ខេត្តប៉ៃលិន ៖ ប្រជាពលរដ្ឋជាច្រើននាក់ កំពុងនាំគ្នាអង្គុយទទួលទានអាហារសុខៗ ស្រាប់តែក្រឡេកមើលទៅក្បែរជើងភ្នំ ឃើញមានផ្សែង និងអណ្តាតភ្លើងហុយទ្រលោមឆាបឆេះយ៉ាងសន្ធោសន្ធៅកាន់តែខ្លាំងឡើងៗ ទើបម្នាក់ៗ នាំគ្នារត់ទៅជួយពន្លត់។ តែដោយសារមានស្មៅងាប់ច្រើននៅតាមចម្ការ…
ខេត្តប៉ៃលិន ៖ ប្រជាពលរដ្ឋជាច្រើននាក់ កំពុងនាំគ្នាអង្គុយទទួលទានអាហារសុខៗ ស្រាប់តែក្រឡេកមើលទៅក្បែរជើងភ្នំ ឃើញមានផ្សែង និងអណ្តាតភ្លើងហុយទ្រលោមឆាបឆេះយ៉ាងសន្ធោសន្ធៅកាន់តែខ្លាំងឡើងៗ ទើបម្នាក់ៗ នាំគ្នារត់ទៅជួយពន្លត់។ តែដោយសារមានស្មៅងាប់ច្រើននៅតាមចម្ការ លុះខ្យល់បក់បោកមកពីទិសខាងជើងកាន់តែធ្វើឱ្យអណ្តាតភ្លើងស្ទុះហក់ឡើងខ្ពស់ និងឆាបឆេះដំណាំស្វាយអស់ជាង១០០ដើម ទើបហៅរថយន្តពន្លត់អគ្គិភ័យចូលទៅជួយពន្លត់ទាន់ពេលវេលា ។
ហេតុការណ៍ភ្លើងឆេះព្រៃភ្នំរាលដាលឆេះដំណាំស្វាយប្រជាពលរដ្ឋនេះ បានកើតឡើងកាលពីព្រឹកថ្ងៃទី២៣ ខែមករា ឆ្នាំ២០២៦ ស្ថិតនៅក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
បើតាមប្រភពព័ត៌មានពីកសិករម្នាក់ ឈ្មោះ ម៉ៅ ភេទប្រុស បានរៀបរាប់ឱ្យដឹងថា នៅវេលាម៉ោងប្រហែល១១ និង៣០នាទីព្រឹក ថ្ងៃទី២៣ ខែមករា ឆ្នាំ២០២៦ ខណៈដែលប្រជាពលរដ្ឋ ក៏ដូចជាអ្នកភូមិនាំគ្នាធ្វើដំណើរត្រឡប់ពីចម្ការទៅផ្ទះរៀងៗខ្លួន ដោយនាំគ្នាហូបអាហារពេលព្រឹក ស្រាប់តែមួយសន្ទុះក្រោយមក គេឃើញមានហុយផ្សែងចេញពីជើងភ្នំខាងលើ លាយឡំដោយខ្យល់បក់មកពីទិសខាងជើង ទើបធ្វើឱ្យអណ្តាតភ្លើងឆេះកាន់តែខ្លាំងឡើងៗ រហូតដល់រីករាលដាលឆ្ពោះទៅកាន់ភ្នំតូចធំភូមិអូរឈើក្រំ ។
ប្រភពបន្តទៀតថា ស្របពេលដែលដំណាំចំការស្វាយកែវរមៀតរបស់ប្រជាពលរដ្ឋនៅក្បែរនោះមានស្លឹកស្វាយងាប់ ក៏ត្រូវភ្លើងឆាបឆេះចូលទៅក្នុងចម្ការ បណ្តាលឱ្យខូចខាតដើមស្វាយអស់ចំនួន១៣០ដើម។ ហើយដោយសារតែភ្លើងឆេះរាលដាលមិនអាចពន្លត់បាន ទើបប្រជាពលរដ្ឋនៅក្នុងភូមិ ក៏ដូចជាអាជ្ញាធរមូលដ្ឋានខាងលើ បានទាក់ទងទៅរថយន្តពន្លត់អគ្គិភ័យខេត្តប៉ៃលិន ឱ្យចេញអន្តរាគមន៍បាញ់ទឹកពន្លត់ ដើម្បីកុំឱ្យរាលដាលចូលទៅដល់ផ្ទះរបស់ប្រជាពលរដ្ឋនៅក្បែរនោះ ។
ប្រភពដដែលបានបញ្ជាក់ទៀតថា អគ្គិភ័យដែលឆាបឆេះនេះ គឺចាប់តាំងពីព្រឹករហូតដល់ម៉ោង៤និង៤០នាទីរសៀល ដោយឆេះពីភ្នំមួយឆ្លងទៅភ្នំមួយទៀត ដែលជាហេតុធ្វើឱ្យប្រជាពលរដ្ឋ និងម្ចាស់ផ្ទះ ម្ចាស់ចំការដំណាំនៅក្បែរៗ នោះនាំគ្នាព្រលឹងចុងសក់ ហើយក្រោយមករថយន្តពន្លត់អគ្គិភ័យជាច្រើនគ្រឿង ក៏បានចូលទៅជួយបាញ់ទឹកពន្លត់ទាន់ពេលវេលា ។
មន្ត្រីនគរបាលដាក់ការសង្ស័យថា មានអ្នកដើររកឃ្មុំព្រៃ ដុតភ្លើងភ្លេចពន្លត់ ទើបបណ្តាលឱ្យឆាបឆេះរាលដាលបែបនេះ។ ម្យ៉ាងវិញទៀត អាចមានអ្នកជក់បារី ដែលដើរនៅតាមព្រៃភ្នំ ស្វែងរកសត្វព្រៃបោះចោលកន្ទុយបារីទៅលើស្មៅងាប់ ក៏អាចបង្កជាភ្លើងឆេះព្រៃបែបនេះបានដែរ។ ទោះបីជាយ៉ាងណា ក្រុមនគរបាលពន្លត់អគ្គិភ័យក៏ខិតខំប្រឹងប្រែងដឹកជញ្ជូនទឹកយកទៅបាញ់ពន្លត់អស់ជាច្រើនរថយន្ត ទើបអាចគ្រប់គ្រងស្ថានការណ៍នេះបាន ៕
ចែករំលែកព័តមាននេះ