រាជធានីភ្នំពេញ ៖ មានករណីលេចធ្លាយឧស្ម័នអាម៉ូញាក់ចេញពីរោងចក្រផលិតទឹកកក១កន្លែង បង្កការភ្ញាក់ផ្អើលដល់មន្ត្រីជំនាញអគ្គិភ័យ រួមទាំងសមត្ថកិច្ចចុះអន្តរាគមន៍ភ្លាមៗ កាលពីវេលាម៉ោង១០យប់ ថ្ងៃទី២៨ ខែមករា ឆ្នាំ២០២៥ នៅចំណុចរោងចក្រផលិតទឹកកកមួយកន្លែង…
រាជធានីភ្នំពេញ ៖ មានករណីលេចធ្លាយឧស្ម័នអាម៉ូញាក់ចេញពីរោងចក្រផលិតទឹកកក១កន្លែង បង្កការភ្ញាក់ផ្អើលដល់មន្ត្រីជំនាញអគ្គិភ័យ រួមទាំងសមត្ថកិច្ចចុះអន្តរាគមន៍ភ្លាមៗ កាលពីវេលាម៉ោង១០យប់ ថ្ងៃទី២៨ ខែមករា ឆ្នាំ២០២៥ នៅចំណុចរោងចក្រផលិតទឹកកកមួយកន្លែង ក្នុងភូមិព្រៃសាលា សង្កាត់កាកាបទី១ ខណ្ឌពោធិសែនជ័យ រាជធានីភ្នំពេញ ។
ប្រភពព័ត៌មានបានអោយដឹងថា មុនពេលកើតហេតុ មានទីតាំងរោងចក្រធុនតូចផលិតទឹកកក១កន្លែងខាងលើ បានលេចធ្លាយនូវសារជាតិ អាម៉ូញាក់ សាយភាយពេញរោងចក្រផលិតទឹកកកខាងលើ បង្កការភ្ញាក់ផ្អើលដល់ពលរដ្ឋនាំគ្នារាយការណ៍ទៅមន្ត្រីជំនាញដើម្បីសុំការអន្តរាគមន៍ មុនឈានទៅដល់ការស្រូបក្លិនប៉ះពាល់ដល់សុខភាពផ្លូវដង្ហើមពលរដ្ឋដែលរស់នៅក្បែរនោះ ។
ក្រោយទទួលដំណឹងខាងលើនេះភ្លាម កម្លាំងមានសមត្ថកិច្ច រួមមានកម្លាំងមូលដ្ឋានប៉ុស្តិ៍កាកាប មន្ត្រីក្នុងមូលដ្ឋាន រួមទាំងការិយាល័យនគរបាលបង្ការពន្លត់អគ្គិភ័យនិងសង្គ្រោះនៃស្នងការដ្ឋាននគរបាលរាជធានីភ្នំពេញ បានបញ្ជូនរថយន្តពន្លត់អគ្គិភ័យចុះទៅអន្តរាគមន៍ភ្លាមៗ ដោយប្រើប្រាស់រថយន្តដែលមានកង្ហារ ធ្វើការបាញ់សារជាតិឧស្ម័ននោះ ទៅកាន់ផ្ទៃអាកាស ដើម្បីទប់ស្កាត់ទាន់ពេលវេលា ។
ក្រោយពីមានកិច្ចអន្តរាគមន៍ពីមន្ត្រីជំនាញអគ្គិភ័យ និងមន្ត្រីជាប់ពាក់ព័ន្ធ ក្នុងការទប់ទល់ផង និងជួសជុលទីតាំងដែលលេចធ្លាយផង ទើបករណីខាងលើអាចគ្រប់គ្រងស្ថានការណ៍បានធម្មតា និងមានភាពប្រសើរឡើងវិញផងដែរ ៕
ចែករំលែកព័តមាននេះ