ទីក្រុងឡុង៖ នាយករដ្ឋមន្ត្រីអង់គ្លេស លោកខៀស្តាមើ ត្រៀមចាកចេញដំណើរទៅទីក្រុងប៉េកាំង ប្រទេសចិន ដើម្បីបំពេញទស្សនកិច្ចនៅទីនោះ និងដើម្បីពង្រឹងទំនាក់ទំនងនយោបាយ និងធុរកិច្ចជាមួយប្រទេសចិន។ ដំណើរទស្សនកិច្ចនេះធ្វើឡើងចំពេលដែលជម្លោះរវាងក្រុមបស្ចិមប្រទេស និងអាមេរិកចាប់ផ្ដើមកើតមានឡើងកាន់តែខ្លាំង។…
ទីក្រុងឡុង៖ នាយករដ្ឋមន្ត្រីអង់គ្លេស លោកខៀស្តាមើ ត្រៀមចាកចេញដំណើរទៅទីក្រុងប៉េកាំង ប្រទេសចិន ដើម្បីបំពេញទស្សនកិច្ចនៅទីនោះ និងដើម្បីពង្រឹងទំនាក់ទំនងនយោបាយ និងធុរកិច្ចជាមួយប្រទេសចិន។ ដំណើរទស្សនកិច្ចនេះធ្វើឡើងចំពេលដែលជម្លោះរវាងក្រុមបស្ចិមប្រទេស និងអាមេរិកចាប់ផ្ដើមកើតមានឡើងកាន់តែខ្លាំង។ លោកស្តាមើថ្លែងថាអង់គ្លេសមិនអាចបោះបង់ចោលឱកាសសេដ្ឋកិច្ចដែលបង្ហាញដោយប្រទេសចិនបានឡើយក្នុងនាមចិនជាមហាអំណាចសេដ្ឋកិច្ចទី២នៅលើពិភពលោក។
ទន្ទឹមនឹងនោះ អង់គ្លេសនៅតែប្រយ័ត្នប្រយែងជានិច្ចចំពោះការគំរាមកំហែងផ្នែកសន្តិសុខ។ លោកថ្លែងបន្តទៀតថាវាជារឿងមិនសមហេតុផលទេបើយើងសម្ងំសុខ ធ្វើមិនដឹងមិនឮចំពោះប្រទេសចិន។ ដើម្បីផលប្រយោជន៍របស់យើង យើងត្រូវតែចូលរួម។ នេះជាដំណើរទស្សនកិច្ចដ៏សំខាន់ក្រៃលែង ហើយយើងនឹងខិតខំធ្វើឱ្យមានវឌ្ឍនភាពដ៏ពិតប្រាកដ។
លោកស្តាមើទៅប្រទេសចិនលើកនេះក៏មានថ្នាក់ដឹកនាំធុរកិច្ចជាង៥០នាក់រួមដំណើរផងដែរ។ លោកនឹងជួបលោកស៊ីជីនពីង និងលោកលីឆៀងនៅថ្ងៃព្រហស្បតិ៍។ បន្ទាប់មក លោកនឹងបន្តដំណើរទៅទីកក្រុងសៀងហៃនៅថ្ងៃសុក្រ។ ដំណើរទស្សនកិច្ចលើកនេះអាចក្លាយជាបម្លាស់ប្ដូរមួយនៅក្នុងទំនាក់ទំនងរវាងប្រទេសទាំង២បន្ទាប់ពីមានទំនាស់នឹងគ្នាដោយសារការបង្ក្រាបរបស់អាជ្ញាធរចិនទៅលើសកម្មជនប្រជាធិបតេយ្យនៅហុងកុង, ការគាំទ្ររបស់ចិនចំពោះរុស្ស៊ីនៅក្នុងសង្គ្រាមអ៊ុយក្រែន និងការចោទប្រកាន់របស់អង់គ្លេសថាចិនស៊ើបការណ៍ពីអ្នកនយោបាយ និងមន្ត្រីរដ្ឋាភិបាលអង់គ្លេស។
សម្រាប់ប្រទេសចិន ដំណើរទស្សនកិច្ចនេះជាការបង្ហាញថាប្រទេសរបស់ខ្លួនជាដៃគូដែលមានស្ថិរភាព និងគួរឱ្យជឿទុកចិត្តនៅក្នុងស្ថានភាពដែលពិភពលោកកំពុងតែបាត់បង់សណ្ដាប់ធ្នាប់។ លោកស្តាមើតែងតែការពារការសម្រេចចិត្តរបស់លោកដែលទៅបំពេញទស្សនកិច្ចនៅប្រទេសចិន។ លោកថាដំណើរទស្សនកិច្ចអាចជួយឱ្យលោកធ្វើផែនការដើម្បីជំរុញកំណើនសេដ្ឋកិច្ច និងលើកកម្ពស់ជីវភាពរស់នៅរបស់ពលរដ្ឋអង់គ្លេស។
ប៉ុន្តែយុទ្ធសាស្ត្ររបស់លោកធ្វើឱ្យមានមតិរិះគន់ពីសំណាក់អ្នកនយោបាយអង់គ្លេស និងអាមេរិក។ ពួកគេយល់ថាលោកស្តាមើមើលស្រាលការគំរាមកំហែងរបស់ចិនទៅលើសន្តិសុខជាតិ។ លោកស្តាមើចង់ផ្ដាច់ខ្លួនឱ្យឆ្ងាយពីការធ្វើអត្ថាធិប្បាយរបស់នាយករដ្ឋមន្ត្រីកាណាដានៅឯវេទិកាសេដ្ឋកិច្ចពិភពលោកនៅទីក្រុងដាវ៉ូស ប្រទេសស្វីស កាលពីសប្ដាហ៍មុន។
លោកខានីថ្លែងថាសណ្ដាប់ធ្នាប់ពិភពលោកដែលផ្អែកលើវិធានជាគោលនោះឥឡូវនេះលែងមានតទៅទៀតហើយ វាមានតែនៅក្នុងអតីតកាលប៉ុណ្ណោះ។ លោកខានីថែមទាំងអំពាវនាវឱ្យបណ្ដាប្រទេសដែលមានអំណាចមធ្យមខិតខំសហការគ្នាដើម្បីកុំឱ្យក្លាយខ្លួនជាជនរងគ្រោះនៃអនុត្តរភាពនិយមរបស់អាមេរិក។ លោកស្តាមើថ្លែងថាលោកជាអ្នកប្រតិបត្តិនិយមម្នាក់។ អ្នកប្រតិបត្តិនិយមតាមបែបអង់គ្លេសធ្វើអ្វីដែលសមហេតុផល។ លោកចង់ច្រានចោលគំនិតដែលថារដ្ឋាភិបាលរបស់លោកត្រូវតែជ្រើសរើសរវាងអាមេរិក និងអឺរ៉ុប៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ