រាជធានីភ្នំពេញ ៖ ការចូលរួមចំណែកសង្គ្រោះបរិស្ថាន មិនមែនជារឿងដែលត្រូវរង់ចាំធ្វើកិច្ចការធំដុំនោះទេ ប៉ុន្តែវាផ្តើមចេញពីសកម្មភាពតូចបំផុតមួយ គឺការបដិសេធមិនប្រើប្រាស់ប្លាស្ទិកដែលមិនចាំបាច់ ។ ជាក់ស្តែងមន្ទីរបរិស្ថានខេត្តពោធិ៍សាត់ បានប្រកាសនាថ្ងៃទី២៨ ខែមករានេះថា…
រាជធានីភ្នំពេញ ៖ ការចូលរួមចំណែកសង្គ្រោះបរិស្ថាន មិនមែនជារឿងដែលត្រូវរង់ចាំធ្វើកិច្ចការធំដុំនោះទេ ប៉ុន្តែវាផ្តើមចេញពីសកម្មភាពតូចបំផុតមួយ គឺការបដិសេធមិនប្រើប្រាស់ប្លាស្ទិកដែលមិនចាំបាច់ ។
ជាក់ស្តែងមន្ទីរបរិស្ថានខេត្តពោធិ៍សាត់ បានប្រកាសនាថ្ងៃទី២៨ ខែមករានេះថា ៖ ការផ្លាស់ប្តូរដ៏អស្ចារ្យសម្រាប់បរិស្ថាន គឺចាប់ផ្តើមចេញពីការបដិសេធដ៏សាមញ្ញបំផុតមួយ គឺការនិយាយថា «ទេ» ចំពោះការប្រើប្រាស់ប្លាស្ទិកដែលមិនចាំបាច់ ។
តើអ្នកដឹងទេថា ៖ រាល់ការទិញទំនិញ យើងតែងតែប្រើថង់ប្លាស្ទិកថ្មីៗ ប៉ុន្តែថង់ប្លាស្ទិកមួយ អាចចំណាយពេលជាច្រើនសតវត្សន៍ដើម្បីរលាយ ។ ក្នុងរយៈពេល១ឆ្នាំ អ្នកអាចប្រើថង់ប្លាស្ទិកជាង ១.០០០ថង់ ប្រសិនបើមិនប្រើថង់ផ្ទាល់ខ្លួន ឬបដិសេធទទួលថង់ប្លាស្ទិកថ្មីៗ ។
ការរួមចំណែកការពារបរិស្ថាន តាមរយៈការមិនទទួលយកថង់ប្លាស្ទិក មិនត្រឹមតែជួយឱ្យសហគមន៍យើងមានភាពស្អាតប៉ុណ្ណោះទេ ប៉ុន្តែថែមទាំងជួយការពារជីវៈចម្រុះដ៏សម្បូរបែប និងធានាបាននូវខ្យល់អាកាសបរិសុទ្ធសម្រាប់មនុស្សគ្រប់រូប ។ នៅពេលដែលយើងម្នាក់ៗ ចាប់ផ្តើមផ្លាស់ប្តូរទម្លាប់តូចៗ ដោយការប្រើប្រាស់កាបូបយួរ ដែលប្រើប្រាស់បានយូរអង្វែងជំនួសថង់ប្លាស្ទិក យើងកំពុងចូលរួមចំណែកយ៉ាងសំខាន់ក្នុងយុទ្ធសាស្ត្រចក្រាវិស័យបរិស្ថាន ដើម្បីសម្រេចបាននូវភាពស្អាត ភាពបៃតង និងចីរភាព ។
ចូរយើងរួមគ្នាប្រើប្រាស់សិទ្ធិ ក្នុងការបដិសេធប្លាស្ទិកនៅថ្ងៃនេះ ដើម្បីកសាងមាតុភូមិកម្ពុជាឱ្យមានមេឃពណ៌ខៀវ និងបរិស្ថានស្រស់បំព្រងសម្រាប់កូនចៅយើងតរៀងទៅ ៕
ចែករំលែកព័តមាននេះ