ទីក្រុងម៉ូស្គូ៖ ក្រសួងការបរទេសរុស្ស៊ីព្រមានថាខ្លួនត្រៀមចាត់វិធានការយ៉ាងម៉ឺងម៉ាត់ដើម្បីបញ្ឈប់ការគំរាមកំហែងមកលើខ្លួន។ ការប្រកាសដូច្នេះនៅពេលសន្ធិសញ្ញានុយក្លេអ៊ែររវាងអាមេរិក និងរុស្ស៊ីដែលសេសសល់ចុងក្រោយគេត្រូវផុតសុពលភាពនៅថ្ងៃនេះតែម្ដង។ បន្ទាប់ពីសន្ធិសញ្ញានេះផុតរលត់ទៅ ប្រទេសទាំង២អាចនឹងជិះសេះលែងដៃ មានន័យថាអាចនឹងផលិតក្បាលគ្រាប់នុយក្លេអ៊ែរ និងដាក់ពង្រាយបានតាមចិត្តព្រោះគ្មានលិខិតូបករណ៍ណាសម្រាប់ចងជើងពួកគេបានឡើយ។
នៅក្នុងសេចក្ដីប្រកាសដែលផ្សព្វផ្សាយដោយទីភ្នាក់ងារព័ត៌មានតាស់ (TASS) ក្រសួងខាងលើនេះអះអាងថារុស្ស៊ីមិនទាន់ទទួលការឆ្លើយតបពីអាមេរិកពាក់ព័ន្ធនឹងការស្នើសុំដើម្បីបន្តសុពលភាពនៃសន្ធិសញ្ញានោះនៅឡើយទេ។ សូមរំលឹកថាកាលពីថ្ងៃទី២២ ខែកញ្ញា រុស្ស៊ីបានស្នើសុំបន្តសុពលភាពសន្ធិសញ្ញានេះ។ មុនដំបូង លោកដូណាល់ត្រាំប្រកាសគាំទ្រ។ ប៉ុន្តែនៅទីបញ្ចប់ស្ងាត់ឈឹង។ ទីប្រឹក្សារបស់លោកពូទីនអះអាងថារហូតមកដល់ពេលនេះ ភាគីអាមេរិកមិនបានឆ្លើយតបទេ។
ការថ្លែងរបស់ទីប្រឹក្សារូបនេះបន្ទាប់ពីលោកពូទីនសន្ទនាគ្នាតាមប្រព័ន្ធវីឌីអូពីចម្ងាយជាមួយប្រធានាធិបតីចិន លោកស៊ីជីនពីង រយៈពេល១ម៉ោង និង២៥នាទីដើម្បីពិភាក្សាគ្នាអំពីកិច្ចសហប្រតិបត្តិការជាយុទ្ធសាស្ត្ររវាងប្រទេសទាំង២។ លោកត្រាំបង្ហាញសញ្ញាថាលោកចង់កំណត់ចំនួនអាវុធនុយក្លេអ៊ែរ និងក៏ចង់ឱ្យប្រទេសចិនចូលរួមនៅក្នុងកញ្ចប់នេះដែរ (អាមេរិក រុស្ស៊ី និងចិន)។
មន្ត្រីរដ្ឋាភិបាលរុស្ស៊ីថ្លែងថាពួកគេនឹងចាត់វិធានការនៅក្នុងបញ្ហានុយក្លេអ៊ែរដោយតុល្យភាព (បើអាមេរិកធ្វើអ្វី, រុស្ស៊ីនឹងធ្វើដូច្នោះដែរ) នៅពេលគ្មានសន្ធិសញ្ញានុយក្លេអ៊ែរដែលមានឈ្មោះស្តាត (START)។ រុស្ស៊ីថាខ្លួនត្រៀមធ្វើដំណើរទៅមុខទៀតបើសិនអាមេរិកនៅតែមិនឆ្លើយតប។ រុស្ស៊ីចាត់ទុកថាការដែលអាមេរិកមិនមាត់មិនកបែបនេះជាអាកប្បកិរិយាខុសឆ្គង និងគួរឱ្យសោកស្ដាយ។ ទោះជាយ៉ាងណាក្ដី រុស្ស៊ីថ្លែងថាខ្លួននៅតែបើកទូលាយជានិច្ចក្នុងការស្វែងរកដំណោះស្រាយតាមនយោបាយ និងការទូត។ ពាក់ព័ន្ធនឹងបញ្ហានេះ រដ្ឋមន្ត្រីការបរទេសអាមេរិកប្រាប់ថាលោកមិនទាន់បានស្ដាប់ឮសេចក្ដីប្រកាសពាក់ព័ន្ធនឹងការផុតសុពលភាពសន្ធិសញ្ញានុយក្លេអ៊ែរនោះទេ។ ប៉ុន្តែលោកថាលោកត្រាំត្រៀមចរចាជាមួយរុស្ស៊ី និងចិនជានិច្ច។
តើអ្វីទៅជាសន្ធិសញ្ញាញូស្តាត (New START)?
សន្ធិសញ្ញាញូស្តាត (New START) ចុះហត្ថលេខាដោយលោកអូបាម៉ា និងលោកមេតវេដេវកាលពីឆ្នាំ២០១០ក្នុងនាមលោកទាំងពីរជាប្រធានាធិបតីអាមេរិក និងរុស្ស៊ីកាលពីជំនាន់នោះ។ សន្ធិសញ្ញានេះដាក់កំហិតលើប្រទេសទាំង២មិនឱ្យមានក្បាលគ្រាប់នុយក្លេអ៊ែរជាយុទ្ធសាស្ត្រ (នុយក្លេអ៊ែរខ្នាតធំ) បំពាក់នៅលើមីស៊ីល និងយន្តហោះទម្លាក់គ្រាប់បែកលើសពី១៥៥០គ្រាប់ទេ។
តាមពិត សន្ធិសញ្ញានេះត្រូវផុតសុពលភាពតាំងពីឆ្នាំ២០២១ម៉្លេះ។ ប៉ុន្តែលោកត្រាំបានបន្តសុពលភាពរហូតដល់ជិតចប់អាណត្តិរបស់លោកកាលពីឆ្នាំ២០២០។ ខែកុម្ភៈ ឆ្នាំ២០២៣ លោកពូទីនប្រកាសថានឹងឈប់ចូលរួមនៅក្នុងសន្ធិសញ្ញានេះតទៅទៀតហើយ។ កាលនោះ ក្រុមបស្ចិមប្រទេសដាក់ទណ្ឌកម្មរុស្ស៊ីពីបទឈ្លានពានអ៊ុយក្រែន។ ហេតុនេះ លោកប្រកាសថានឹងដកខ្លួនពីសន្ធិសញ្ញានេះព្រោះលោកមិនយល់ព្រមអនុញ្ញាតឱ្យអាមេរិកត្រួតពិនិត្យមើលឃ្លាំងអាវុធនុយក្លេអ៊ែររបស់រុស្ស៊ីទេ៕ ប្រភព៖ ញូស្វីក (Newsweek) និងប្រភពដទៃទៀត
ចែករំលែកព័តមាននេះ