រាជធានីភ្នំពេញ ៖ កម្លាំងនគរបាលប៉ុស្តិ៍ដង្កោ បានធ្វើការឃាត់ខ្លួនក្មេងទំនើង២នាក់ក្នុងចំណោមគ្នា៧នាក់ដែលមានរហស្សនាថា«ក្រុមចំការដូងហៅកាត់ជាភាសាអង់គ្លេស (CKD)» ក្រោយពីក្រុមក្មេងទំនើងខាងលើធ្វើសកម្មភាពស្ទាក់វាយនិងគប់ដុំថ្មលើបុរសម្នាក់និងក្មួយប្រុស បណ្ដាលឲ្យរងរបួស ។
អំពើហិង្សាដោយចេតនាមានស្ថានទម្ងន់ទោសនោះ៧៧បានកើតឡើង កាលពីវេលាម៉ោង០១និង២០នាទីយប់រំលងអាធ្រាត្រឈានចូលថ្ងៃទី២៣ ខែមករា ឆ្នាំ២០២៦ នៅតាមផ្លូវបេតុង ស្ថិតនៅក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ។
ក្មេងទំនើងដែលត្រូវនគរបាលឃាត់ខ្លួននោះ ម្នាក់ឈ្មោះ រ៉ាត់ សុផានុត ភេទប្រុស អាយុ១៥ឆ្នាំ ជនជាតិខ្មែរ និងម្នាក់ទៀតឈ្មោះ វិចិត្រ ចុងអ៊ីម ភេទប្រុស អាយុ១៧ឆ្នាំ ជនជាតិខ្មែរ អ្នកទាំង២មានទីលំនៅភូមិកើតហេតុខាងលើ ។
ចំណែកបក្ខពួក៥នាក់ទៀតកំពុងគេចខ្លួនរួមមាន១/ឈ្មោះ ព្រែក វិទូ ភេទប្រុស អាយុប្រមាណ១៧ឆ្នាំ ២/ឈ្មោះ ម៉ៅ សុខមៀន ភេទប្រុស អាយុប្រមាណ១៥ឆ្នាំ ៣/ឈ្មោះ រ៉ាត់ សុធារ៉ា ភេទប្រុស អាយុប្រមាណ១៧ឆ្នាំ ៤/ឈ្មោះ រដ្ឋា ភេទប្រុស អាយុប្រមាណ១៥ឆ្នាំ ៥/ឈ្មោះ លាភ ភេទប្រុស អាយុប្រមាណ១៧ឆ្នាំ ។
បុរសរងគ្រោះឈ្មោះ ស៊ឹប ចន្នា អាយុ៣៦ឆ្នាំ ជនជាតិខ្មែរ មុខរបរ ជាងផ្សាដែក និងប្រុសក្មួយឈ្មោះ ងឹម សម្បត្តិ អាយុ១៥ឆ្នាំ ស្នាក់នៅបន្ទប់ជួល ផ្លូវបេតុង ភូមិខ្វា សង្កាត់ដង្កោ ខណ្ឌដង្កោ ។
នគរបាលបានប្រាប់ឲ្យដឹងថា កាលពីវេលាម៉ោង១២និង៣០នាទីយប់រំលងអាធ្រាត្រឈានចូលថ្ងៃទី២៣ ខែមករា ឆ្នាំ២០២៦ បុរសរងគ្រោះបានជិះម៉ូតូ០១គ្រឿងម៉ាក HONDA DREAM C១២៥ ពណ៌ខ្មៅ ពាក់ស្លាកលេខភ្នំពេញ1IY-1953 ។ ឌុបក្មួយប្រុសចេញពីធ្វើការនៅកោះពេជ្រ ស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញឆ្ពោះទៅបន្ទប់ជួលនៅជិតកន្លែងកើតហេតុខាងលើ ។ លុះពេលទៅជិតដល់បន្ទប់ជួល ស្រាប់តែក្រុមក្មេងទំនើងខាងលើមានគ្នាចំនួន០៧នាក់ បានធ្វើសកម្មភាពយកដុំថ្មគប់មកលើជនរងគ្រោះទាំង២នាក់ពូនិងក្មួយ បណ្ដាលឲ្យត្រូវក្បាលក្មួយប្រុស ប៉ុន្តែបានមួកសុវត្ថិភាពជួយការពារ ទើបគ្មានរបួសធ្ងបន់ធ្ងរ ហើយជនរងគ្រោះក៏បានឈប់ម៉ូតូ ។
នគរបាលបានប្រាប់ឲ្យដឹងបន្តថា ខណៈនោះក្រុមក្មេងទំនើងខាងលើក៏បាននាំគ្នារត់ទៅលោតធាក់ជនរងគ្រោះបណ្តាលឲ្យដួលទាំងមនុស្សនិងម៉ូតូ បន្ទាប់មកបានយកដែកបំពង់ទីបមូល និងដុំថ្ម ព្រួតគ្នាវាយទៅលើជនរងគ្រោះ ទាំង២នាក់ពូនិងក្មួយ ។ បណ្តាលឲ្យបុរសជាពូរងរបួសហើមក្រោមភ្នែកខាងឆ្វេង, ហើមក្បាលផ្នែកខាងក្រោយ , ដាច់រលាត់លើខ្នងផ្នែកខាងស្តាំ និងដាច់រលាត់លើក្បាលជង្គង់ខាងស្តាំ ។ ចំណែកក្មួយប្រុសរងរបួសដាច់រលាត់លើក្បាលជង្គង់ទាំងសងខាង និងដាច់រលាច់លើកែងដៃខាងឆ្វេង រួចជនសង្ស័យក៏នាំគ្នារត់គេចខ្លួនបាត់ ស្រមោលអស់ ។
នគរបញ្ជាក់ប្រាប់ថា លុះដល់ថ្ងៃទី២៥ ខែមករា ឆ្នាំ២០២៦ វេលាម៉ោង១៧និង៣០នាទីល្ងាច ខណៈជនរងគ្រោះកំពុងឈរនៅខាងមុខបន្ទប់ជួល ក៏ឃើញក្រុមក្មេងទំនើងរហស្សនាម «ក្រុមចំការដូងហៅកាត់ជាភាសាអង់គ្លេស (CKD)» នេះ ដើរកាត់មុខបន្ទប់ជួលខាងលើ ហើយស្រែកគំរាមកំហែងដោយពាក្យផ្សេងៗសម្លុតទៅលើបុរសរងគ្រោះថែមទៀត ។
ទើបពេលនោះជនរងគ្រោះទូរស័ព្ទរាយការណ៍ប្រាប់កម្លាំងប៉ុស្តិ៍នគរបាលរដ្ឋបាលដង្កោ ឲ្យជួយអន្តរាគមន៍ ហើយរហូតដល់វេលាម៉ោង១៧និង៥០នាទីល្ងាច ថ្ងៃខែឆ្នាំដដែល កម្លាំងប៉ុស្តិ៍នគរបាលរដ្ឋបាលដង្កោ ក្រោមការបញ្ជានិងដឹកនាំដោយលោកវសេនីយ៍ឯកជឹម ស៊ីថា អធិការនគរបាលខណ្ឌដង្កោ ។ ក៏បានចុះទៅឃាត់ខ្លួនបានចំនួន០២នាក់នៅតាមផ្លូវភូមិខ្វាសង្កាត់ដង្កោ បន្ទាប់មកក៏នាំយកទៅធ្វើការសាកសួរនៅប៉ុស្តិ៍នគរបាលរដ្ឋបាលដង្កោ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមនិតិវិធីច្បាប់ ៕
ចែករំលែកព័តមាននេះ