រាជធានីភ្នំពេញ ៖ ឯកអគ្គរាជទូតកម្ពុជា ប្រចាំនៅសាធារណរដ្ឋកូរ៉េ មានគម្រោងចចារជាមួយក្រសួងការងាររបស់ប្រទេសកូរ៉េ ដើម្បីឱ្យបងប្អូនពលករខ្មែរ អាចមានឱកាសទទួលបានទិដ្ឋាការពលករជំនាញ ដែលវានឹងបង្កភាពងាយស្រួលដល់ពួកគាត់ក្នុងការធ្វើការ រឺ រស់នៅបង្កើតអាជីវកម្មផ្ទាល់ខ្លួន…
រាជធានីភ្នំពេញ ៖ ឯកអគ្គរាជទូតកម្ពុជា ប្រចាំនៅសាធារណរដ្ឋកូរ៉េ មានគម្រោងចចារជាមួយក្រសួងការងាររបស់ប្រទេសកូរ៉េ ដើម្បីឱ្យបងប្អូនពលករខ្មែរ អាចមានឱកាសទទួលបានទិដ្ឋាការពលករជំនាញ ដែលវានឹងបង្កភាពងាយស្រួលដល់ពួកគាត់ក្នុងការធ្វើការ រឺ រស់នៅបង្កើតអាជីវកម្មផ្ទាល់ខ្លួន ។
នៅព្រឹកថ្ងៃទី៥ ខែកុម្ភៈ ឆ្នាំ២០២៦ ឯកឧត្តម ឃួន ផុនរតនៈ ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ បានទទួលជួបសម្តែងការគួរសម និងពិភាក្សាការងារជាមួយលោក OH SINAN OZTURK ប្រធានក្រុមប្រឹក្សាភិបាល នៃសម្ព័ន្ធធុរកិច្ចសកល (Global Business Alliance- GBA) នៅស្ថានទូតកម្ពុជាក្នុងទីក្រុងសេអ៊ូល ។
ក្នុងជំនួបលោក OH បានលើកឡើងថា ក្នុងរយៈពេលមិនដល់១០ឆ្នាំផង សម្ព័ន្ធធុរកិច្ចសកល GBA បានបង្កើនចំនួនសមាជិករបស់ខ្លួនរហូតដល់ ៦៥ប្រទេស និងបានរៀបចំវេទិកាជំនួបធុរកិច្ចជាច្រើនរវាងក្រុមហ៊ុនកូរ៉េ និងក្រុមហ៊ុនមកពីបណ្តាប្រទេសផ្សេងៗ លើវិស័យជាច្រើនដូចជា ពាណិជ្ជកម្ម ទេសចរណ៍ វប្បធម៌ ជាដើម ។
លោកក៏បានបន្តថា ក្នុងចំណោមប្រទេសសមាជិកទាំងអស់ លោក OH បានកត់សម្គាល់ឃើញថា សហគមន៍ខ្មែរ នៅកូរ៉េមានទំហំធំ តែភាគច្រើន ពួកគាត់មកធ្វើការ និងមិនសូវបានចាប់អារម្មណ៍ក្នុងការបង្កើតអាជីវកម្មផ្ទាល់ខ្លួននៅកូរ៉េទេ ហើយលោកសង្ឃឹមថា ប្រជាជនខ្មែរ នៅកូរ៉េ នឹងងាកមកចាប់អារម្មណ៍បន្ថែមទៀតលើការបង្កើតអាជីវកម្មផ្ទាល់ខ្លួន និងសង្ឃឹមថា អាចនឹងមានវត្តមានក្រុមហ៊ុនកម្ពុជា កាន់តែច្រើន ទាំងលើការនាំចូល និងការនាំចេញ ដើម្បីជំរុញវិស័យពាណិជ្ជកម្ម នៃប្រទេសទាំងពីរ មានសន្ទុះកាន់តែខ្លាំងជាងនេះមួយកម្រិតទៀត ។
ជាការឆ្លើយតប ឯកឧត្តម ឯកអគ្គរាជទូត បានមានប្រសាសន៍ថា ស្ថានទូតមានគម្រោងចចារជាមួយក្រសួងការងាររបស់ប្រទេសកូរ៉េ ដើម្បីឱ្យបងប្អូនពលករខ្មែរ អាចមានឱកាសទទួលបានទិដ្ឋាការពលករជំនាញ ដែលវានឹងបង្កភាពងាយស្រួលដល់ពួកគាត់ក្នុងការធ្វើការ រឺ រស់នៅបង្កើតអាជីវកម្មផ្ទាល់ខ្លួន។
ឯកឧត្តមក៏បានសំណូមពរ GBA ឱ្យជួយសហការជាមួយស្ថានទូតក្នុងការរៀបចំជំនួបពាណិជ្ជករកម្ពុជា និងកូរ៉េ ដើម្បីបង្កើតឱកាសវិនិយោគកាន់តែច្រើនសម្រាប់ប្រទេសទាំងពីរ៕
ចែករំលែកព័តមាននេះ