ទីក្រុងវ៉ាស៊ីនតោន៖ រដ្ឋមន្ត្រីការបរទេសអាមេរិក លោករូប៊ីអូ ថ្លែងនៅក្នុងសភាថាថ្នាក់ដឹកនាំថ្មីរបស់ប្រទេសវេណេហ្ស៊ូអេឡារក្សាទំនាក់ទំនងជិតស្និទ្ធជាមួយអាមេរិកជាងរដ្ឋាភិបាលមុនៗ ដូច្នេះគ្មានការចាំបាច់ប្រើប្រាស់កម្លាំងយោធាទៅលើប្រទេសនេះតទៅទៀតទេ។ លោកថ្លែងដូច្នេះជាការឆ្លើយតបទៅនឹងការចោទសួររបស់ក្រុមអ្នកតំណាងរាស្ត្រកាលពីយប់មិញ។ នេះជាការឆ្លើយបំភ្លឺរបស់រដ្ឋាភិបាលលោកត្រាំជាលើកដំបូងចាប់តាំងពីយោធាអាមេរិកវាយប្រហារវេណេហ្ស៊ូអេឡា និងចាប់ខ្លួនលោកម៉ាឌូរ៉ូកាលពីថ្ងៃទី៣ ខែមករា។
លោកដូណាល់ត្រាំបានបញ្ជាឱ្យរដ្ឋាភិបាលរបស់លោកសហការជាមួយរដ្ឋាភិបាលវេណេហ្ស៊ូអេឡាក្រោមការដឹកនាំរបស់លោកស្រីឌែលស៊ី រ៉ូឌ្រីហ្គេស (Delcy Rodriguez)។ លោកស្រីជាសម្ព័ន្ធមិត្តរបស់លោកម៉ាឌូរ៉ូ និងស្បថចូលកាន់តំណែងក្រោយការចាប់ខ្លួននោះ។ អាមេរិកព្រមានថាលោកស្រីរ៉ូឌ្រីហ្គេសក៏អាចនឹងមានជោគវាសនាដូចលោកម៉ាឌូរ៉ូដែរបើសិនលោកស្រីនៅតែប្រឆាំងអាមេរិក។
លោករូប៊ីអូថ្លែងថាលោកត្រាំនឹងមិនបោះបង់ចោលជម្រើសណាមួយទេក្នុងការចាត់ការវេណេហ្ស៊ូអេឡា។ ប៉ុន្តែយើងក៏ព្យាយាមជៀសវាងមិនប្រើប្រាស់កម្លាំងយោធាប្រឆាំងនឹងវេណេហ្ស៊ូអេឡាទៀតដែរ។ នេះជាការបង្ហាញថារដ្ឋបាលរបស់លោកអាចទទួលយកបាននូវរបៀបដឹកនាំរបស់លោកស្រីរ៉ូឌ្រីហ្គេស។ លោករូប៊ីអូថ្លែងថាវត្តមានយោធាអាមេរិកដែលគេអាចមើលឃើញវេណេហ្ស៊ូអេឡាជាបន្តទៅទៀតនេះគឺកងទ័ពម៉ារីនដែលការពារស្ថានទូតអាមេរិកនៅប្រទេសនេះ។
បណ្ដាញទំនាក់ទំនងជាមួយថ្នាក់ដឹកនាំវេណេហ្ស៊ូអេឡាប្រព្រឹត្តឡើងប្រកបដោយសាច់ការ និងការគោរពគ្នាទៅវិញទៅមក។ លោករូប៊ីអូរំពឹងថាស្ថានទូតអាចនឹងបើកដំណើរការឡើងវិញនៅក្នុងពេលឆាប់ៗនេះ។ ស្ថានទូតអាមេរិកនៅទីក្រុងការ៉ាកាស់បិទទ្វារចាប់តាំងពីឆ្នាំ២០១៩។ ថ្មីៗនេះ ក្រសួងការបរទេសអាមេរិកបានបញ្ជូនគណៈប្រតិភូទៅវេណេហ្ស៊ូអេឡាដើម្បីពិនិត្យមើលលទ្ធភាពនៃការបើកទ្វារឡើងវិញ៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ