងតិចពីរដងក្នុងមួយឆ្នាំ ដើម្បីបានព័ត៌មានពិតស្តីពីកម្ពុជា ហើយនៅឆ្នាំ២០២៧ ដែលជាខួបលើកទី៣០ឆ្នាំ នៃទំនាក់ទំនងការទូតរវាងកម្ពុជានិងសាធារណរដ្ឋកូរ៉េ លោក Lee គ្រោងដឹកនាំអ្នកសារព័ត៌មានមួយចំនួនដែលជាសមាជិកសមាគម AJA ទៅទស្សនាកម្ពុជា ដើម្បីបានព័ត៌មានពិតបន្ថែម។
ជាការឆ្លើយតប ឯកឧត្តមឯកអគ្គរាជទូត បានស្វាគមន៍ និងរីករាយសហការណ៍ជាមួយសមាគម AJA ហើយបានស្នើឱ្យសមាគម AJA ជួយផ្សាយអត្ថបទ ជាពិសេសជាភាកូរ៉េ ដើម្បីឱ្យប្រជាជនកូរ៉េបានយល់ដឹងកាន់តែច្បាស់ពីស្ថានភាពពិតរបស់កម្ពុជា។
ក្រៅពីការបង្ហាញពីបេសកកម្មរបស់ស្ថានឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េ និងការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការកសាង និងអភិវវឌ្ឍប្រទេស ជាពិសេសទំនាក់ទំនងការទូតរវាងកម្ពុជានិងកូរ៉េ ឯកឧត្តមឯកអគ្គរាជទូតក៏បានបញ្ជាក់ដែរថា កម្ពុជាមិនចង់ឱ្យសារព័ត៌មានឈរនៅខាងកម្ពុជានោះទេ ឬក៏បន្ទោសអ្នកផ្សេងនោះដែរ ប៉ុន្តែសុំតែផ្សាយពីការពិត មានតុល្យភាព និងយុត្តិធម៌សម្រាប់កម្ពុជាតែប៉ុណ្ណោះ ជាពិសេសរឿងឧក្រិដ្ឋកម្មអនឡាញ ដែលរាជរដ្ឋាភិបាលបានប្តេជ្ញាចិត្តយ៉ាងច្បាស់លាស់ក្នុងការបង្ក្រាបដោយម៉ឺងម៉ាត់។
សូមបញ្ជាក់ដែរថា ឯកឧត្តមបណ្ឌិត ឆាយ សុផល ក៏បាននាំយកសៀវភៅមួយចំនួនជូនស្ថានឯកអគ្គរាជទូតផងដែរ ដើម្បីទុកជាឯកសារសម្រាប់មិត្តអ្នកអានទាំអ្នកធ្វើការនៅស្ថានទូត និងអ្នកមកស្ថានទូត៕
ចែករំលែកព័តមាននេះ