សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសថា លោកនឹងដំឡើងពន្ធគយលើការនាំចូលទំនិញរបស់កូរ៉េខាងត្បូងដល់…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសថា លោកនឹងដំឡើងពន្ធគយលើការនាំចូលទំនិញរបស់កូរ៉េខាងត្បូងដល់ ២៥% បន្ទាប់ពីលោកបានអះអាងថា ទីក្រុងសេអ៊ូលមិនបានគោរពតាមកិច្ចព្រមព្រៀងពាណិជ្ជកម្ម ដែលសម្រេចបានកាលពីឆ្នាំមុន។ នេះបើយោងតាមប្រភពពី BBC និង Reuters នៅថ្ងៃទី២៧ ខែមករា ឆ្នាំ២០២៦។
នៅក្នុងការបង្ហោះសារមួយលើបណ្តាញសង្គម លោក ត្រាំ អះអាងថា លោកនឹងបង្កើនពន្ធគយលើកូរ៉េខាងត្បូងពី ១៥% ដល់ ២៥% លើទំនិញ និងផលិតផលជាច្រើនប្រភេទ រួមទាំងរថយន្ត ឈើ ឱសថ និងទំនិញស្ថិតក្នុងកិច្ចព្រមព្រៀងពន្ធគយទៅវិញទៅមកទាំងអស់ផងដែរ។ លោកថ្លែងថា កូរ៉េខាងត្បូងមានភាពយឺតយ៉ាវនៅក្នុងការអនុម័តកិច្ចព្រមព្រៀងនេះ ខណៈពេលដែលអាមេរិកបានធ្វើសកម្មភាពយ៉ាងសកម្ម និងរហ័ស ដើម្បីកាត់បន្ថយពន្ធគយ ស្របតាមប្រតិបត្តិការដែលបានព្រមព្រៀងគ្នា។
យ៉ាងណាមិញ កូរ៉េខាងត្បូងបានអះអាងថា ខ្លួនមិនទាន់ត្រូវបានជូនដំណឹងជាផ្លូវការអំពីការសម្រេចចិត្តដំឡើងពន្ធលើទំនិញមួយចំនួនរបស់ខ្លួននៅឡើយទេ ហើយចង់ពិភាក្សាជាបន្ទាន់ជាមួយអាមេរិកលើបញ្ហានេះ។ ដោយបានបន្ថែមថា រដ្ឋមន្ត្រីឧស្សាហកម្មកូរ៉េខាងត្បូង លោក គីម ជុង-ក្វាន (Kim Jung-kwan) ដែលបច្ចុប្បន្នកំពុងស្ថិតនៅប្រទេសកាណាដា នឹងទៅបំពេញទស្សនកិច្ចទីក្រុងវ៉ាស៊ីនតោនឱ្យបានឆាប់តាមដែលអាចធ្វើទៅបាន ដើម្បីជួបជាមួយរដ្ឋមន្ត្រីពាណិជ្ជកម្មអាមេរិក លោក ហូវើដ លូតនិក (Howard Lutnick)។
គួររំលឹកថា កូរ៉េខាងត្បូង និងសហរដ្ឋអាមេរិក បានឈានដល់កិច្ចព្រមព្រៀងមួយកាលពីខែតុលា ឆ្នាំមុន ដែលរួមមានការសន្យាពីកូរ៉េខាងត្បូងក្នុងការវិនិយោគចំនួន ៣៥០ ពាន់លានដុល្លារនៅសហរដ្ឋអាមេរិក ដែលខ្លះនឹងត្រូវប្រើសម្រាប់ការសាងសង់នាវា។ នៅខែបន្ទាប់ ប្រទេសទាំងពីរបានព្រមព្រៀងគ្នាថា សហរដ្ឋអាមេរិកនឹងកាត់បន្ថយពន្ធលើទំនិញមួយចំនួន នៅពេលដែលកូរ៉េខាងត្បូងចាប់ផ្តើមដំណើរការអនុម័តកិច្ចព្រមព្រៀងនេះ។
កិច្ចព្រមព្រៀងនេះ ត្រូវបានដាក់ជូនទៅរដ្ឋសភាកូរ៉េខាងត្បូង ថ្ងៃទី២៦ ខែវិច្ឆិកា ហើយបច្ចុប្បន្នកំពុងត្រូវបានពិនិត្យឡើងវិញ។ តាមប្រព័ន្ធផ្សព្វផ្សាយកូរ៉េខាងត្បូងរាយការណ៍ថា កិច្ចព្រមព្រៀងនេះ ទំនងជាត្រូវអនុម័តនៅក្នុងខែកុម្ភៈ ខាងមុខនេះ៕
ចែករំលែកព័តមាននេះ