អន្តរជាតិ ៖ តម្លៃមាសអន្តរជាតិបានកើនឡើងវិញ នៅថ្ងៃទី៤ ខែកុម្ភៈ ឆ្នាំ២០២៦ បន្ទាប់ពីដាំក្បាលចុះយ៉ាងគំហុក កាលពីប៉ុន្មានថ្ងៃមុន។ ការស្ទុះងើបឡើងវិញនេះ ដោយសារតម្រូវការកើនឡើងខ្លាំង…
អន្តរជាតិ ៖ តម្លៃមាសអន្តរជាតិបានកើនឡើងវិញ នៅថ្ងៃទី៤ ខែកុម្ភៈ ឆ្នាំ២០២៦ បន្ទាប់ពីដាំក្បាលចុះយ៉ាងគំហុក កាលពីប៉ុន្មានថ្ងៃមុន។ ការស្ទុះងើបឡើងវិញនេះ ដោយសារតម្រូវការកើនឡើងខ្លាំង ខណៈដែលភាពតានតឹងផ្នែកភូមិសាស្ត្រនយោបាយឡើងកម្តៅវិញរវាងសហរដ្ឋអាមេរិក និងប្រទេសអ៊ីរ៉ង់។ នេះបើតាមការចេញផ្សាយពីទីភ្នាក់សារព័ត៌មាន Reuters ។
មាសអន្តរជាតិបានហក់ឡើងដល់ ៥ ០៨៩ ដុល្លារក្នុង១អោន ឬ ៦ ១៣១ នៅព្រឹកថ្ងៃទី៤ ខែកុម្ភៈ ឆ្នាំ២០២៦ មុនរក្សាតម្លៃនៅត្រឹម ៥ ០៧៥ ដុល្លារ/អោន ឬ ៦ ១១៤ ដុល្លារ/តម្លឹង គិតត្រឹមម៉ោង ២ នាទីរសៀល (ម៉ោងនៅកម្ពុជា)។ មាសអន្តរជាតិបានបំបែកកំណត់ត្រាតម្លៃខ្ពស់បំផុតមិនធ្លាប់មានពីមុន ៥ ៥៩៤ ដុល្លារ/អោន ឬ ៦ ៧៣៩ ដុល្លារ/តម្លឹង កាលពីថ្ងៃព្រហស្បតិ៍សប្តាហ៍មុន។
អ្នកវិភាគជាន់ខ្ពស់នៅក្រុមហ៊ុន IndusInd Securities បានលើកឡើង មាសបានឡើងថ្លៃវិញដល់កម្រិតសំខាន់ ៥ ០០០ ដុល្លារ/អោន ដោយសារភាពតានតឹងខាងភូមិសាស្ត្រនយោបាយ បន្ទាប់ពីយោធាអាមេរិកបានបាញ់ទម្លាក់ដ្រូនរបស់អ៊ីរ៉ង់។ យោងតាមរបាយការណ៍ពីប្រព័ន្ធផ្សព្វផ្សាយអន្តរជាតិបានឱ្យដឹងថា យោធាអាមេរិក កាលពីថ្ងៃទី៣ ខែកុម្ភៈ បានបាញ់ទម្លាក់ដ្រូន១គ្រឿងរបស់អ៊ីរ៉ង់ ដែលបានហោះចូលទៅជិតនាវាផ្ទុកយន្តហោះ Abraham Lincoln នៅសមុទ្រអារ៉ាប់។ ដ្បិតការចរចានុយក្លេអ៊ែររវាងអាមេរិក និងអ៊ីរ៉ង់ត្រូវបានគេរំពឹងថា នឹងធ្វើឡើងនៅប្រទេសអូម៉ង់ នាថ្ងៃសុក្រសប្តាហ៍នេះ។
ងាកទៅប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ឯណោះវិញ កាលពីថ្ងៃទី៣ ខែកុម្ភៈ បានចុះហត្ថលេខាលើកិច្ចព្រមព្រៀងការចំណាយមួយ ដើម្បីបញ្ចប់ការបិទដំណើររដ្ឋាភិបាលអាមេរិកមួយផ្នែក ដែលបានពន្យារពេលការចេញផ្សាយរបាយការណ៍ទិន្នន័យការងារសំខាន់ៗ នៅសប្តាហ៍នេះ។ ស្របពេលវិនិយោគិនរំពឹងថានឹងមានការកាត់បន្ថយអត្រាការប្រាក់របស់ធនាគារកណ្តាលអាមេរិក (Fed) យ៉ាងហោចណាស់ ២ លើក នៅឆ្នាំ ២០២៦។
មាសដែលមិនផ្តល់ការប្រាក់ ជាធម្មតាតម្លៃតែងកើនឡើង អំឡុងពេលភាពតានតឹងភូមិសាស្ត្រនយោបាយសកល និងអត្រាការប្រាក់ទាប។ លោហៈដ៏មានតម្លៃមួយនេះ គឺជាទ្រព្យសកម្មដ៏មានសុវត្ថិភាពបំផុត អំឡុងពេលមានភាពមិនប្រាកដប្រជាសកល៕
ចែករំលែកព័តមាននេះ