រាជធានីភ្នំពេញ ៖ អភិបាលរងខណ្ឌ បានចុះត្រួតពិនិត្យរោងចក្រកាត់ដេរមួយកន្លែងនៅភូមិស្រែរាជ្ជៈ សង្កាត់សំរោងក្រោម ក្រោយពីមានបណ្តឹងតវ៉ាពីប្រជាពលរដ្ឋរឿងផ្សែង និងក្លិនអសោច ។ ជាក់ស្តែងរដ្ឋបាលខណ្ឌពោធិ៍សែនជ័យ បានប្រកាសនាព្រឹកថ្ងៃទី០៤…
រាជធានីភ្នំពេញ ៖ អភិបាលរងខណ្ឌ បានចុះត្រួតពិនិត្យរោងចក្រកាត់ដេរមួយកន្លែងនៅភូមិស្រែរាជ្ជៈ សង្កាត់សំរោងក្រោម ក្រោយពីមានបណ្តឹងតវ៉ាពីប្រជាពលរដ្ឋរឿងផ្សែង និងក្លិនអសោច ។
ជាក់ស្តែងរដ្ឋបាលខណ្ឌពោធិ៍សែនជ័យ បានប្រកាសនាព្រឹកថ្ងៃទី០៤ ខែកុម្ភៈ ឆ្នាំ២០២៦នេះថា ៖ រដ្ឋបាលខណ្ឌចុះអន្តរាគមន៍ភ្លាមៗ ក្រោយទទួលបានបណ្តឹងពីប្រជាពលរដ្ឋ រឿងផ្សែង និងក្លិនពីរោងចក្រមួយកន្លែង នៅភូមិស្រែរាជ្ជៈ សង្កាត់សំរោងក្រោម ។
ឆ្លើយតបទៅនឹងការបារម្ភរបស់បងប្អូនប្រជាពលរដ្ឋ ក្នុងសង្កាត់សំរោងក្រោម ថ្ងៃទី៣ ខែកុម្ភៈ ឆ្នាំ២០២៦ នេះ ក្រោមការចង្អុលបង្ហាញពីលោក សក់ ច័ន្ទកញ្ញារិទ្ធ អភិបាលនៃគណៈអភិបាលខណ្ឌពោធិ៍សែនជ័យ ដោយឱ្យលោក សំ សារ៉ាវុធ អភិបាលរងខណ្ឌពោធិ៍សែនជ័យសហការជាមួយមន្ទីរបរិស្ថាន ចុះត្រួតពិនិត្យរោងចក្រកាត់ដេរមួយកន្លែង នៅភូមិស្រែរាជ្ជៈ សង្កាត់សំរោងក្រោម ដែលបានយកកំទេចក្រណាត់មកដុតក្នុងឡចំហាយ បង្កជាផ្សែង និងក្លិនមិនល្អ រំខានដល់ការរស់នៅរបស់បងប្អូនរស់នៅជុំវិញ ។
ក្នុងនោះដែរជា លទ្ធផលត្រួតពិនិត្យ និងវិធានការរបស់សមត្ថកិច្ច៖
-ពិនិត្យឃើញថា ទីតាំងនេះពិតជាបង្កការបំពុលបរិស្ថាន
-ទីតាំងនេះបានដុតកំទេចក្រណាត់ដុតក្នុងឡចំហាយ បណ្ដាលឱ្យផ្សែងហុយ និងសាយភាយក្លិនមិនល្អ
-មានវិញ្ញាបនបត្របញ្ជាក់ការចុះឈ្មោះក្នុងបញ្ជីពាណិជ្ជកម្ម
-មិនមានច្បាប់អនុញ្ញាតសិប្បកម្ម និងច្បាប់បរិស្ថាន
ជាមួយគ្នានោះដែរ ក្រុមការងារបានធ្វើការណែនាំម្ចាស់ទីតាំងដូចខាងក្រោម ៖
-ត្រូវបញ្ឈប់ការដុតកំទេចក្រណាត់ ក្នុងឡចំហាយ
-ត្រូវស្នើសុំច្បាប់អនុញ្ញាតឱ្យបានត្រឹមត្រូវ
-ត្រូវទទួលរងការផាកពិន័យតាមច្បាប់
-ក្នុងករណីមិនអនុវត្តតាមការណែនាំ រដ្ឋបាលខណ្ឌនឹងចាត់វិធានការតាមផ្លូវច្បាប់ និងសុំគោលការណ៍ថ្នាក់លើផ្អាកការធ្វើអាជីវកម្មជាបណ្ដោះអាស្នន ៕
ចែករំលែកព័តមាននេះ