ខេត្តពោធិ៍សាត់ ៖ នៅថ្ងៃទី០៧ ខែកុម្ភៈ ឆ្នាំ២០២៦ ទាហានសៀម បានស្ទូចកុងតឺន័រ ដាក់តំរៀបធ្វើជារបង ដើម្បីព័ទ្ធយកដីកម្ពុជានៅច្រកជ័យជំនៈ ឃុំថ្មដា…
ខេត្តពោធិ៍សាត់ ៖ នៅថ្ងៃទី០៧ ខែកុម្ភៈ ឆ្នាំ២០២៦ ទាហានសៀម បានស្ទូចកុងតឺន័រ ដាក់តំរៀបធ្វើជារបង ដើម្បីព័ទ្ធយកដីកម្ពុជានៅច្រកជ័យជំនៈ ឃុំថ្មដា ស្រុកវាលវែង ខេត្តពោធិ៍សាត់ ។
វរកងទ័ពកម្ពុជា ដែលឈរជើងនៅទីនោះ បានប្រាប់ឲ្យដឹងថា កាលពីថ្ងៃទី០៦ ខែកុម្ភៈ ឆ្នាំ២០២៦ ពួកទាហានសៀម បានដឹកជញ្ជូនទូកុងតឺន័រ ជាច្រើនគ្រឿង មកដាក់នៅចំណុចច្រមុះជ្រូក ច្រកជ័យជំនៈ ដែលពួកវាបានរាយបន្លាលួសពីថ្ងៃមុន បម្រុងលើកតំរៀបធ្វើជារបងយកដីរបស់កម្ពុជាយើង ប៉ុន្តែដោយសារថ្ងៃនោះ ឃើញក្រុម AOT របស់អាស៊ាន នៅសង្គេតការណ៍ ទើបពួកវាមិនហានដាក់ភ្លាម។ លុះក្រុមអ្នកសង្គេតការណ៍អាស៊ានដកចេញ ទើបនៅវេលាម៉ោងប្រមាណ៥ទៀបភ្លឺ ថ្ងៃទី០៧ ខែកុម្ភៈ ឆ្នាំ២០២៦ ពួកទាហានសៀម ក៏យកគ្រឿងចក្រ ស្ទូចទូកុងតឺន័រ ដាក់កាត់ផ្លូវ មិនឲ្យធ្វើចរាចរណ៍ទៅមកបាន ។
វរកងទ័ពបន្តទៀតថា នៅពេលពួកទាហានសៀម ស្ទូចទូកុងតឺន័រដាក់នោះ ទាហានកម្ពុជាយើងបានឃាត់មិនឲ្យដាក់ឡើយ រហូតរុញច្រានគ្នា ទៅវិញទៅមក ប៉ុន្តែមិនមានការផ្ទុះអាវុធនោះទេ ដោយសារភាពអត់ធ្មត់របស់កងទ័ពកម្ពុជាយើងគោរពតាមបទបញ្ជារបស់ថ្នាក់ដឹកនាំ និងកិច្ចព្រមព្រៀងសន្តិភាព ។
ពួកទាហានសៀមនៅតែជំនៈ រហូតលើកទូកុងតឺន័រដាក់ពីលើកងទ័ពកម្ពុជា ដើម្បីសង្កត់លើ ឃើញដូច្នេះកងទ័ពកម្ពុជាយើង ក៏នាំគ្នាថយចេញ ពេលនោះ ពួកវាក៏ធ្វើសកម្មភាពលើកទូកុងតឺន័របិទផ្លូវតែម្ដង។ នៅពេលបិទផ្លូវមិនអាចធ្វើចរាចរណ៍បាន ពួកទាហានសៀម បានសម្រុកលើកកុងតឺន័រ ដាក់តំរៀបព័ទ្ធយកផ្ទះ និងហាងលក់ដូររបស់ប្រជាពលរដ្ឋ នៅចំណុចច្រមុះជ្រូកនោះតែម្ដង។ តាំងពីព្រឹករហូតដល់ថ្ងៃត្រង់ថ្ងៃទី០៧ ខែកុម្ភៈនេះ វរកងទ័ព និងប្រជាពលរដ្ឋកម្ពុជាយើង បានត្រឹមតែឈរមើលសកម្មភាពរបស់ទាហានសៀមតែប៉ុណ្ណោះ ប៉ុន្តែនៅវេលាម៉ោងប្រមាណ ១រសៀលថ្ងៃទី០៧ ខែកុម្ភៈ ទាហានសៀមបានបើកទូកុងតឺន័រ ចំនួន០២ ដើម្បីឲ្យប្រជាពលរដ្ឋចេញចូលផ្លូវមួយចំហៀង ។
សូមបញ្ជាក់ថា កាលពីថ្ងៃទី០៦ ខែកុម្ភៈ ឆ្នាំ២០២៦ ក្រុម AOT អាស៊ាន មកពីប្រទេសម៉ាឡេស៊ី ប្រ៊ុយណេ វៀតណាម ឡាវ និងហ្វីលីពីន ដែលដឹកនាំ និងសម្របសម្រួលដោយកងទ័ពកម្ពុជា បានចុះទៅសង្គេតការណ៍នៅឃុំថ្មដា ស្រុកវាលវែង ខេត្តពោធិ៍សាត់ ហើយឃើញផ្ទាល់នឹងភ្នែក នូវទង្វើឈ្លានពានរបស់ទាហានសៀមមកលើកម្ពុជា គឺការព័ទ្ធបន្លាលួសយកដី ផ្ទះ ហាងលក់ដូរ និងសកម្មភាពដឹកទូកុងតឺន័រយ៉ាងគឃ្លើនផងដែរ។ សកម្មភាពរំលោភទាំងកម្រោលបែបនេះ ជាការបំពានច្បាប់អន្តរជាតិយ៉ាងធ្ងន់ធ្ងរ ដែលសហគមន៍អន្តរជាតិ ត្រូវតែចាត់ការជាបន្ទាន់ និងជួយអន្តរាគមន៍ដល់កម្ពុជា ដែលកំពុងរងគ្រោះយ៉ាងអយុត្តិធម៌ ៕
ចែករំលែកព័តមាននេះ