ខេត្តពោធិ៍សាត់ ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ កាលពីថ្ងៃទី៣០ ខែមករា ឆ្នាំ២០២៦…
ខេត្តពោធិ៍សាត់ ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ កាលពីថ្ងៃទី៣០ ខែមករា ឆ្នាំ២០២៦ បានអញ្ជើញជាអធិបតី ក្នុងពិធីប្រកាសចូលកាន់មុខតំណែងប្រធានមន្ទីរវប្បធម៌ និងវិចិត្រសិល្បៈខេត្តពោធិ៍សាត់ ដែលបានប្រារព្ធធ្វើនៅសាលាខេត្ត ដោយមានការអញ្ជើញចូលរួមពីលោក ខូយ រីដា អភិបាល នៃគណៈអភិបាលខេត្ត និងលោក ម៉ក់ រ៉ា ប្រធានក្រុមប្រឹក្សាខេត្ត ព្រមទាំងលោក លោកស្រី ជាប្រតិភូអមដំណើររដ្ឋមន្ត្រី និងថ្នាក់ដឹកនាំមន្ទីរអង្គភាព ក្នុងខេត្តជាច្រើនរូបទៀត ។
តាមអនុក្រឹត្យរបស់រាជរដ្ឋាភិបាល ចុះថ្ងៃទី២៣ ខែធ្នូ ឆ្នាំ២០២៥ បានសម្រេចតែងតាំតលោក អ៊ុក រក្សា មន្ត្រីថ្នាក់លេខ២ នៃក្របខណ្ឌមន្ត្រីគ្រប់គ្រងរដ្ឋបាល ជាប្រធានមន្ទីរវប្បធម៌ និងវិចិត្រសិល្បៈខេត្តពោធិ៍សាត់ ជំនួសលោក ឡាច ផេងលី ដែលបានចូលនិវត្តន៍ ។
លោក ខូយ រីដា និងលោកជំទាវបណ្ឌិតសភាចារ្យ ភឿង សកុណា បានថ្លែងកោតសរសើរ និងវាយតម្លៃខ្ពស់ចំពោះថ្នាក់ដឹកនាំ នឹងមន្ត្រីរាជការគ្រប់ផ្នែកនៃមន្ទីរវប្បធម៌ និងវិចិត្រសិល្បៈខេត្ត ដែលកន្លងមក បានខិតខំប្រឹងប្រែង បំពេញតួនាទីភារកិច្ចរបស់ខ្លួន ប្រកបដោយមនសិកា ឆន្ទៈ ក្រមសីលធម៌ និងស្មារតីទទួលខុសត្រូវខ្ពស់ ស្របតាមគោលការណ៍ផែនការយុទ្ធសាស្ត្ររបស់ក្រសួង ទិសដៅការងាររបស់រដ្ឋបាលខេត្ត និងផែនការការងាររបស់មន្ទីរ ដោយទទួលបានលទ្ធផលល្អប្រសើរជាបន្តបន្ទាប់។ ទន្ទឹមនេះ ក៏បានកោតសរសើរលោក ឡាច ផេងលី អតីតប្រធានមន្ទីរ ដែលបានចូលនិវត្តន៍ ដែលក្នុងរយៈពេលកន្លងមកនេះ បានខិតខំយកចិត្តទុកដាក់ អនុវត្តតួនាទី ភារកិច្ច និងការទទួលខុសត្រូវ ធ្វើការគ្រប់គ្រងដឹកនាំ និងបម្រើអង្គភាពមានការអភិវឌ្ឍរីកចម្រើន ប្រកបដោយភាពសុខដុមរមនា និងចូលរួមចំណែកយ៉ាងសកម្មជាមួយរដ្ឋបាលខេត្ត ក្នុងការថែរក្សាការពារបានយ៉ាងគត់ម៉ត់ នូវទីតាំងទួលបុរាណនានា តាមរយៈការខិតខំប្រឹងប្រែង ដឹកនាំការងារ កំណត់ចំណុចនិយាមការ និងបោះបង្គោលកំណត់ដែនរក្សាការពារទីទួលបុរាណ ព្រមទាំងបានរៀបចំចុះបញ្ជីធ្វើប្លង់កម្មសិទ្ធិបុរាណដ្ឋាន និងទីទួលបុរាណ ដើម្បីថែរក្សាការពារឲ្យបានគង់វង្ស ទប់ស្កាត់ពីការចូលកាន់កាប់ និងរំលោភបំពានផ្សេងៗ។ ការតែងតាំងនិងផ្លាស់ប្ដូរមុខតំណែងនាពេលនេះ គឺជាដង្ហើមរដ្ឋបាលធម្មតា ដើម្បីពង្រឹងប្រសិទ្ធិភាពការងារ និងផ្ដល់ឱកាសដល់មន្ត្រីដែលមានសមត្ថភាព បន្តវេនដឹកនាំក្នុងស្មារតីទទួលខុសត្រូវខ្ពស់ ។
ក្រោមការដឹកនាំរបស់មន្ទីរកន្លងមក ក៏ឃើញថា មានសកម្មភាពរស់រវើកផងដែរ តាមរយៈការនិពន្ធនិងដឹកនាំសម្តែង នៅតាមព្រឹត្តិការណ៍និងកម្មវិធីនានា។ ទាំងអស់នេះគឺសុទ្ធសឹងជាសកម្មភាពចូលរួមថែរក្សា លើកតម្កើង អភិវឌ្ឍន៍ សិល្បៈ វប្បធម៌ និងការការពារបេតិកភណ្ឌជាតិ ស្របតាមយុទ្ធសាស្ត្រ និងកម្មវិធីនយោបាយ គ្រប់ដំណាក់កាលរបស់រាជរដ្ឋាភិបាល និងជាមូលដ្ឋានសមិទ្ធផល សម្រាប់ថ្នាក់ដឹកនាំនិងមន្ត្រីរាជការ នៃមន្ទីរវប្បធម៌និងវិចិត្រសិល្បៈរបស់យើង បន្តធ្វើការពង្រឹងពង្រីកឲ្យបានកាន់ប្រសើរថែមទៀត ។
លោកជំទាវ ភឿង សកុណា បានផ្ដល់អនុសាសន៍សំខាន់ៗ ដល់លោកប្រធានមន្ទីរ ដែលទើបតែងតាំងថ្មី និងលោក លោកស្រីមន្ត្រីរាជការទាំងអស់ នៃមន្ទីរវប្បធម៌និងវិចិត្រសិល្បៈខេត្តពោធិ៍សាត់ ត្រូវសាមគ្គីផ្ទៃក្នុង ខិតខំសិក្សា និងថែរក្សាប្រពៃណីវប្បធម៌ជាតិ ទាំងរូបិយនិងអរូបិយកុំឱ្យមានការបំភ្លេចបំផ្លាញ ពីព្រោះវប្បធម៌ខ្មែរគឺជាដួងព្រលឹងជាតិយើងទាំងមូល។អ្នកបំផ្លាញវប្បធម៌ខ្មែរគឺត្រូវមានទុក្ខតាមច្បាប់។ ជនណាបំផ្លាញប្រាសាទបុរាណខ្មែរ ជននោះត្រូវ ចុះនរក32ជាន់ រហូតដល់បាត់ថ្ងៃរះនិងបាត់ព្រះចន្ទ័រះ ៕
ចែករំលែកព័តមាននេះ