ខេត្តកំពង់ធំ ៖ លោកឧត្តមសេនីយ៍ទោ សោម ស៊ុន បញ្ជាក់ថា នៅមានពលរដ្ឋមួយចំនួនតូចប្រើល្បិចនេសាទខុសច្បាប់ ដោយដាក់ឧបករណ៍បន្លំជាមួយឧបករណ៍ស្របច្បាប់ ដើម្បីបន្លំភ្នែកសមត្ថកិច្ច។ ជាក់ស្តែងបើយោងតាមផេក…
ខេត្តកំពង់ធំ ៖ លោកឧត្តមសេនីយ៍ទោ សោម ស៊ុន បញ្ជាក់ថា នៅមានពលរដ្ឋមួយចំនួនតូចប្រើល្បិចនេសាទខុសច្បាប់ ដោយដាក់ឧបករណ៍បន្លំជាមួយឧបករណ៍ស្របច្បាប់ ដើម្បីបន្លំភ្នែកសមត្ថកិច្ច។
ជាក់ស្តែងបើយោងតាមផេក កងទ័ពជើងគោកនៃកងយោធពលខេមរភូមិន្ទ បានប្រកាសនាព្រឹកថ្ងៃទី២៨ ខែមករា ឆ្នាំ២០២៦នេះថា ៖ ឧត្តមសេនីយ៍ទោ សោម ស៊ុន រួមជាមួយកងកម្លាំងចម្រុះ ត្រួតពិនិត្យស្ថានភាពការដាក់ឧបករណ៍នេសាទស្របច្បាប់ និងមិនស្របច្បាប់ នៅតំបន់បឹងទន្លេសាប ក្នុងភូមិសាស្ត្រឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ ។
ក្នុងនោះដែរ ឧត្តមសេនីយ៍ទោ សោម ស៊ុន បានបញ្ជាក់ថា ៖ បច្ចុប្បន្ននេះ ការដាក់ឧបករណ៍បទល្មើសនេសាទខុសច្បាប់ នៅបឹងទន្លេសាប ក្នុងឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ មានការថយចុះគួរឲ្យកត់សម្គាល់ ។ បងប្អូនប្រជានេសាទភាគច្រើន បានគោរព និងអនុវត្តតាមច្បាប់ស្ដីពីជលផលថ្មី ។ តែក៏នៅមានប្រជាពលរដ្ឋមួយចំនួនតូច ដែលនៅតែបំពាន ក្នុងការលបលួចប្រើប្រាស់ឧបករណ៍នេសាទខុសច្បាប់ និងប្រជាពលរដ្ឋមួយចំនួនទៀត នៅតែមានល្បិចកល ដោយប្រើប្រាស់ឧបករណ៍នេសាទស្របច្បាប់ ដាក់បន្លំជាមួយឧបករណ៍នេសាទល្មើសច្បាប់ ដែលច្បាប់បានហាមឃាត់ ដើម្បីបំភាន់ភ្នែកសមត្ថកិច្ច តែត្រូវបានកងកម្លាំងចម្រុះរកឃើញ និងបំផ្លាញចោល ។
ជាក់ស្ដែងនៅរសៀលថ្ងៃនេះ កងកម្លាំងចម្រុះបានបំផ្លាញចោលឧបករណ៍នេសាទខុសច្បាប់ បានមួយករណី នៅតំបន់កោះតាបរ ដែលដាក់បន្លំជាមួយឧបករណ៍នេសាទស្របច្បាប់ ។
ឧត្តមសេនីយ៍ទោ សោម ស៊ុន និងកងកម្លាំងចម្រុះ បានប្ដេជ្ញាចិត្តដាច់ខាត បន្តគោរពអនុវត្តឲ្យបានម៉ឺងម៉ាត់ តាមបទបញ្ជារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ព្រមទាំងការណែនាំនិងដឹកនាំដោយផ្ទាល់ពីឯកឧត្តម នួន ផារ័ត្ន អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពង់ធំ ឲ្យមានប្រសិទ្ធភាព និងទទួលបានជោគជ័យ ៕
ចែករំលែកព័តមាននេះ