ខេត្តកំពង់ស្ពឺ៖ ស្ត្រីជាប្រពន្ធត្រូវបានកម្លាំងនគរបាលស្រុកភ្នំស្រួចធ្វើការឃាត់ខ្លួនបានភ្លាមៗ ខណៈដែលធ្វើសកម្មភាពយកកាំបិតផ្គាក់កាប់ទៅលើប្តីចំកខាងឆ្វេងបណ្តាលឱ្យរងរបួសធ្ងន់ធ្ងរ ព្រោះតែប្តីចោទប្រពន្ធថាលួចមានសាហាយស្មន់ ដោយទ្រាំនូវការចោទរបស់ប្តីលែងបានទាញកាំបិតកាប់តែម្តង។
ករណីហិង្សាក្នុងគ្រួសារ ប្រពន្ធទាញកាំបិតកាប់ប្ដីរងរបួសធ្ងន់ ត្រូវនគរបាលឃាត់បានកាលពីវេលាម៉ោង៨និង៣០នាទីព្រឹកថ្ងៃទី៤ ខែកុម្ភៈ ឆ្នាំ២០២៦ ស្ថិតនៅក្នុងភូមិតាំងរងៀង ឃុំមហាសាំង ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបាននិយាយឱ្យដឹងថា ស្ត្រីជនសង្ស័យដៃដល់ជាប្រពន្ធដែលយកកាំបិតកាប់ប្ដី មានឈ្មោះ ចែម កុសល់ អាយុ៤១ឆ្នាំ រស់នៅក្នុងភូមិតាំងរងៀង ឃុំមហាសាំង ស្រុកភ្នំស្រួច ខេត្តកំពង់ស្ពឺ ។ ចំណែកជនរងគ្រោះជាប្ដីឈ្មោះ នួន សំណាង អាយុ៤៨ឆ្នាំរស់នៅជាមួយគ្នាក្នុងភូមិ-ឃុំខាងលើ។
នគរបាលស្រុកភ្នំស្រួចបានបន្តថា នៅមុនពេលកើតហេតុ ជនរងគ្រោះជាប្តីកំពុងតែដេកនៅលើគ្រែក្នុងផ្ទះស្រាប់តែប្រពន្ធដែលជាជនដៃដល់បានទាញកាំបិតផ្គាក់ កាប់ទៅលើបុរសជាប្តីចំនួន០១កាំបិត ចំកផ្នែកខាងឆ្វេងបណ្ដាលឱ្យរងរបួសធ្ងន់ ត្រូវបានក្រុមគ្រួសារដឹកយកទៅសង្គ្រោះព្យាបាលនៅមន្ទីរពេទ្យភ្លាមៗ។ ក្រោយពេលធ្វើសកម្មភាពកាប់ប្តីរួច ជនសង្ស័យដៃដល់ជាប្រពន្ធក៏បានទម្លាក់កាំបិតនៅក្នុងផ្ទះ រួចហើយព្យាយាមរត់គេចទៅទិសខាងជើងសំងំពួកនៅក្នុងព្រៃ ត្រូវសមត្ថកិច្ចឃាត់ខ្លួនបាន។
ក្រោយឃាត់ខ្លួនជនសង្ស័យដៃដល់ជាប្រពន្ធ បានឆ្លើយសារភាពថាមូលហេតុដែលរូបខ្លួនចិត្តដាច់ទាញកាំបិតកាប់ទៅលើប្តីខ្លួនឯងនេះដោយសារតែប្ដីប្រចណ្ឌរូបខ្លួនថាលួចមានសាហាយស្មន់ ខ្លួនកើតចិត្តខឹងក៏ទ្រាំលែងបានទាញកាំបិតកាប់តែម្តងទៅ។
នគរបាលស្រុកភ្នំស្រួចបានបញ្ជាក់ថា ក្រោយឃាត់ខ្លួនស្ត្រីសង្ស័យដៃដល់ជាប្រពន្ធ រួមជាមួយនឹងវត្ថុតាងកាំបិតផ្គាក់ ត្រូវបានកសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ