ទីក្រុងប៉េកាំង៖ ថ្ងៃនេះ អាជ្ញាធរចិនប្រហារជីវិតទណ្ឌិត១១នាក់ដែលជាប់ពាក់ព័ន្ធនឹងក្រុមបងធំមីយ៉ាន់ម៉ា។ ក្នុងនោះមានសមាជិកសំខាន់ៗរបស់ពួកគេមួយចំនួនជាប់ពាក់ព័ន្ធនឹងអំពើឆបោកតាមអនឡាញ។ នេះបើយោងតាមការផ្សាយរបស់ប្រព័ន្ធផ្សព្វផ្សាយជាផ្លូវរដ្ឋរបស់ចិន។ អ្នកទាំង១១នេះជាក្រុមអ្នកលេងដែលមានមូលដ្ឋាននៅប្រទេសមីយ៉ាន់ម៉ាភាគខាងជើង។
ទីភ្នាក់ងារព័ត៌មានស៊ីនហួរាយការណ៍ថាអ្នកទាំង១១នេះត្រូវបានតុលាការផ្ដន្ទាទោសប្រហារជីវិតកាលពីខែកញ្ញា ឆ្នាំ២០២៥។ ការប្រហារជីវិតធ្វើឡើងដោយតុលាការនៅទីក្រុងវឹនចូវ (Wenzhou) ខេត្តសឺជាំង (Zhejiang)។ ប៉ុន្មានឆ្នាំចុងក្រោយនេះ ប្រទេសចិនបង្កើនកិច្ចសហការជាមួយបណ្ដាប្រទេសនៅអាស៊ីអាគ្នេយ៍ដើម្បីបង្ក្រាបមជ្ឈមណ្ឌលឆបោក។ ជាលទ្ធផល ជនសង្ស័យរាប់ម៉ឺននាក់ត្រូវបានចាប់បញ្ជូនត្រឡប់ទៅប្រទេសរបស់ពួកគេវិញ។
កាលពីឆ្នាំមុន ក្រសួងសន្តិសុខសាធារណៈរបស់ចិនអះអាងថាជនជាតិចិនជាង៧៦០០នាក់ដែលពាក់ព័ន្ធនឹងល្បែងអនឡាញ និងឆបោកអនឡាញត្រូវបានចាប់បញ្ជូនពីទីក្រុងមីយ៉ាវ៉ាឌី (Myawaddy) ដែលស្ថិតនៅក្នុងទឹកដីមីយ៉ាន់ម៉ាជាប់នឹងព្រំដែនថៃ។ ប្លុកអគារនៅក្នុងសួនឧទ្យានខេខេផាក (KK Park) ជាសម្បុកឆបោកអនឡាញដ៏ធំមួយ និងក៏ជាមជ្ឈមណ្ឌលរត់ពន្ធមនុស្សនៅមីយ៉ាវ៉ាឌីផងដែរ។
បទល្មើសដែលជនទាំង១១នាក់បានប្រព្រឹត្តមានដូចជាប្រព្រឹត្តអំពើមនុស្សឃាតដោយចេតនា, បង្ករបួសស្នាមដោយចេតនា, ឃុំខ្លួនមនុស្សខុសច្បាប់, បើកមជ្ឈមណ្ឌលឆបោក និងកាស៊ីណូ។ ទីភ្នាក់ងារព័ត៌មានស៊ីនហួររាយការណ៍ថាសេចក្ដីសម្រេចរបស់តុលាការសាលាដំបូងដែលកាត់ទោសប្រហារជីវិតអ្នកទាំង១១នោះត្រូវបានតុលាការកំពូលនៅទីក្រុងប៉េកាំងតម្កល់ទុកជាបានការដដែល។ តុលាការអះអាងថាបទល្មើសដែលពួកគេបានប្រព្រឹត្តចាប់តាំងពីឆ្នាំ២០១៥មានច្រើនគ្រប់គ្រាន់៕ ប្រភព៖ រ៉យទ័រ
ចែករំលែកព័តមាននេះ