អាជ្ញាធរថៃបាននិយាយ កាលពីថ្ងៃទី២៦ ខែមករា ថា សត្វប្រចៀវផ្លែឈើជាច្រើនប្រភេទនៅក្នុងប្រទេសមានផ្ទុកវីរុសនីប៉ាហ៍ គ្រាន់តែនៅលើមនុស្សមិនទាន់ឃើញនៅឡើយ ។ នេះបើតាមសេចក្តីរាយការណ៍របស់សារព័ត៌មាន VN Express។…
អាជ្ញាធរថៃបាននិយាយ កាលពីថ្ងៃទី២៦ ខែមករា ថា សត្វប្រចៀវផ្លែឈើជាច្រើនប្រភេទនៅក្នុងប្រទេសមានផ្ទុកវីរុសនីប៉ាហ៍ គ្រាន់តែនៅលើមនុស្សមិនទាន់ឃើញនៅឡើយ ។ នេះបើតាមសេចក្តីរាយការណ៍របស់សារព័ត៌មាន VN Express។
លោកវេជ្ជបណ្ឌិត សុផុន អៀមស៊ីរីថាវន ( Sophon Iamsirithaworn) អនុលេខាធិការអចិន្ត្រៃយ៍ទទួលបន្ទុកសុខភាពថៃ បានប្រាប់អ្នកយកព័ត៌មានថា វីរុសនីប៉ាហ៍ ត្រូវបានរកឃើញនៅក្នុងចំណោមសត្វប្រចៀវផ្លែឈើនៅក្នុងប្រទេសថៃ ប៉ុន្តែមានដង់ស៊ីតេមេរោគទាបជាងនៅក្នុងប្រទេសដែលមានការផ្ទុះឡើងនៃជំងឺនេះ ។
នៅពេលនេះ អាជ្ញាធរថៃបានកំពុងតែគ្រប់គ្រងកសិដ្ឋានចិញ្ចឹមជ្រូកពីតំបន់ដែលគេបានរកឃើញសត្វប្រចៀវដែលផ្ទុកវីរុស ។
លោកវេជ្ជបណ្ឌិត អាខុម ឆៃវីរ៉ាវ៉ាត់តាណា ( Arkom Chaiwerawattana) នាយកវិទ្យាស្ថានសុខភាពកុមារជាតិសិរិគិត បាននិយាយថា កុមារតូចៗជាក្រុមងាយរងគ្រោះ ដែលមានការព្រួយបារម្ភអំពី
វីរុសនីប៉ាហ៍ ពីព្រោះរោគសញ្ញារបស់ពួកគេមិនសូវគួរឲ្យកត់សម្គាល់ដូចមនុស្សពេញវ័យទេ ហើយ ជំងឺនេះធ្ងន់ធ្ងរចំពោះកុមារតូចៗ និងអាចបណ្តាលឲ្យរលាកខួរក្បាលធ្ងន់ធ្ងរ។
ដើម្បីបង្ការជំងឺនេះ អាជ្ញាធរថៃចាប់ផ្តើមពង្រឹងការត្រួតពិនិត្យនៅតាមច្រកចូលប្រទេសហើយជាពិសេស គឺនៅអាកាសយានដ្ឋានអន្តរជាតិដែលមានជើងហោះហើរពីឥណ្ឌាកន្លែងដែលកំពុងតែផ្ទុះជំងឺនេះ ។
ដោយឡែក ក្រៅពីថៃ កម្ពុជាក្រសួងសុខាភិបាលក៏បានដាក់ការតាមដានលើការរីករាលដាលនៃ
វីរុសនីប៉ាហ៍នេះផងដែរ ហើយនៅវៀតណាមអាជ្ញាធរបានកំពុងតែរឹតបន្តឹងការត្រួតពិនិត្យនៅតាមអាកាសយានដ្ឋាន ។
ក្រសួងសុខាភិបាលវៀតណាមបាននិយាយថា ខ្លួនកំពុងតាមដានយ៉ាងដិតដល់នូវស្ថានភាពសុខភាព និងប្រវត្តិធ្វើដំណើររបស់អ្នកដំណើរ ជាពិសេស អ្នកណាម្នាក់ដែលបង្ហាញអាការៈគ្រុនក្តៅ រោគសញ្ញាផ្លូវដង្ហើម ឬសញ្ញាសរសៃប្រសាទមិនធម្មតា ។ អ្នកដែលមានរោគសញ្ញានេះ នឹងត្រូវបញ្ជូនទៅមន្ទីរពេទ្យសម្រាប់ជំងឺត្រូពិចជាបន្ទាន់ ដើម្បីដាក់ឱ្យនៅដាច់ដោយឡែក ធ្វើរោគវិនិច្ឆ័យ និងព្យាបាល។
នៅអាស៊ានវីរុសនីប៉ាហ៍ ធ្លាប់រកឃើញនៅក្នុងប្រទេសម៉ាឡេស៊ី សិង្ហបុរី និងហ្វីលីពីន ជាដើម ។
ចែករំលែកព័តមាននេះ