កូរ៉េខាងជើង ៖ កូរ៉េខាងជើងប្រកាស នាថ្ងៃទី២៨ មករា ថា នឹងលាតត្រដាងដំណាក់កាលខាងមុខនៃផែនការនុយក្លេអ៊ែររបស់ខ្លួន ក្នុងឱកាសនៃសមាជបក្សពលករកូរ៉េនាដើមឆ្នាំនេះ ក្នុងពេលការភ័យខ្លាចពីការផ្ដួលរំលំរបបនោះមានកាន់តែខ្លាំងឡើងនៅក្រុងព្យុងយ៉ាង ។…
កូរ៉េខាងជើង ៖ កូរ៉េខាងជើងប្រកាស នាថ្ងៃទី២៨ មករា ថា នឹងលាតត្រដាងដំណាក់កាលខាងមុខនៃផែនការនុយក្លេអ៊ែររបស់ខ្លួន ក្នុងឱកាសនៃសមាជបក្សពលករកូរ៉េនាដើមឆ្នាំនេះ ក្នុងពេលការភ័យខ្លាចពីការផ្ដួលរំលំរបបនោះមានកាន់តែខ្លាំងឡើងនៅក្រុងព្យុងយ៉ាង ។
កូរ៉េខាងជើងចាប់តាំងពីច្រើនទសវត្សមកហើយចោទប្រកាន់អាមេរិកថា ចង់កម្ចាត់បណ្ដាមេដឹកនាំរបស់ខ្លួន ដូចដែលក្រុងវ៉ាស៊ីនតោនបានធ្វើកាលពីដើមខែនេះ ជាមួយមេដឹកនាំវេណេស៊ុយអេឡាលោកនីកូឡាស់ម៉ាឌូរ៉ូ និងអះអាងថា កម្មវិធីគ្រឿងសព្វាវុធរបស់ខ្លួនក្នុងនោះ មានកម្មវិធីនុយក្លេអ៊ែរផង គឺសំដៅការពារមេដឹកនាំខ្លួននិងប្រទេស ។
២ថ្ងៃបន្ទាប់ពីការចាប់ខ្លួនលោកម៉ាឌូរ៉ូ លោកគីម ជុងអ៊ុន លើកពីហេតុផលនៃការបាញ់សាកបណ្ដាមីស៊ីលរបស់ខ្លួនថា មកពីវិបត្តិភូមិសាស្ត្រនយោបាយ និងបណ្ដាព្រឹត្តិការណ៍អន្តរជាតិដែលកាន់តែស្មុគ្រស្មាញ ក្នុងនោះ បន្ថែមការគំរាមកំហែងខាងយោធារបស់ប្រធានាធិបតីអាមេរិកលោកដូណាល់ត្រាំប្រឆាំងអ៊ីរ៉ង់ ដោយសារការបង្ក្រាបចលនាបះបោរ ។
ចំណែកសហរដ្ឋអាមេរិកវិញ នាពេលនេះ បានទទូចដល់កូរ៉េខាងត្បូងឲ្យកាន់តែម្ចាស់ការក្នុងកិច្ចការពារដោយខ្លួនឯងជាមួយការជួយទ្រទ្រង់មានកម្រិតរបស់សហរដ្ឋអាមេរិក ពិសេស លើការគំរាមកំហែងនុយក្លេអ៊ែរពីសំណាក់កូរ៉េខាងជើង ។ ក្រុងវ៉ាស៊ីនតោនពេលនេះ ចង់បន្ធូរដៃពីកូរ៉េខាងត្បូងកន្លែងដែលមានវត្តមានទាហានអាមេរិកដល់២៨០០០នាក់។
អនុរដ្ឋមន្ត្រីការពារប្រទេសអាមេរិកមួយរូបលោក ELBRIDGE COLBY បានមកកាន់ក្រុងសេអ៊ូល ដើម្បីជម្រុញឲ្យកូរ៉េខាងត្បូង ទទួលបាននាវាមុជទឹកនុយក្លេអ៊ែរ ដែលលោកថា ចាំបាច់ដើម្បីស្វ័យភាពយោធារបស់ក្រុងសេអ៊ូល ។ លោកក៏សាទរដែរដែលកូរ៉េខាងត្បូងបង្កើនថវិកាការពារ តាមសំណើរបស់ប្រធានាធិបតីអាមេរិកលោកដូណាល់ត្រាំ ។
ទោះបីយ៉ាងណា ក្រុងសេអ៊ូលនៅតែមានការបារម្ភចំំពោះចម្លើយតបរបស់កូរ៉េខាងជើង ដែលអាចបានចិត្តពេលមានការដកថយរបស់កងទ័ពអាមេរិកពីឧបទ្វីបកូរ៉េ ។ តាមកងទ័ពកូរ៉េខាងត្បូងថា នាថ្ងៃទី២៧ មករា បណ្ដាមីស៊ីលកូរ៉េខាងជើង ត្រូវបានបាញ់ចេញពីតំបន់មួយនៅក្បែរក្រុងព្យុងយ៉ាង នាវេលាម៉ោងប្រមាណជា១៥និង៥០នាទី ម៉ោងក្នុងស្រុកទៅកាន់ដែនទឹកនៃឆ្នេរសមុទ្រខាងកើតរបស់ឧបទ្វីបកូរ៉េ ៕
ចែករំលែកព័តមាននេះ