ទីក្រុងវ៉ាស៊ីនតោន៖ លោកដូណាល់ត្រាំកំពុងពិចារណាប្រើកងកម្លាំងពិសេសវាយលុកចូលប្រទេសអ៊ីរ៉ង់ នេះបើយោងតាមការផ្សាយរបស់សារព័ត៌មាន។ នៅក្នុងចំណោមសេណារីយោដ៏ប្រថុយប្រថាន និងគ្រោះថ្នាក់បំផុតដែលលោកត្រាំ និងមន្ត្រីក្រោមឱវាទកំពុងពិភាក្សាគ្នានោះមានចំណុចមួយនិយាយអំពីការបញ្ជូនកងកុម្ម៉ង់ដូពិសេសទៅវាយកម្ទេចទីតាំងនុយក្លេអ៊ែររបស់អ៊ីរ៉ង់ដែលគេចផុតពីការវាយប្រហារកាលពីខែមិថុនា ឆ្នាំមុន។
សារព័ត៌មានញូយ៉កថាមស៍ (The New York Times) ចុះផ្សាយថាលោកត្រាំកំពុងពិចារណាសេណារីយោយោធាមួយចំនួនដែលក្រសួងការពារជាតិបានដាក់ជូនលោកពិនិត្យ និងសម្រេច។ នៅក្នុងចំណោមនោះក៏មានសេណារីយោមួយនិយាយពីការវាយឆ្មក់ផងដែរ។ ប៉ុន្តែលោកមិនទាន់ចង់ប្រើធម៌ក្ដៅដាក់អ៊ីរ៉ង់នៅពេលនេះទេ។ លោកនៅតែបើកទូលាយជានិច្ចសម្រាប់ការចរចាគ្នាតាមមធ្យោបាយការទូត។
យោងតាមប្រភពដែលដឹងកិច្ចការនេះ លោកត្រាំត្រូវមន្ត្រីក្រោមឱវាទបង្ហាញជូនជម្រើសយ៉ាងច្រើនសន្ធឹកសន្ធាប់ពាក់ព័ន្ធនឹងគម្រោងវាយប្រហារអ៊ីរ៉ង់។ ការវាយប្រហារលើកនេះផ្ដោតសំខាន់ទៅលើទីតាំងនុយក្លេអ៊ែរ និងមីស៊ីលរបស់អ៊ីរ៉ង់។ ក្រៅពីផែនការវាយប្រហារទីតាំងនុយក្លេអ៊ែរដែលនៅស្អាតល្អ ផែនការមួយទៀតគឺការវាយប្រហារទីតាំងទាំងឡាយណាដែលមានទំនាក់ទំនងជាមួយថ្នាក់ដឹកនាំកំពូលៗរបស់អ៊ីរ៉ង់។ មានន័យថាបង្កើតភាពចលាចលផ្ទៃក្នុង ហើយផ្លាស់ប្ដូររបបដឹកនាំ។
ចំណែកអ៊ីស្រាអែលកំពុងនិយាយបញ្ចុះបញ្ចូលឱ្យទីក្រុងវ៉ាស៊ីនតោនកំណត់ទីតាំងដែលពាក់ព័ន្ធនឹងកម្មវិធីមីស៊ីលរបស់អ៊ីរ៉ង់។ ទន្ទឹមនឹងនោះ មន្ត្រីរដ្ឋាភិបាលអាមេរិកចង់បញ្ជាក់ថារហូតមកដល់ពេលនេះ លោកត្រាំមិនទាន់សម្រេចជ្រើសរើសយកប្រតិបត្តិការសឹកណាមួយនៅឡើយទេ។ ប្រភពខ្លះថាលោកត្រាំប្រើភាសាគំរាមកំហែងដើម្បីបង្ខំឱ្យអ៊ីរ៉ង់ចូលតុចរចា។
កាលពីមុននេះ លោកត្រាំថ្លែងថានាវាចម្បាំងរបស់អាមេរិកកំពុងបើកសំដៅទៅប្រទេសអ៊ីរ៉ង់។ លោកសង្ឃឹមថាអ៊ីរ៉ង់នឹងវិលទៅរកតុចរចាដើម្បីសម្រេចឱ្យបានកិច្ចព្រមព្រៀងដែលយុត្តិធម៌ និងសមតា។ មានន័យថាអ៊ីរ៉ង់ត្រូវតែបោះបង់ចោលទាំងស្រុងនូវកម្មវិធីនុយក្លេអ៊ែររបស់ខ្លួន។ លោកត្រាំបាននិយាយរំលឹកទៅដល់ព្រឹត្តិការណ៍កាលពីខែមិថុនានៅពេលកងទ័ពអាកាសអាមេរិកទម្លាក់គ្រាប់បែកលើទីតាំងនុយក្លេអ៊ែររបស់អ៊ីរ៉ង់។ លោកព្រមានថាការវាយប្រហារលើកក្រោយនឹងមានសភាពខ្លាំងក្លាជាងពេលនោះឆ្ងាយណាស់។ ដូច្នេះ សូមកុំឱ្យរឿងនេះកើតឡើងឱ្យសោះ៕ ប្រភព៖ ទីភ្នាក់ងារព័ត៌មានតាស់ (TASS) និងប្រភពដទៃទៀត
ចែករំលែកព័តមាននេះ