រាជធានីភ្នំពេញ ៖ សម្ដេចតេជោ ហ៊ុន សែន ប្រធានព្រឹទ្ធសភា បានគូសរំលេចពាក់ព័ន្ធនឹងឧក្រិដ្ឋកម្មបទល្មើសបច្ចេកវិទ្យានេះថា សកម្មភាពដែលកម្ពុជាបង្ក្រាបនូវឧក្រិដ្ឋកម្មបទល្មើសបច្ចេកវិទ្យាយ៉ាងសកម្មនៅពេលនេះ គឺចង់បង្ហាញជាសារទៅកាន់ឧក្រិដ្ឋជនទាំងឡាយ ដែលចង់មកប្រព្រឹត្តឧក្រិដ្ឋកម្មនៅប្រទេសកម្ពុជាថា…
រាជធានីភ្នំពេញ ៖ សម្ដេចតេជោ ហ៊ុន សែន ប្រធានព្រឹទ្ធសភា បានគូសរំលេចពាក់ព័ន្ធនឹងឧក្រិដ្ឋកម្មបទល្មើសបច្ចេកវិទ្យានេះថា សកម្មភាពដែលកម្ពុជាបង្ក្រាបនូវឧក្រិដ្ឋកម្មបទល្មើសបច្ចេកវិទ្យាយ៉ាងសកម្មនៅពេលនេះ គឺចង់បង្ហាញជាសារទៅកាន់ឧក្រិដ្ឋជនទាំងឡាយ ដែលចង់មកប្រព្រឹត្តឧក្រិដ្ឋកម្មនៅប្រទេសកម្ពុជាថា កម្ពុជាមិនមែនជាទីសុវត្ថិភាពរបស់ពួកគេក្នុងការប្រព្រឹត្តឧក្រិដ្ឋកម្មនោះឡើយ ក៏ប៉ុន្ដែកម្ពុជា គឺជាឋាននរកនៃឧក្រិដ្ឋជនទាំងឡាយ នៅពេលដែលពួកគេមកដល់ប្រទេសកម្ពុជា គឺកម្ពុជាជាឋាននរកសម្រាប់ពួកគេ ។
នេះបើតាមការឱ្យដឹងរបស់ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម Kim Changyong ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋកូរ៉េប្រចាំកម្ពុជា ចូលជួបសម្ដែងការគួរសម និងពិភាក្សាការងារ នាព្រឹកថ្ងៃទី២៩ ខែមករា ឆ្នាំ២០២៦ នៅវិមានសាមគ្គីភាព នៃព្រឹទ្ធសភា ។
ក្នុងជំនួបនេះ សម្ដេចតជោ ហ៊ុន សែន បានលើកឡើងទាក់ទងនឹងឧក្រិដ្ឋកម្មបទល្មើសបច្ចេកវិទ្យា (online scams) ដោយក្នុងនោះសម្ដេចតេជោបានកោតសរសើរចំពោះការខិតខំប្រឹងប្រែងរបស់ក្រុមការងារចម្រុះរវាងសាធារណរដ្ឋកូរ៉េ និងកម្ពុជា ក្នុងការបង្ក្រាបឧក្រិដ្ឋកម្មបទល្មើសបច្ចេកវិទ្យាដែលទទួលបានលទ្ធផលល្អប្រសើរជាបន្តបន្ទាប់ ។ សម្ដេចតេជោ ក៏ឆ្លៀតចូលរួមរំលែកទុក្ខចំពោះករណីនិស្សិតកូរ៉េខាងត្បូង ដែលត្រូវបានឧក្រិដ្ឋជនធ្វើទារុណកម្ម ហើយបានស្លាប់នៅកម្ពុជា ។ ទន្ទឹមនេះ សម្ដេចតេជោក៏បានសម្ដែងនូវការសោកស្ដាយ និងចូលរួមរំលែកនូវមរណទុក្ខយ៉ាងក្រៀមក្រំចំពោះរឿងនេះ ។
យ៉ាងណាក៏ដោយ សម្ដេចតេជោបានចោទជាសំណួរទៅកាន់ឯកឧត្តម ឯកអគ្គរដ្ឋទូតកូរ៉េខាងត្បូង ដោយឱ្យភាគីកូរ៉េចែករំលែក និងផ្ដល់ព័ត៌មានដែលមានពាក់ព័ន្ធនឹងឧក្រិដ្ឋជននៃបទល្មើសបច្ចេកវិទ្យាដែលបានសម្លាប់និស្សិតកូរ៉េខាងត្បូងនៅក្នុងប្រទេសកម្ពុជា ប៉ុន្ដែត្រូវបានចាប់ខ្លួននៅក្នុងប្រទេសថៃ។
ត្រង់ចំណុចនេះ សម្ដេចតេជោ មានការចម្លែកចិត្តថា ហេតុអ្វីឧក្រិដ្ឋជនអាចបោកប្រាស់និស្សិតកូរ៉េខាងត្បូង មកសម្លាប់នៅក្នុងប្រទេសកម្ពុជា បានហើយបែរជាត្រូវបានចាប់ខ្លួនឧក្រិដ្ឋជននោះនៅលើទឹកដីប្រទេសថៃទៅវិញ។ ដូច្នេះហើយ សម្ដេចតេជោ ប្រធានព្រឹទ្ធសភា ចង់ឱ្យភាគីកូរ៉េចែករំលែកព័ត៌មាន ដើម្បីធានានូវតម្លាភាពនៃករណីនេះ ពីព្រោះកម្ពុជា ក៏ត្រូវឈ្វេងយល់បន្ថែមអំពីរឿងនេះថា តើមានស្ថានភាព និងកម្រិតនៃរឿងមានទំនាក់ទំនងស៊ីជម្រៅកម្រិតណា ដើម្បីឈានទៅរកការដោះស្រាយបញ្ហា ជាពិសេស គឺការប្រយុទ្ធប្រឆាំងបទល្មើសបច្ចេកវិទ្យានេះឱ្យមានប្រសិទ្ធភាព ។
ជាមួយគ្នានេះ សម្ដេចតេជោបានលើកឡើងថា ប្រទេសថៃនឹងកូរ៉េខាងត្បូង មានទំនាក់ទំនង និងសហការគ្នាយ៉ាងល្អក្នុងការបង្ក្រាបឧក្រិដ្ឋកម្មបទល្មើសបច្ចេកវិទ្យានេះ ដូច្នេះ សម្ដេចចង់ឱ្យភាគីកូរ៉េខាងត្បូងសហការចែករំលែកព័ត៌មានទាក់ទងនឹងការសម្លាប់និស្សិតកូរ៉េខាងត្បូងនៅលើទឹកដីកម្ពុជា តែឧក្រិដ្ឋជននោះត្រូវបានចាប់ខ្លួននៅលើទឹកដីប្រទេសថៃ ។ ទាក់ទងទៅនឹងការលើកឡើងរបស់សម្ដេចតេជោ ពាក់ព័ន្ធទៅនឹងឧក្រិដ្ឋកម្មបទល្មើសបច្ចេកវិទ្យា ឯកឧត្តមឯកអគ្គរដ្ឋទូតសាធារណរដ្ឋកូរ៉េ បានអរគុណចំពោះកម្ពុជាដែលបានសហការយ៉ាងល្អជាមួយកូរ៉េខាងត្បូង ដោយបានបង្កើតជាក្រុមការងារចម្រុះរវាងប្រទេសទាំងពីរកាលពីខែវិច្ឆិកា ឆ្នាំ២០២៥កន្លងទៅ ហើយបានធ្វើការងារយ៉ាងល្អជាមួយគ្នា។
ឯកឧត្តមឯកអគ្គរដ្ឋទូតបានរំលេចដែរថា ឯកឧត្ដមប្រធានាធិបតីកូរ៉េខាងត្បូង ក៏បានសរសើរចំពោះការខិតខំប្រឹងប្រែងរបស់ក្រុមការងារចម្រុះរវាងកម្ពុជា និងកូរ៉េខាងត្បូង ក្នុងការបង្ក្រាបបទល្មើសបច្ចេកវិទ្យានេះផងដែរ ។ ទាក់ទងនឹងការលើកឡើងរបស់សម្ដេចតេជោ ហ៊ុន សែន ចង់ឱ្យមានការចែករំលែកព័ត៌មានអំពីការបង្ក្រាបឧក្រិដ្ឋជនបទល្មើសបច្ចេកវិទ្យា ដែលបានសម្លាប់និស្សិតកូរ៉េខាងត្បូង នៅលើទឹកដីថៃនោះ ឯកឧត្តមឯកអគ្គរដ្ឋទូតបានបញ្ជាក់ថា ឯកឧត្តម នឹងរាយការណ៍ទៅកាន់រដ្ឋាភិបាលកូរ៉េខាងត្បូងបន្ថែមទៀតចំពោះការលើកឡើងរបស់សម្ដេចតេជោ ហើយឯកឧត្តមសង្ឃឹមថា ភាគីកម្ពុជា កូរ៉េខាងត្បូង និងថៃ នឹងធ្វើការសហការគ្នាបន្ថែមទៀត ក្នុងការបង្ក្រាបឧក្រិដ្ឋកម្មបទល្មើសបច្ចេកវិទ្យានេះ។
ក្នុងឱកាសនោះ ឯកឧត្តមឯកអគ្គរដ្ឋទូតក៏បានរំលេចបន្ថែមអំពីការយកចិត្តទុកដាក់យ៉ាងខ្លាំងអំពីសំណាក់រាជរដ្ឋាភិបាលកម្ពុជា ជាពិសេស គឺសម្ដេចធិបតី ហ៊ុន ម៉ាណែត នាយករដ្ឋមន្ដ្រី ដែលបានខិតខំប្រឹងប្រែងក្នុងការសហការលើការបង្ក្រាបឧក្រិដ្ឋកម្មបទល្មើសបច្ចេកវិទ្យានេះ។ ឯកឧត្តមឯកអគ្គរដ្ឋទូត ក៏បានអរគុណចំពោះសម្ដេចតេជោ ហ៊ុន សែន ដែលបានចូលរួមរំលែកមរណទុក្ខចំពោះនិស្សិតកូរ៉េខាងត្បូងដែលត្រូវបានឧក្រិដ្ឋជនសម្លាប់នៅក្នុងប្រទេសកម្ពុជា។
សម្ដេចតេជោប្រធានព្រឹទ្ធសភា បានបញ្ជាក់បន្ថែមទៅកាន់ឯកឧត្តម ឯកអគ្គរដ្ឋទូតសាធារណរដ្ឋកូរ៉េថា សកម្មភាពនៃការបង្ក្រាបបទល្មើសបច្ចេកវិទ្យា គឺកម្ពុជាកំពុងតែធ្វើការយ៉ាងសកម្ម ដោយធ្វើការសហការជាមួយបណ្ដាប្រទេសពាក់ព័ន្ធ ពីព្រោះបញ្ហាឧក្រិដ្ឋកម្មបទល្មើសបច្ចេកវិទ្យានេះ មិនមែនជាបញ្ហាកម្ពុជាដោយឡែកនោះទេ ក៏ប៉ុន្ដែវាជាបញ្ហាតំបន់ និងក្លាយទៅជាបញ្ហារបស់សកលលោកទាំងមូល។ ដូច្នេះ តម្រូវឱ្យមានការសហការជាអន្តរប្រទេស ៕
ចែករំលែកព័តមាននេះ