ខេត្តប៉ៃលិន ៖ រហូតមកដល់ថ្ងៃទី០៤ ខែកុម្ភៈ ឆ្នាំ២០២៦នេះ គេសង្កេតឃើញប្រជាពលរដ្ឋ ដែលប្រកបមុខរបរដាំដំឡូងមី នៅទូទាំងខេត្តប៉ៃលិន បាននាំគ្នាប្រញាប់ធ្វើការប្រមូលផលមើមដំឡូង នៅតាមចំការរបស់ខ្លួន…
ខេត្តប៉ៃលិន ៖ រហូតមកដល់ថ្ងៃទី០៤ ខែកុម្ភៈ ឆ្នាំ២០២៦នេះ គេសង្កេតឃើញប្រជាពលរដ្ឋ ដែលប្រកបមុខរបរដាំដំឡូងមី នៅទូទាំងខេត្តប៉ៃលិន បាននាំគ្នាប្រញាប់ធ្វើការប្រមូលផលមើមដំឡូង នៅតាមចំការរបស់ខ្លួន ដើម្បីដឹកយកទៅលក់ឱ្យឈ្មួញតាមស្តង់នានាក្នុងខេត្ត ព្រោះតម្លៃទីផ្សារពេលនេះ ពិតជាស្ទុះហក់ឡើងខ្ពស់ខ្លាំង ដែលមិនធ្លាប់មានពីមុនមក ហើយធ្វើឱ្យពួកគាត់ម្នាក់ៗ សប្បាយរីករាយក្នុងចិត្តយ៉ាងខ្លាំង ។
បើតាមប្រភពព័ត៌មានពីលោក គឹម ឈៅ ជាកសិកររស់នៅក្នុងក្រុងប៉ៃលិន បានរៀបរាប់ឱ្យភ្នាក់ងារយើងដឹងថា នៅឆ្នាំ២០២៥កន្លងទៅ លោកបានដាំដំឡូងមី ចំនួន១០ហិកតា នៅលើដីចំការរបស់ខ្លួន គឺតាំងពីដាំរហូតមកដល់ប្រមូលផលជិត១ឆ្នាំមកហើយ ស្ថិតនៅក្នុងភូមិអូរប្រើស សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ក៏ត្រូវដល់ពេលវេលាត្រូវប្រមូលផលលក់ឱ្យឈ្មួញ នៅតាមស្តង់ក្នុងក្រុងប៉ៃលិន ដើម្បីយកថវិកាសងជំពាក់បំណុលគេ ។
លោកបានបន្តទៀតថា រហូតមកដល់ពេលនេះ លោកពិតជាសប្បាយរីករាយ ក្នុងចិត្តយ៉ាងខ្លាំង ព្រោះឃើញតម្លៃទីផ្សារដំឡូងមីស្រស់ពិតជាហក់ឡើងខ្ពស់ត្រដែត រហូតដល់១គីឡូក្រាម ឈ្មួញហ៊ានទិញ តម្លៃ ២៨០ ទៅ២៩០រៀល ខណៈដែលពីមុនឈ្មួញ ហ៊ានទិញត្រឹមតែ ១គីឡូក្រាម ១៥០ ទៅ២៥០រៀលប៉ុណ្ណោះ ដែលពិតជាធ្វើឱ្យលោក និងប្រជាពលរដ្ឋដទៃទៀត ទូទាំងខេត្តប៉ៃលិន មានការភ្ញាក់ផ្អើលយ៉ាងខ្លាំង ស្ទើរតែមិនជឿនោះឡើយ ហើយម្នាក់ៗខិតខំធ្វើការប្រមូលផល ដោយមិនខ្លាចនឿយហត់នោះឡើយ ដោយអស់ពីកន្លែងមួយចូលទៅប្រមូលផលនៅក្នុងចំការមួយផ្សេងទៀត។ ទោះបីជាយ៉ាងណា លោកក៏បានប្រមូលផលដឹកលក់នៅថ្ងៃនេះ បានចំនួន៤ ទៅ៥រថយន្តហើយដែរ ក៏នៅសល់ជាច្រើនហិកតាទៀត ត្រូវប្រមូលផលជាបន្តបន្ទាប់ ។
លោកបានបញ្ជាក់ទៀតថា តម្លៃទីផ្សារដំឡូងមីនាពេលនេះ ពិតជាធ្វើឱ្យភ្ញាក់ផ្អើលដោយនឹកស្មានមិនដល់ថា អាចស្ទុះហក់ឡើងរហូតដល់១គីឡូក្រាមជិត៣០០រៀលទាល់តែសោះ ព្រោះតម្លៃនេះបានឡើងជារៀងរាល់ថ្ងៃ ដែលធ្វើឱ្យកសិករម្នាក់ៗ ខិតខំស្ទុះស្ទារដើររកកម្មករចូលទៅប្រមូលផលនៅក្នុងចំការរៀងៗខ្លួន ទាំងទឹកមុខញញឹមពព្រាយបិទមាត់មិនជិតនោះឡើយ ។
លោកបានបន្ថែមទៀតថា ក្នុងការប្រមូលផល ត្រូវជួលកម្មករ ទាំងថ្លៃដកដំឡូង ទាំងថ្លៃលើកដាក់លើរថយន្ត គឺ១តោន ផ្តល់កម្រៃឱ្យកម្មករអស់ចំនួន៦ម៉ឺនរៀល ដែលជាថ្លៃឈ្នួលជួលថ្លៃជាងសព្វមួយដង គឺពីមុនថ្លៃឈ្នួលត្រឹមតែ១តោនអស់ថ្លៃ៣ទៅ៤ម៉ឺនរៀលប៉ុណ្ណោះ។ ទោះបីជាការជួលកម្មករអស់ថ្លៃខ្ពស់បន្តិចមែន តែការលក់ដូរមើមដំឡូងឥឡូវនេះ ពិតជាបានប្រាក់កម្រៃខ្ពស់ជាងមុនៗ ។
ចំណែកប្រជាពលរដ្ឋម្នាក់ទៀត ឈ្មោះ ម៉ៅ ភេទប្រុស បានឱ្យដឹងដែរថា លោកបានដាំដំឡូងមីចំនួន៥ហិកតា នៅភូមិប៉ាងរលឹម សង្កាត់អូរតាវ៉ៅ ហើយក៏បានជួលកម្មករឱ្យចូលទៅប្រមូលលក់ដូរនៅតាមស្តង់ ហើយលោកពិតជារីករាយយ៉ាងខ្លាំង ដោយឃើញតម្លៃទីផ្សារមើមដំឡូងនាដើមឆ្នាំថ្មីនេះ ឡើងខ្ពស់គួរឱ្យកត់សម្គល់។ លោកបន្តទៀតថា បើតម្លៃទីផ្សារនេះ នៅឋេរជាប់ជានិច្ច មិនដឹងជាម្នាក់ៗសប្បាយរីករាយក្នុងដួងចិត្តប៉ុណ្ណានោះទេ ព្រោះជាតម្លៃហួសពីការនឹកស្មាន ក៏មិនធ្លាប់មានពីមុនមកដែរ។ លោកក៏ជឿជាក់ថា ក្រោយពេលប្រមូលផលដំឡូងមីលក់រួច អាចនឹងសងជំពាក់គេគ្រប់គ្រាន់ ក៏អាចនឹងសល់ខ្លះទុកសម្រាប់បន្តធ្វើដើមទុនដាំដំឡូងសម្រាប់រដូវកាលថ្មីបន្តទៀតផងដែរ ៕
ចែករំលែកព័តមាននេះ