រាជធានីភ្នំពេញ ៖ បុរសម្នាក់បានទុកម៉ូតូកង់បីរបស់គាត់១គ្រឿងនៅមុខផ្ទះដូចសព្វមួយដង បន្ទាប់មកគាត់ក៏បានចូលទៅដេកនៅក្នុងផ្ទះ ហើយក៏លង់លក់រហូតដល់ព្រឹកឡើង ទើបក្រោកពីដេករៀបចំខ្លួន ដើម្បីចេញទៅដឹកជ្រូកខ្វៃឲ្យម៉ូយ ស្រាប់តែស្រឡាំងកាំង ព្រោះតែចោរលួចយកទៅបាត់ ។…
រាជធានីភ្នំពេញ ៖ បុរសម្នាក់បានទុកម៉ូតូកង់បីរបស់គាត់១គ្រឿងនៅមុខផ្ទះដូចសព្វមួយដង បន្ទាប់មកគាត់ក៏បានចូលទៅដេកនៅក្នុងផ្ទះ ហើយក៏លង់លក់រហូតដល់ព្រឹកឡើង ទើបក្រោកពីដេករៀបចំខ្លួន ដើម្បីចេញទៅដឹកជ្រូកខ្វៃឲ្យម៉ូយ ស្រាប់តែស្រឡាំងកាំង ព្រោះតែចោរលួចយកទៅបាត់ ។
ហេតុការណ៍នោះបានបង្កឲ្យមានការភ្ញាក់ផ្អើលកាលពីវេលាម៉ោង៥និង៣០នាទីព្រឹកថ្ងៃទី៤ ខែកុម្ភៈ ឆ្នាំ២០២៦ នៅចំណុចមុខផ្ទះលេខ៦ ផ្លូវលេខ៤ បុរីស៊ុនតូនី ស្ថិតនៅក្នុងភូមិត្រពាំងថ្លឹង៤ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
បុរសនោះឈ្មោះសុខ សុផល អាយុ៤៥ឆ្នាំ មុខរបររត់ម៉ូតូកង់បី ប្រពន្ធឈ្មោះអុឹម ពៅ អាយុ៤៨ឆ្នាំ បច្ចុប្បន្នស្នាក់នៅផ្ទះកើតហេតុខាងលើ ចំណែកម៉ូតូកង់បីរបស់គាត់ដែលត្រូវចោរលួចយកទៅបាត់នោះពណ៍ស ពាក់ស្លាកលេខ ភ្នំពេញ 1IE-4059 ហើយគាត់ក៏បានទុកគាតគ្រីនិងអត្តសញ្ញាណប័ណ្ណ នៅក្នុងម៉ូតូកង់បីនោះផងដែរ ។
បុរសនោះនិងប្រពន្ធបានឱ្យដឹងថា នៅវេលាល្ងាចថ្ងៃទី០៣ ខែកុម្ភៈឆ្នាំ២០២៦ ក្រោយពេលត្រឡប់មពីដឹកម៉ូយវិញ គាត់បានទុកម៉ូតូកង់បីខាងលើនៅមុខផ្ទះដូចសព្វមួយដងដែរ រួចគាត់បានចូលទៅដេកនៅក្នុងផ្ទះ ។ ក្រោយមកក៏លង់លក់រហូតដល់វេលាម៉ោង៥និង៣០នាទីព្រឹកថ្ងៃទី០៤ ខែកុម្ភៈ ទើបភ្ញាក់ បន្ទាប់មកបានដើរទៅយកម៉ូតូកង់ ដើម្បីបើកចេញទៅដឹកជ្រូកខ្វៃឲ្យម៉ូយ ។ ខណៈនោះគាត់មានការភ្ញាក់ផ្អើលស្រឡាំងកាំងនិងតក់ស្លុតយ៉ាងខ្លាំង ព្រោះតែម៉ូតូកង់បីរបស់គាត់ ត្រូវបានចោរលួចយកទៅបាត់ស្រមោល មិនដឹងថាបាត់តាំងពីពេលណានោះឡើយ។
ម្ចាស់ម៉ូតូកង់បីរូបនោះបាននិយាយបន្តថា បន្ទាប់មកគាត់បានសុំឆែកមើលកាមេរ៉ាផ្ទះអ្នកជិតខាង ហើយបានឃើញចោរ២នាក់អត់មានបិទមុខទេ ដើរទៅធ្វើសកម្មភាពលួចម៉ូតូកង់បីរបស់គាត់ នៅវេលាម៉ោង៣និង១២ នាទីទាបភ្លឺថ្ងៃទី៤ ខែកុម្ភៈឆ្នាំ២០២៦ ។ មើលតាមរូបភាពវីដេអូកាមេរ៉ាសុវត្ថិភាពនោះ ទំរាំលួចយកទៅបានមានរយៈពេលជាង១០នាទី ហើយក្រុមចោរដេរបញ្ឆេះច្រើនដង ព្រមទាំងរុញផង ទើបឆេះនិងបើកចេញពីមុខផ្ទះគាត់ទៅបាន ។
ពួកគាត់បានត្អូញត្អែរថា គាត់គ្រួសារអត់ខ្លាំងណាស់ ហើយមានតែម៉ូតូកង់បី១គ្រឿងនោះទេ សម្រាប់រកស៊ីគ្រាន់បានប្រាក់ប្រចាំថ្ងៃ ចំណាយលើកូនរៀន និងបង់ធនាគារ ព្រមទាំងការហូបចុកផ្សេងៗ ប៉ុន្តែពេលនេះចោរលួចបាត់ទៀតតើឲ្យពួកគាត់រំពឹងលើអ្វីទៀត ។ ពួកគាត់ក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅទី១រួចហើយដែរដើម្បីឲ្យនគរបាលជួយស្វែងរកម៉ូតូកង់បីឲ្យគាត់វិញផង គាត់មិនអាចអត់វាបានទេ ព្រោះម៉ូតូកង់បីនេះហើយគឺជាទីពឹងសម្រាប់ពួកគាត់ ៕
ចែករំលែកព័តមាននេះ