ទីក្រុងតេអេរ៉ង់៖ មន្ត្រីរដ្ឋាភិបាលអ៊ីរ៉ង់ចេញសេចក្ដីព្រមានខ្លាំងៗជាថ្មីទៅអាមេរិក។ អ៊ីរ៉ង់ថាខ្លួននឹងចាត់វិធានការឆ្លើយតបយ៉ាងម៉ឺងម៉ាត់បំផុតបើសិនអាមេរិកពិតជាវាយប្រហារខ្លួនមែននោះ។ ការថ្លែងដូច្នេះស្របពេលដែលកងនាវាចម្បាំងរបស់អាមេរិក ដែលរួមទាំងនាវាដឹកយន្តហោះឈ្មោះយូអែសអែស អាប្រាហាម លីនខុន (USS Abraham Lincoln)…
ទីក្រុងតេអេរ៉ង់៖ មន្ត្រីរដ្ឋាភិបាលអ៊ីរ៉ង់ចេញសេចក្ដីព្រមានខ្លាំងៗជាថ្មីទៅអាមេរិក។ អ៊ីរ៉ង់ថាខ្លួននឹងចាត់វិធានការឆ្លើយតបយ៉ាងម៉ឺងម៉ាត់បំផុតបើសិនអាមេរិកពិតជាវាយប្រហារខ្លួនមែននោះ។ ការថ្លែងដូច្នេះស្របពេលដែលកងនាវាចម្បាំងរបស់អាមេរិក ដែលរួមទាំងនាវាដឹកយន្តហោះឈ្មោះយូអែសអែស អាប្រាហាម លីនខុន (USS Abraham Lincoln) ផងដែរបានទៅដល់តំបន់មជ្ឈិមបូព៌ាកាលពីពេលថ្មីៗនេះ។
តាមមើលទៅ ការកសាងកម្លាំងយោធារបស់អាមេរិកនៅមជ្ឈិមបូព៌ាលើកនេះមិនអាចមើលស្រាលបានឡើយ។ តួយ៉ាងដូចករណីស្រដៀងគ្នានេះធ្លាប់កើតមាននៅវេណេហ្ស៊ូអេឡារួចហើយ។ កាលនោះ អាមេរិកបញ្ជូនកងទ័ព និងនាវាចម្បាំងទៅហ៊ុមព័ទ្ធប្រទេសវេណេហ្ស៊ូអេឡា។ នៅបំផុត អាមេរិកវាយប្រហារវេណេហ្ស៊ូអេឡា និងចាប់ខ្លួនលោកម៉ាឌូរ៉ូទៅញូយ៉ក។
អនុប្រធានសភាអ៊ីរ៉ង់ជួបគណៈប្រតិភូសភាឥណ្ឌូណេស៊ីនៅពេលពួកគេទៅចូលរួមព្រឹត្តិការណ៍សំខាន់មួយនៅប្រទេសបារ៉េន។ ឆ្លៀតឱកាសនោះ លោកចោទប្រកាន់ថាលោកដូណាល់ត្រាំធ្វើឱ្យប៉ះពាល់ក្រឹត្យក្រមជាអន្តរជាតិដោយប្រព្រឹត្តអំពើឈ្លានពានផ្នែកយោធា និងកេងយកផលប្រយោជន៍ពីប្រទេសដទៃ។ មន្ត្រីខាងលើនេះថ្លែងថាអ៊ីរ៉ង់មិនដែលចាប់ផ្ដើមគំរាមកំហែងគេមុន ឬបង្កភាពតានតឹង និងការប្រឈមមុខគ្នាទេ។
ប៉ុន្តែមន្ត្រីរូបនេះក៏សូមព្រមានទុកជាមុនផងដែរថាអំពើឈ្លានពានមកលើអ៊ីរ៉ង់ទោះបីដោយផ្ទាល់ក្ដី ឬដោយប្រយោលក្ដីនឹងត្រូវយើងវាយបកវិញយ៉ាងម៉ឺងម៉ាត់ ជាបន្ទាន់ និងសមាមាត្រនឹងអ្វីដែលយើងទទួលរង។ យើងធ្វើដូច្នេះស្របតាមសិទ្ធិដែលគ្មាននរណាអាចហាមឃាត់បាន រួមទាំងស្របទៅតាមមាត្រា៥១នៃធម្មនុញ្ញអង្គការសហប្រជាជាតិ។ នេះបើយោងតាមអ្វីដែលទូរទស្សន៍ដកស្រង់ពាក្យសម្ដីរបស់លោកមកចាក់ផ្សាយ។
លោកថ្លែងបន្តទៀតថាលោកដូណាល់ត្រាំសូម្បីតែផលប្រយោជន៍របស់ប្រទេសសម្ព័ន្ធមិត្តក៏គាត់មិនដែលខ្វល់ខ្វាយផង។ គ្មានប្រទេសណាមួយទោះបីមានទំហំធំប៉ុណ្ណា មានអំណាចប៉ុណ្ណា ឬមានប្រវត្តិទំនាក់ទំនងជិតស្និទ្ធជាមួយអាមេរិកកម្រិតណាទេអាចទទួលយកបានឡើយនូវមហិច្ឆតា ការដាក់សម្ពាធ និងការគំរាមកំហែងរបស់គាត់៕ ប្រភព៖ អាល់ចាស៊ីរ៉ា (Al Jazeera) និងប្រភពដទៃទៀត
ចែករំលែកព័តមាននេះ