រាជធានីភ្នំពេញ ៖ កម្លាំងគណៈបញ្ជាការឯកភាពរដ្ឋបាលខណ្ឌបឹងកេងកង ដឹកនាំដោយលោក សុខ សម្បត្តិ អភិបាលខណ្ឌ បានបង្ក្រាបករណីចាប់ឃុំឃាំង និងបង្ខាំងមនុស្សជំរិតទារប្រាក់នៅខណ្ឌបឹងកេងកង ដោយឃាត់ខ្លួនជនសង្ស័យជាជនជាតិចិនម្នាក់…
រាជធានីភ្នំពេញ ៖ កម្លាំងគណៈបញ្ជាការឯកភាពរដ្ឋបាលខណ្ឌបឹងកេងកង ដឹកនាំដោយលោក សុខ សម្បត្តិ អភិបាលខណ្ឌ បានបង្ក្រាបករណីចាប់ឃុំឃាំង និងបង្ខាំងមនុស្សជំរិតទារប្រាក់នៅខណ្ឌបឹងកេងកង ដោយឃាត់ខ្លួនជនសង្ស័យជាជនជាតិចិនម្នាក់ និងរំដោះស្ត្រីរងគ្រោះដែលជាជនជាតិខ្មែរ ។
ប្រតិបត្តិការនេះ ធ្វើឡើងកាលពីថ្ងៃទី២៧ ខែមករា ឆ្នាំ២០២៦កន្លងទៅ ដោយកម្លាំងសមត្ថកិច្ចបានចុះឆែកឆេរនៅអគារលេខ ៦២៣ AGILE SKY RESIDENCE មហាវិថីព្រះមុនីវង្ស ភូមិ៧ សង្កាត់បឹងកេងកងទី៣ ខណ្ឌបឹងកេងកង ។ កម្លាំងចម្រុះបានធ្វើការឆែកឆេរបន្ទប់លេខ A៣៦-១៦ និងបន្ទប់លេខ A៣៦-១៧ ធ្វើការឃាត់ខ្លួនជនសង្ស័យម្នាក់ ពាក់ព័ន្ធនឹងករណីឃុំឃាំង និងបង្ខាំងមនុស្សជំរិតទារប្រាក់ចំនួន ៥ ០០០ដុល្លារ ។
ជនសង្ស័យឈ្មោះ REN XIAO PENG អាយុ៤២ឆ្នាំ ជនជាតិចិន ស្នាក់នៅបន្ទប់លេខ A៣៦-១៦ និងបន្ទប់លេខ A៣៦-១៧ ជាន់ទី៣៦ ។ ស្ត្រីរងគ្រោះឈ្មោះ ហួរ គឹមហួ អាយុ២៣ឆ្នាំ ជនជាតិខ្មែរ បម្រើការនៅហាងឯកជនមួយ ស្នាក់នៅក្នុងសង្កាត់ភ្នំពេញថ្មី ខណ្ឌសែនសុខ ។
តាមការស្រាវជ្រាវបានឱ្យដឹងថា នៅថ្ងៃទី២៣ ខែមករា ឆ្នាំ២០២៦ ជនរងគ្រោះនិងជន
សង្ស័យបានចូលមកស្នាក់នៅបន្ទប់លេខ A៣៦-១៦ និងបន្ទប់លេខ A៣៦-១៧ ជាន់ទី៣៦ នៃ
អគារខាងលើ ។ លុះនៅថ្ងៃទី២៦ ខែមករា ឆ្នាំ២០២៦ ជនសង្ស័យបានយកទូរស័ព្ទរបស់ជនរងគ្រោះឆាតទៅទារលុយបងស្រីបង្កើតរបស់នាងចំនួន ៥ ០០០ដុល្លារ ។ បន្ទាប់មក បងស្រីរបស់នាងបានមករាយការណ៍ និងដាក់ពាក្យប្តឹងនៅប៉ុស្ដិ៍នគរបាលរដ្ឋបាលបឹងកេងកងទី៣ ។
តាមរយៈលេខទូរស័ព្ទនោះ សមត្ថកិច្ចបានស្រាវជ្រាវស្គាល់ទីតាំង ក៏បានធ្វើការឡោមព័ទ្ធ និងឆែកឆេរ ហើយរកឃើញទាំងជនសង្ស័យនិងស្ត្រីរងគ្រោះ ។
ជាមួយនឹងការចាប់ឃាត់ខ្លួនជនសង្ស័យ ម្នាក់នេះ សមត្ថកិច្ចក៏បានដកហូត លិខិតឆ្លងដែន១ច្បាប់ សៀវភៅការងារជនបរទេស១ច្បាប់ម្សៅម៉ដ្ឋពណ៌សចំនួន២កញ្ចប់ ដែលសង្ស័យជាគ្រឿងញៀន ក្រាមពណ៌សថ្លាចំនួន៤កញ្ចប់(តូច២ ធំ២) សង្ស័យជាគ្រឿងញៀន ជញ្ជីងសម្រាប់ថ្លឹងគ្រឿងញៀន២គ្រឿង ថ្នាំគ្រាប់អក្សរ wwy ចំនួន១២គ្រាប់ សម្ភារៈកែច្នៃសម្រាប់ប្រើប្រាស់គ្រឿងញៀនមួយចំនួន និងខ្សែច្រវាក់ដែកអុីណុក ពណ៌ស ប្រវែងជាង១ម៉ែត្រ ។
ជនសង្ស័យរួមនឹងវត្ថុតាង ត្រូវបានបញ្ជូនទៅកាន់អធិការដ្ឋាននគរបាលខណ្ឌបឹងកេងកង ដើម្បីកសាងសំណុំរឿងចាត់ការតាមនីតិវីធី ៕
ចែករំលែកព័តមាននេះ