ខេត្តប៉ៃលិន ៖ ដោយមានការព្រួយបារម្ភ និងការយកចិត្តទុកដាក់ពីថ្នាក់ដឹកនាំសាលា ខណៈដែលបានសង្កេតតាមដានអស់រយៈពេលជាយូរថ្ងៃ ថ្នាក់ដឹកនាំវិទ្យាល័យហ៊ុនសែនក្រុងទេពនិម្មិតប៉ៃលិន បានរកឃើញថា សិស្សសាលាមួយចំនួន បានចតម៉ូតូនៅក្រៅរបងសាលា ដែលជាហេតុនាំឱ្យជួបហានិភ័យ…
ខេត្តប៉ៃលិន ៖ ដោយមានការព្រួយបារម្ភ និងការយកចិត្តទុកដាក់ពីថ្នាក់ដឹកនាំសាលា ខណៈដែលបានសង្កេតតាមដានអស់រយៈពេលជាយូរថ្ងៃ ថ្នាក់ដឹកនាំវិទ្យាល័យហ៊ុនសែនក្រុងទេពនិម្មិតប៉ៃលិន បានរកឃើញថា សិស្សសាលាមួយចំនួន បានចតម៉ូតូនៅក្រៅរបងសាលា ដែលជាហេតុនាំឱ្យជួបហានិភ័យ អាចឱ្យសិស្សគេចម៉ោងសិក្សាចេញទៅដើរលេង និងប្រឈមការបាត់បង់ដោយគ្មានអ្នកគ្រប់គ្រង។
ចំណែកសិស្សមួយចំនួនទៀត បាននាំគ្នាលួចជក់បារី អេឡិចត្រូនិក ដែលជាទម្លាប់មិនល្អ នាំឱ្យមានបញ្ហាគ្រោះថ្នាក់ដល់សុខភាពទាំងវ័យក្មេង ទើបកាលពីរសៀលថ្ងៃទី០៦ ខែកុម្ភៈ ឆ្នាំ២០២៦ សមត្ថកិច្ចនគរបាលក្រុងប៉ៃលិន បានសហការណ៍ជាមួយនឹងថ្នាក់ដឹកនាំវិទ្យាល័យហ៊ុនសែនក្រុងទេពនិម្មិត ប៉ៃលិន បានកោះហៅអាណាព្យាបាល ដើម្បីមកអប់រំណែនាំ និងធ្វើកិច្ចសន្យារាងចាល ចំពោះសិស្សដែលចតទុកម៉ូតូក្រៅរបងសាលារៀន ប្រមាណជាង២០នាក់ ក្នុងគោលបំណង បង្ការទប់ស្កាត់កុំឲ្យមានបញ្ហាកើតឡើង។
បើតាមប្រភពព័ត៌មានពីលោកគ្រូ យ៉ាន់ ពុច នាយករងវិទ្យាល័យហ៊ុនសែនក្រុងទេពនិម្មិតប៉ៃលិន បានរៀបរាប់ឱ្យដឹងនៅវេលាម៉ោង៩ និង៣០នាទីព្រឹកថ្ងៃទី០៧ ាខែកុម្ភៈនេះថា ៖ លោកសំណូម ពរដល់បងៗ និងប្អូនៗ ដែលជាអាណាព្យា បាលសិស្ស សូមជួយជម្រុញបន្ថែម ដោយធ្វើកិច្ចសន្យាលើកទី១ មិនឱ្យបន្តចតម៉ូតូនៅខាងក្រៅរបងសាលាបន្តទៀត គឺទាមទារឱ្យសិស្សទាំងអស់ចតក្នុងបរិវេណសាលា ខណៈដែលបង់ថ្លៃឱ្យសាសាត្រឹមតែ២០០រៀលប៉ុណ្ណោះក្នុង១ថ្ងៃ។
លោកនាយករងវិទ្យាល័យ បានបន្តទៀតថា បើសិនជាសិស្សមិនចតម៉ូតូក្នុងរបងសាលារៀនទេ គឺនៅពេលណាមួយពួកគេអាចនឹងគេចម៉ោងសិក្សាចេញទៅដើរលេងនៅខាងក្រៅជាមួយមិត្តភក្តិ ដែលអាចនឹងមានគ្រោះថ្នាក់អ្វីកើតឡើងជាយកថាហេតុ ព្រោះអាណាព្យាបាលនៅផ្ទះទុកចិត្តនិងសង្ឃឹមថា កូនៗទៅរៀនឯសាលាមិនបំពានវិន័យឡើយ។ ម្យ៉ាងវិញទៀត ការចតទុកម៉ូតូចោលក្រៅរបងសាលា អាចធ្វើឱ្យជនឆ្លៀតឱកាសមួយចំនួនបន្លំលួចយកម៉ូតូ ដែលមានតម្លៃរាប់ពាន់ដុល្លារ ក៏អាចនឹងកើតឡើងផងដែរ។
លើសពីនេះ សិស្សមួយចំនួនដែលចតម៉ូតូខាងក្រៅរបងសាលារៀន ក៏បានលួចលាក់នាំគ្នាជក់បារីអេឡិចត្រូនិក ខុសច្បាប់ ហើយត្រូវតែឈប់ប្រើប្រាស់ទាំងអស់គ្នា ព្រោះអាចនឹងបង្កបញ្ហាគ្រោះថ្នាក់ធ្ងន់ធ្ងរដល់សុខភាព ជាពិសេសអាចធ្វើឱ្យរលាកសួត និងផ្លូវដង្ហើមធ្ងន់ធ្ងរ ព្រោះវ័យនេះ ជាពេលខិតខំប្រឹងប្រែងសិក្សារៀនសូត្រ។ បើសិនជាសិស្សណាមួយនៅបន្តចតម៉ូតូនៅខាងក្រៅទៀត មិនធ្វើតាមកិច្ចសន្យារបស់សាលាទេ ថ្នាក់ដឹកនាំសាលារៀននឹងដកហូត ម៉ូតូយកទៅទុកនៅការិយាល័យនគរបាលក្រុងប៉ៃលិន ហើយត្រូវផាកពិន័យថែមទៀតផង។
ចំណែកអាណាព្យាបាលនៃសិស្សដែលចតម៉ូតូនៅខាងក្រៅរបងសាលា ក៏បានអរគុណដល់លោកគ្រូ និងនគរបាល ក្រុងប៉ៃលិន ដែលបានផ្តល់ដំណឹងនេះជូនពួកគាត់ទាន់ពេលវេលា ដើម្បីឱ្យគាត់បន្តអប់រំកូនៗ របស់ខ្លួន កុំឱ្យប្រព្រឹត្តល្មើសនឹងវិន័យសាលាបន្តទៀត ហើយនឹងជម្រុញឱ្យពួកគេ ត្រូវតែខិតខំរៀនសូត្រ ដើម្បីអនាគតខ្លួនឯង។
លើសពីនេះទៀត ពួកគាត់នៅឯផ្ទះខិតខំប្រឹងប្រែងរកថវិកាទាំងត្រដាបត្រដួស ដើម្បីទិញម៉ូតូ និងសន្សំទុកឱ្យកូនៗយកទៅរៀនសូត្រឱ្យបានចេះដឹង មិនចង់ឱ្យពួកគេ គេចម៉ោងសិក្សាដើរលេងជួបជុំមិត្តភក្តិដែលមិនល្អ នាំឱ្យខូចអនាគតនោះឡើយ ៕
ចែករំលែកព័តមាននេះ