រាជធានីភ្នំពេញ៖ ជនសង្ស័យចំនួន៣នាក់ដែលមានសមាសភាពជាកម្មករសំណង់ បានធ្វើសកម្មភាពវាយនិងរឹត ក បុរសម្នាក់ទៀតដែលជាកម្មករសំណង់ដូចគ្នា ប៉ុនប៉ងផ្ដាច់ជីវិតតែម្ដង ប៉ុន្តែជនរងគ្រោះជីវិតថ្លៃអត់ស្លាប់ គ្រាន់តែរងរបួសធ្ងន់និងសន្លប់ធំ ប៉ុណ្ណោះ ។…
រាជធានីភ្នំពេញ៖ ជនសង្ស័យចំនួន៣នាក់ដែលមានសមាសភាពជាកម្មករសំណង់ បានធ្វើសកម្មភាពវាយនិងរឹត ក បុរសម្នាក់ទៀតដែលជាកម្មករសំណង់ដូចគ្នា ប៉ុនប៉ងផ្ដាច់ជីវិតតែម្ដង ប៉ុន្តែជនរងគ្រោះជីវិតថ្លៃអត់ស្លាប់ គ្រាន់តែរងរបួសធ្ងន់និងសន្លប់ធំ ប៉ុណ្ណោះ ។ លុះក្រោយពេលក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យព្រះកុសុមៈបានដឹងខ្លួនឡើងវិញ ជនរងគ្រោះក៏បាននិយាយប្រាប់ឈ្មោះជនដៃដល់ឲ្យម្ដាយមីងបានដឹង ។ បន្ទាប់មកស្ត្រីជាម្ដាយមីង ក៏បានទៅដាក់ពាក្យបណ្ដឹងនៅប៉ុស្តិ៍នគរបាលកន្ទោក ហើយនគរបាលក៏បានធ្វើការស្រាវជ្រាវ រហូតឈានដល់ការឃាត់ខ្លួនជនដៃដល់ទាំង៣នាក់ខាងលើ ។
ការឃាត់ខ្លួននោះបានធ្វើឡើងនាវេលារសៀលថ្ងៃទី២៥ ខែមករា ឆ្នាំ២០២៦ នៅក្នុងការដ្ឋានសំណង់ ស្ថិតនៅក្នុងភូមិកំពង់ថ្កុល សង្កាត់សំពៅពូន ក្រុងសំពៅពូន ខេត្តកណ្តាល ដោយកងកម្លាំងនគរបាលខណ្ឌកំបូល រាជធានីភ្នំពេញ សហការជាមួយនគរបាលក្រុងសំពៅពូន នៃស្នងការដ្ឋាននគរបាលខេត្តកណ្ដាល ។
ជនសង្ស័យទាំង០៣នាក់នោះរួម១-ឈ្មោះ ងួន កក្កដា ហៅ ឆៃ ភេទប្រុស អាយុប្រមាណ៣១ឆ្នាំ ២-ឈ្មោះ មិន វណ្ណី ភេទប្រុស អាយុ ៣៩ឆ្នាំ ៣-ឈ្មោះ រ៉ន ប៊ុនងុង ហៅត្រេន អាយុ ១៨ឆ្នាំ មានមុខរបរជាកម្មករសំណង់ ទាំង៣នាក់ ហើយស្នាក់នៅក្នុងការដ្ឋានសំណង់ ស្ថិតក្នុងភូមិត្រពាំងឈូក សង្កាត់កន្ទោក ខណ្ឌកំបូល រាជធានីភ្នំពេញ ។
ដោយឡែកបុរសដែលជាជនរងគ្រោះមិនទាន់ត្រូវបានសមត្ថកិច្ចប្រាប់ឲ្យស្គាល់អត្តសញ្ញាណនៅឡើយទេ ហើយពេលនេះកំពុងសម្រាកព្យាបាលរបួសនៅក្នុងមន្ទីរពេទ្យព្រះកុសុមៈ ។ រីឯមូលហេតុដែលជនសង្ស័យព្រួតគ្នាវាយផងរឹត ក ផង ប៉ុនប៉ងសម្លាប់ជនរងគ្រោះនោះ ក៏សមត្ថកិច្ចពុំទាន់បានទម្លាយប្រាប់ឲ្យដឹងនោះដែរ ដោយប្រាប់ថាកំពុងសួរនាំ ។
ស្ត្រីឈ្មោះ ម៉ន ឈួន ត្រូវជាម្ដាយមីងជនរងគ្រោះបានប្រាប់នគរបាលថា គាត់មិនបានឃើញក្រុមជនសង្ស័យខាងលើវាយក្មួយប្រុសគាត់ដោយផ្ទាល់ភ្នែកនោះទេ ប៉ុន្តែកាលពីវេលាម៉ោងប្រហែល ០៦និង៣០នាទីព្រឹក ថ្ងៃទី២២ ខែមករា ឆ្នាំ២០២៦ ខណៈគាត់កំពុងនៅក្នុងបន្ទប់ជួលជាប់នឹងការដ្ឋានសំណង់ស្ថិតនៅក្នុងភូមិត្រពាំងឈូក សង្កាត់កន្ទោក ខណ្ឌកំបូល រាជធានីភ្នំពេញ ។ ស្រាប់តែមានគេប្រាប់ថា«ក្មួយប្រុសរបសស់គាត់ត្រូវបានគេវាយ ហើយហូរឈាមពេញផ្ទៃមុខ និងសន្លប់ស្ដូកស្ដឹង» បន្ទាប់មកគាត់ក៏បានចេញទៅមើល ហើយក៏បានឃើញក្មួយប្រុសមានឈាមហូរពេញមុខ និងសន្លប់ពិតមែន ភ្លាមៗនោះគាត់ក៏បានបញ្ជូនក្មួយប្រុសទៅសង្គ្រោះបន្ទាន់នៅឯមន្ទីរពេទ្យព្រះកុសុមៈ ។
ម្ដាយមីងរូបនោះបានប្រាប់នគរបាលបន្តថា ក្រោយពីក្រុមគ្រូពេទ្យជួយសង្គ្រោះ ក្មួយប្រុសគាត់ក៏បានដឹងខ្លួនឡើងវិញ រួចនិយាយបានខ្លះៗ និងប្រាប់គាត់ថា«ឈ្មោះឆៃ និងបក្ខពួក ០២នាក់ទៀត បានចូលវាយក្នុងពេលខ្លួនកំពុងដេកនៅក្នុងការដ្ឋានសំណង់ខាងលើ » ។ ក្រោយពីក្មួយរៀបរាប់ប្រាប់បែបនេះ ទើបនៅវេលាម៉ោង០៦និង៣០នាទីព្រឹក ថ្ងៃទី២៤ ខែមករា ឆ្នាំ២០២៦ គាត់ក៏បានធ្វើជាតំណាងឲ្យក្មួយប្រុសទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលកន្ទោកតែម្ដង ។
នគរបាលបានប្រាប់ថា បន្ទាប់ពីទទួលពាក្យបណ្ដឹងខាងលើរួចនគរបាលប៉ុស្តិ៍កន្ទោក និងនគរបាលខណ្ឌកំបូល បានធ្វើការស្រាវជ្រាវ រហូតដល់វេលាម៉ោងប្រហែល៦ល្ងាចថ្ងៃទី២៥ ខែមករា ឆ្នាំ២០២៦ បានសហការជាមួយនគរបាលក្រុងសំពៅពូន នៃស្នងការដ្ឋាននគរបាលខេត្តកណ្ដាល ។ ចុះទៅធ្វើការឃាត់ខ្លួនជនសង្ស័យទាំង០៣នាក់ខាងលើ នៅចំណុចក្នុងការដ្ឋានសំណង់ ភូមិកំពង់ថ្កុល សង្កាត់សំពៅពូន ក្រុងសំពៅពូន ខេត្តកណ្តាល រួចនាំខ្លួនជនសង្ស័យទាំងនេះទៅកាន់អធិការដ្ឋាននគរបាលខណ្ឌកំបូល ដើម្បីសាកសួរនិងកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់៕
ចែករំលែកព័តមាននេះ