ខេត្តតាកែវ ៖ ដីបឹងខ្ពកត្របែក ដែលជាបឹងប្រវត្តិសាស្ត្រស្ថិតនៅភូមិស្ទឹង ឃុំអូសារ៉ាយ ស្រុកត្រាំកក់ ខេត្តតាកែវ ចំនួន១៣៦ហិចតា ជារបស់រដ្ឋត្រូវបានក្រុមអាជ្ញាធរគប់គិតគ្នាហែកចែកគ្នាស៊ីដោយអោយលោកហ៊ូ សារ៉ាន់…
ខេត្តតាកែវ ៖ ដីបឹងខ្ពកត្របែក ដែលជាបឹងប្រវត្តិសាស្ត្រស្ថិតនៅភូមិស្ទឹង ឃុំអូសារ៉ាយ ស្រុកត្រាំកក់ ខេត្តតាកែវ ចំនួន១៣៦ហិចតា ជារបស់រដ្ឋត្រូវបានក្រុមអាជ្ញាធរគប់គិតគ្នាហែកចែកគ្នាស៊ីដោយអោយលោកហ៊ូ សារ៉ាន់ ជាអាជីវករលក់កង់ផ្សារអង្គតាសោម ជាអ្នកកាន់កាប់និងបន្តពុះជ្រៀករៀបចំចុះបញ្ជីជាលក្ខណៈប្រពន្ធ័ចំនួន៩ក្បាលដី ដោយអ្នកឈរឈ្មោះសុទ្ធសឹងជាបងជាប្អូនជាកូនរបស់លោកហ៊ូ សារ៉ាន់ ទាំងអស់ គឺចែកគ្នាយកហ្មត់ដូចអាចម៌ទីទុយទៅហើយ។
ប្រភពពីប្រជាពលរដ្ឋបានអោយដឹងទៀតថា លោកហ៊ូ សារ៉ាន់ បានប្រើអំណាចយកឈ្មោះអ្នកធំមកគំរាមសម្លុតថា ពលរដ្ឋណាមិនព្រមលក់ដីអាស្រ័យផលរបស់រដ្ឋទៅអោយលោកទេក៏លោកនៅតែច្បាមយកដែរចង់ទៅប្ដឹងដល់ណាក៏ប្តឹងទៅ ។ ដូច្នេះពលរដ្ឋក៏សម្រេចចិត្តលក់ដីអាស្រ័យផលរបស់ពួកគាត់ក្នុងតម្លៃថោកបំផុតដោយក្នុង១ហិចតាត្រឹម១០០០ដុល្លារនោះទេ។
ជុំវិញករណីខាងលើលោកងួន ប៉ិត មេភូមិស្ទឹងបានអោយអ្នកកាសែតដឹងថាប្រជាពលរដ្ឋពិតជាបានលក់ដីអាស្រ័យផលលើដីរដ្ឋអោយទៅឈ្មោះលោក ហ៊ូ សារ៉ាន់ ពិតមែនដោយក្នុង១ហិចតាត្រឹម១០០០ដុល្លានោះទេហើយលោកមេភូមិក៏ទទួលស្គាល់ថាលោកបានចុះហត្ថលេខាបោះត្រាជាមួយនិងលោកមេឃុំផងដែរ។
ចំណែកលោកអ៊ី វ៉ាន មេឃុំអូសារ៉ាយបានអោយដឹងថាលោកដឹងថាដីខាងលើជាដីអាស្រ័យផលរបស់រដ្ឋមែនតែលោកបានចុះទៅវាស់វែងកាត់ឆ្វៀលជាមួយលោកណុប សុភ័ណ្ឌប្រធានការិយាល័យធនធានទឹកស្រុកត្រាំកក់លោកលន់ ហ៊ួតប្រធានការិយាល័យភូមិបាលស្រុកត្រាំកក់និងលោកកៅវគ្គ ស៊ែលអតីតចៅហ្វាយស្រុកត្រាំកក់តែលោកមិនបានឃើញលិខិតស្នាមពីថ្នាក់លើនោះទេតែលោកត្រឹមមេឃុំគេអោយទៅធ្វើ ក៏ទៅតាមគេទៅ។
ពាក់ពន្ធ័ករណីនេះដែរនាក់កាសែតមិនអាចសុំការបំភ្លឺពីលោកណុប សុភណ្ឌ័ ប្រធានការិយាល័យធនធានទឹកស្រុកត្រាំកក់បានទេ ដោយគ្មានលេខទូរសព្ទ័ ចំណែកលោកលន់ ហ៊ួត ប្រធានការិយាល័យភូមិបាលស្រុកត្រាំកក់ បានអោយដឹងថាលោកមិនបានចុះវាស់វែងចុះបញ្ជីជាប្រពន្ធ័ទេ គឺខាងមន្ទីសុរិយោដីខេត្តដឹកនាំដោយលោកឃួន ប៊ុនថេង ជាប្រធានក្រុមលេខ១០ជាអ្នកចុះវាស់វែង។
ចំណែកលោកកៅ វគ្គស៊ែល អតីតចៅហ្វាយស្រុកត្រាំកក់ បច្ចុប្បន្នចៅហ្វាយស្រុកសំរោងបានអោយដឹងថា លោកមិនបានដឹងក្នុងរឿងនេះទេ សូមអ្នកកាសែតសួរទៅលោកលន់ ហ៊ួត ប្រធានការិយាល័យភូមិបាលស្រុកត្រាំកក់ទៅ។
ជុំវិញបញ្ហាខាងលើលោកឃុន ប៊ុនថេង ប្រធានក្រុមចុះវាស់វែងជាប្រពន្ធ័ក្រុមទី១០បានអោយដឹងថាលោកចុះទៅវាស់វែងនេះជាដំណាក់កាលទីពីរទេ ហើយបានកំណត់ក្បាលដីរួចហើយតែនៅមិនទាន់បានបិតផ្សាយនៅឡើយទេរង់ចាំដំណាក់កាលទីបីទើបអាចបិតផ្សាយបានប្រសិនជាលេខក្បាលដីណាមានភាពមិនប្រក្រតីអ្នកពាក់ពន្ធ័អាចប្ដឹងជំទាស់បាន។ ចំណែកមេខត្តស្ងាត់ឈឹង…ហេ! ហេ! ។
ចំណែកលោកនួន សុធាប្រធានមន្ទីសុរិយោដីសំណង់និងនគរូបនីយកម្មបានអោយដឹងថាប្រសិនបើដី១៣៦ហិចតា ស្ថិតនៅចំណុចខាងលើជាដីពលរដ្ឋអាស្រ័យផលលើដីសាធារណៈរបស់រដ្ឋមែនគ្មានអស់លោកណាហ៊ានសម្រេចចុះទៅវាស់វែងនោះទេ គឺទាល់តែមាន ស.ជ.ណ របស់ប្រមុខរាជរដ្ឋាភិបាលសម្រេចទើបអស់លោកមន្ដ្រីពាក់ពន្ធ័ចុះទៅវាស់វែងបាន។
លោកប្រធានមន្ទីបានបន្តទៀតថាលោកនិងធ្វើកាស្រាវជ្រាវនេះបន្តទៀតហើយលោកនិងផ្តល់ព័ត៏មានបន្ថែមជូនទៅអ្នកកាសែតដើម្បីអោយមានតម្លាភាព ។
ព័ត៌មានបន្តនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ