ACU ៖ មន្ត្រីជិត២ម៉ឺននាក់ បានប្រកាសទ្រព្យសម្បត្តិនិងបំណុល
រាជធានីភ្នំពេញ ៖ អង្គភាពប្រឆាំងអំពើពុករលួយ (ACU) បានឲ្យដឹងថា ចំពោះការងារប្រកាសទ្រព្យសម្បត្តិ និងបំណុលមានមន្ត្រីចំនួន ១៩,៩៤៩ រូប បានមកប្រកាសទ្រព្យសម្បត្តិ…
រាជធានីភ្នំពេញ ៖ អង្គភាពប្រឆាំងអំពើពុករលួយ (ACU) បានឲ្យដឹងថា ចំពោះការងារប្រកាសទ្រព្យសម្បត្តិ និងបំណុលមានមន្ត្រីចំនួន ១៩,៩៤៩ រូប បានមកប្រកាសទ្រព្យសម្បត្តិ និងបំណុល ក្នុងនោះការប្រកាសតាមរបប ២ឆ្នាំ (២០២៦) មានចំនួន ១៩,៧០៥ រូប និងមន្ត្រីទើបទទួលបានការតែងតាំងថ្មីចំនួន ៤១រូប, មន្ត្រីចំនួន ០៣រូប បានប្រកាសក្រោយបញ្ឈប់ពីមុខតំណែង ដោយឡែកមន្ត្រី ២០០រូបទៀត បានមកប្រកាសទ្រព្យសម្បត្តិ និងបំណុល ដោយមូលហេតុលាឈប់ ឬចប់អាណត្តិ និងចូលនិវត្តន៍ នេះបើតាមឯកឧត្តម យិនទៀង ពុទ្ធិរិទ្ធ ប្រធានស្តីទី ACU នៅកិច្ចប្រជុំក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព.) លើកទី៦ អាណត្តិទី៤ នារសៀលថ្ងៃទី០៤ ខែកុម្ភៈ ឆ្នាំ២០២៦ ។
ពាក់ព័ន្ធនឹងការងារពាក្យប្ដឹងវិញ អង្គភាពប្រឆាំងអំពើពុករលួយ បានដំណើរការពិនិត្យ វិភាគ និងធ្វើការសម្រេច លើពាក្យប្ដឹង ដែលមានក្នុងខែមករា សរុប ចំនួន ១៦ពាក្យប្តឹង ។
ក្នុងឱកាសនោះដែរ ឯកឧត្តម យិនទៀង ពុទ្ធិរ៉ា ឧបការី ACU បានរាយការណ៍អំពីប្រតិបត្តិការលើបទល្មើសជាក់ស្តែ នៃការប្រឡងជំនួសចូលរៀនសាលាពេទ្យជូនក្រុមប្រឹក្សាជាតិប្រឆាំងអំពើពុករលួយ ។
ក្រោយពីបានស្តាប់ ដោយយកចិត្តទុកដាក់នូវរបាយការណ៍របស់ ឯកឧត្តម យិនទៀង ពុទ្ធិរិទ្ធ ប្រធានស្តីទី ACU ក្រុមប្រឹក្សាជាតិប្រឆាំងអំពើពុករលួយបានពិភាក្សា លើកសំណួរ និងបានផ្តល់អនុសាសន៍ល្អៗ ចំពោះការរាយការណ៍ ព្រមទាំងផ្តល់ការគាំទ្រដល់អង្គភាព លើកិច្ចការផ្សេងៗទៀត ដែលអង្គភាពកំពុងចាប់អារម្មណ៍ និងកំពុងអនុវត្តនៅពេលនេះ និងនៅពេលខាងមុខ ។
ក្រុមប្រឹក្សាជាតិប្រឆាំងអំពើពុករលួយ គាំទ្រ ACU លើប្រតិបត្តិការឃាត់ ទប់ស្កាត់ការប្រឡងជំនួស ដែលប្រតិបត្តិការនេះមិនមែនសំដៅចង់ចាប់អ្នកណាទេ តែជាគោលការណ៍ច្បាប់មុខងារបង្ការទប់ស្កាត់របស់ ACU ដើម្បីសម្រេចគោលដៅពិតប្រាកដរបស់ច្បាប់ គឺលុបបាតុភាពប្រឡងជំនួសឱ្យបានទាំងស្រុង ។
ការងារបង្ការ និងទប់ស្កាត់អំពើពុករលួយ ACU បានចូលរួមសង្កេតការណ៍ ក្នុងដំណើរការប្រឡងជ្រើសរើសចំនួន ៣ (១) ការប្រឡង ជ្រើសរើសបេក្ខជន ចូលសិក្សាថ្នាក់វេជ្ជបណ្ឌិតឯកទេស នៅសាកលវិទ្យាល័យវិទ្យាសាស្ត្រ សុខាភិបាល សម្រាប់ឆ្នាំសិក្សា២០២៥-២០២៦ ដែលបានរៀបចំដោយ ក្រសួងសុខាភិបាល (២) ការប្រឡងជ្រើសរើសមន្ត្រីជាប់កិច្ចសន្យា សម្រាប់បម្រើការនៅសាលាខេត្តកណ្តាល ដែលបាន រៀបចំដោយ សាលាខេត្តកណ្តាល (៣) ការប្រឡងជ្រើសរើសនិស្សិតចូលរៀនថ្នាក់ឆ្នាំទី១ កម្រិត បរិញ្ញាបត្ររង នៅតាមគ្រឹះស្ថានបណ្តុះបណ្តាលក្នុងវិស័យសុខាភិបាល ដែលបានរៀបចំដោយ ទីស្តីការគណៈរដ្ឋមន្ត្រី និងក្រសួងសុខាភិបាល៕
ចែករំលែកព័តមាននេះ