ទីក្រុងហាណូយ៖ ថ្ងៃនេះ វៀតណាម និងសហភាពអឺរ៉ុបប្រកាសអំពីការអភិវឌ្ឍទំនាក់ទំនងដល់កម្រិតភាពជាដៃគូយុទ្ធសាស្ត្រគ្រប់ជ្រុងជ្រោយ។ ការសម្រេចបានសមិទ្ធផលនេះកើតឡើងចំពេលដែលភាគីទាំង២ខិតខំកែសម្រួលរបៀបធ្វើពាណិជ្ជកម្មរបស់ខ្លួនទប់ទល់នឹងការកកស្ទះចរន្តសាច់ប្រាក់ជាសាកលដោយសារការដំឡើងពន្ធគយរបស់អាមេរិក។ តាមរយៈការអភិវឌ្ឍទំនាក់ទំនងនេះ មានន័យថាអឺរ៉ុបមានទំនាក់ទំនងការទូតកម្រិតខ្ពស់បំផុតស្មើនឹងអាមេរិក ចិន និងរុស្ស៊ី។
ប្រធានក្រុមប្រឹក្សាអឺរ៉ុប លោកអង់តូនីញ៉ូ កូស្តា (António Costa) កំពុងបំពេញទស្សនកិច្ចនៅវៀតណាម។ លោកថ្លែងថានៅក្នុងស្ថានភាពដែលសណ្ដាប់ធ្នាប់ពិភពលោកកំពុងតែរញ៉េរញ៉ៃ យើងចាំបាច់ត្រូវឈរប្រកៀកស្មាគ្នាក្នុងនាមជាដៃគូដែលគួរឱ្យជឿទុកចិត្ត ហើយអាចប៉ាន់ស្មានដឹង។ លោកថាភាពជាដៃគូចង់សំដៅទៅលើការអភិវឌ្ឍវិបុលភាពសម្រាប់ទាំងអស់គ្នា។
លោកកូស្តាធ្វើដំណើរទៅដល់ទីក្រុងហាណូយបន្ទាប់ពីលោកធ្វើដំណើរចាកចេញពីប្រទេសឥណ្ឌា។ ឥណ្ឌា និងសហភាពអឺរ៉ុបទើបតែសម្រេចបានកិច្ចព្រមព្រៀងពាណិជ្ជកម្មជាមួយគ្នាកាលពីថ្ងៃអង្គារបន្ទាប់ពីចរចាគ្នាជិតពីរទសវត្ស។ ប្រធានាធិបតីវៀតណាម លោកលួងកួង (Luong Cuong) ចាត់ទុកការឈានដល់កិច្ចព្រមព្រៀងលើកនេះជាគោលចារិកជាប្រវត្តិសាស្ត្រ។ សេចក្ដីប្រកាសអំពីការអភិវឌ្ឍទំនាក់ទំនងជាយុទ្ធសាស្ត្រនេះកើតឡើងបន្ទាប់ពីវៀតណាមទើបតែបោះឆ្នោតជ្រើសរើសលោកតូឡាមឱ្យធ្វើជាអគ្គលេខាធិការបក្សកុម្មុយនិស្តវៀតណាមរយៈពេល៥ឆ្នាំទៅមុខទៀត។
លោកតូឡាមជាអ្នកកំណែទម្រង់និយមដែលបានជម្រុះចោលរបៀបធ្វើការបែបការិយាល័យនិយម (មានច្បាប់ទម្លាប់ច្រើន, មានឋានានុក្រមច្រើន)។ លោកបានជម្រុះចោលបុគ្គលិករដ្ឋរាប់ម៉ឺននាក់ ហើយធ្វើឱ្យពួកគេអត់ការងារធ្វើ។ លោកក៏ជាអ្នកធ្វើកំណែទម្រង់សេដ្ឋកិច្ចផងដែរ។ លោកដាក់ផែនការធ្វើយ៉ាងណាត្រូវតែមានកំណើនជីឌីភីប្រចាំឆ្នាំលើសពី១០%ចាប់ពីឆ្នាំនេះដល់ឆ្នាំ២០៣០។
វៀតណាមសង្ឃឹមថាបើសិនសេដ្ឋកិច្ចរបស់ខ្លួនចេះតែមានកំណើនល្អដូចសព្វថ្ងៃនេះ មិនយូរទេត្រឹមឆ្នាំ២០៤៥ខាងមុខនេះ ខ្លួននឹងក្លាយជាប្រទេសអ្នកមាន។ ឥឡូវនេះ វៀតណាមកំពុងសម្លឹងមើលទីផ្សារនៅប្រទេសដទៃដើម្បីកាត់បន្ថយការពឹងផ្អែកតែទៅលើការនាំចេញទំនិញទៅលក់នៅអាមេរិក។ សព្វថ្ងៃនេះ ទំនិញវៀតណាម៣០%នាំទៅលក់នៅអាមេរិក៕ ប្រភព៖ អេភី និងប្រភពដទៃទៀត
ចែករំលែកព័តមាននេះ