ខេត្តកំពង់ស្ពឺ ៖ បុរសជាអ្នកបើកបររថយន្តម្នាក់បានខ្ទាតចេញពីរថយន្តបោកក្បាលស្លាប់ភ្លាមៗនៅកន្លែងកើតហេតុ ខណៈដែលបើករថយន្តក្នុងល្បឿនលឿន ជ្រុលហួសផ្លូវក្រឡាប់ជាច្រើនត្រឡប់តែម្តង។ ហេតុការណ៍បើករថយន្តក្រឡាប់ស្លាប់ខ្លួនឯងបានកើតឡើងកាលពីវេលាម៉ោង៦និង២០នាទីព្រឹកថ្ងៃទី២៨ ខែមករា ឆ្នាំ២០២៦ នៅតាមបណ្តោយផ្លូវជាតិលេខ៤៤ ចន្លោះបង្គោលគីឡូម៉ែត្រលេខ៧៥…
ខេត្តកំពង់ស្ពឺ ៖ បុរសជាអ្នកបើកបររថយន្តម្នាក់បានខ្ទាតចេញពីរថយន្តបោកក្បាលស្លាប់ភ្លាមៗនៅកន្លែងកើតហេតុ ខណៈដែលបើករថយន្តក្នុងល្បឿនលឿន ជ្រុលហួសផ្លូវក្រឡាប់ជាច្រើនត្រឡប់តែម្តង។
ហេតុការណ៍បើករថយន្តក្រឡាប់ស្លាប់ខ្លួនឯងបានកើតឡើងកាលពីវេលាម៉ោង៦និង២០នាទីព្រឹកថ្ងៃទី២៨ ខែមករា ឆ្នាំ២០២៦ នៅតាមបណ្តោយផ្លូវជាតិលេខ៤៤ ចន្លោះបង្គោលគីឡូម៉ែត្រលេខ៧៥ ទៅលេខ៧៦ ស្ថិតនៅក្នុងភូមិផ្លោច ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ។
លោកវរសេនីយ៍ឯក ប៊ុត ប៊ុនធឿនអធិការនគរបាលស្រុកឱរ៉ាល់ បានបញ្ជាក់ថា ករណីគ្រោះថ្នាក់ចរាចរណ៍កើតឡើងអាចបណ្ដាលមកពីកត្ដាអ្នកបើកបរឆ្វេសប្រហែស បើកលើសល្បឿនកំណត់ទើបឱ្យរថយន្ដហួសធ្លាក់ផ្លូវក្រឡាប់ស្លាប់ខ្លួនឯងបែបនេះ។ រថយន្តម៉ាកហាយឡែនឌ័រ( TOYOTA HIGHLANDER) ពណ៌ទឹកប្រាក់ ពាក់ផ្លាកលេខភ្នំពេញ 2BH-4897 អ្នកបើកបរមានឈ្មោះ ហៀង តុលា ភេទប្រុស អាយុ៣២ឆ្នាំ រស់នៅក្នុងភូមិជីពាំង ឃុំជីពាំង ស្រុកពញ្ញាក្រែក ខេត្តត្បូងឃ្មុំ។
លោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់បាននិយាយបន្តថា នៅមុនពេលកើតហេតុ រថយន្ដខាងលើបានបើកបរតាមបណ្តោយផ្លូវជាតិលេខ៤៤ ពីទិសខាងលិចទៅទិសខាងកើត លុះពេលបើកបរមកដល់ចំណុចកេីតហេតុខាងលើ រថយន្ដបានរេចង្កូតរួចក្រឡាប់ធ្លាក់ផ្លូវ។ អ្នកបើកបរថយន្តបេីកក្នុងល្បឿនលឿនហេីយស្ថានភាពផ្លូវមិនអំណោយផលបណ្ដាលឱ្យក្រឡាប់តែម្ដង។
ក្រោយកើតហេតុនគរបាលចរាចរណ៍ស្រុកឱរ៉ាល់ចុះធ្វើការវាស់វែងនៅកន្លែងកើតហេតុ សពតៃកុងរថយន្តត្រូវបានប្រគល់ជូនសាច់ញាតិក្រុមគ្រួសារសាច់ញាតិដើម្បីយកទៅធ្វើបុណ្យតាមប្រពៃណី។
ចំណែករថយន្តរងការខូចខាតកំរិតធ្ងន់ ដឹកយកទៅរក្សាទុកនៅអធិការដ្ឋាននគរបាលស្រុកឱរ៉ាល់បណ្តោះអាសន្នសិន ៕
ចែករំលែកព័តមាននេះ