រាជធានីភ្នំពេញ ៖ ផ្ទុះរាតត្បាតជំងឺ នីប៉ាហ៍ នៅប្រទេសឥណ្ឌា ឆ្លងអ្នកជំងឺ៥នាក់ ក្នុងនោះ២នាក់ជាពេទ្យ។ ជំងឺនីប៉ាហ៍ គឺជាជំងឺបង្កឡើងដោយវីរុសដ៏ធ្ងន់ធ្ងរ ហើយអាចបណ្តាលឲ្យស្លាប់បាន។…
រាជធានីភ្នំពេញ ៖ ផ្ទុះរាតត្បាតជំងឺ នីប៉ាហ៍ នៅប្រទេសឥណ្ឌា ឆ្លងអ្នកជំងឺ៥នាក់ ក្នុងនោះ២នាក់ជាពេទ្យ។ ជំងឺនីប៉ាហ៍ គឺជាជំងឺបង្កឡើងដោយវីរុសដ៏ធ្ងន់ធ្ងរ ហើយអាចបណ្តាលឲ្យស្លាប់បាន។ វីរុសនីប៉ាហ៍ រីករាលដាលដោយផ្ទុកលើសត្វប្រចៀវ និងសត្វច្រឹង និងអាចឆ្លងមកមនុស្ស និងជ្រូក នេះបើយោងតាមប្រភពពីនាយកដ្ឋានប្រយុទ្ធនឹងជំងឺឆ្លង CDC របស់កម្ពុជា ចេញផ្សាយនៅថ្ងៃទី២៤ ខែមករា ឆ្នាំ២០២៦នេះ ។
នាយកដ្ឋានប្រយុទ្ធនឹងជំងឺឆ្លង បានឲ្យដឹងបន្តថា វាអាចឆ្លងពីមនុស្សម្នាក់ ទៅមនុស្សម្នាក់ទៀត តាមរយៈការប៉ះពាល់ផ្ទាល់ តាមរយៈទឹកសរីរាង្គមនុស្ស។ អ្នកឆ្លងជំងឺនេះ មានអត្រាស្លាប់ ចន្លោះពី ៤០%–៧០% ។
នាយកដ្ឋានប្រយុទ្ធនឹងជំងឺឆ្លង បន្តទៀតថា ការផ្ទុះឡើង នៃជំងឺនីប៉ាហ៍ កើតឡើងស្ទើរតែជារៀងរាល់ឆ្នាំ នៅក្នុងតំបន់មួយចំនួន នៃទ្វីបអាស៊ីខាងត្បូង កើតជាញឹកញាប់នៅក្នុងប្រទេសបង់ក្លាដែស និងឥណ្ឌា។ ជំងឺនេះក៏ធ្លាប់ផ្ទុះនៅប្រទេសម៉ាឡេស៊ី ហ្វីលីពីន និងសឹង្ហបុរី ផងដែរ ជាពិសេស គឺនៅប្រទេសម៉ាឡេស៊ី ក្នុងឆ្នាំ១៩៩៩ ដែលបណ្ដាលឲ្យឈឺ ៣០០នាក់ ក្នុងនោះ១០០នាក់បានស្លាប់។ មនុស្សអាចឆ្លងមេរោគនីប៉ាន៍ តាមរយៈការប៉ះពាល់ផ្ទាល់ជាមួយសត្វ ដែលផ្ទុកមេរោគ ដូចជាប្រចៀវ ច្រឹង ឬជ្រូក ដែកមានផ្ទុកមេរោគនីប៉ាហ៍ ការទទួលទានអាហារ ឬភេសជ្ជៈ ដូចជាផ្លែឈើ ឬទឹកត្នោត ដែលប្រឡាក់ដោយសត្វ ដែលផ្ទុកមេរោគ ។
CDC បញ្ជាក់ថា ដើម្បីកាត់បន្ថយការឆ្លងមេរោគ តាមរយៈលាងដៃរបស់អ្នកឱ្យបានទៀងទាត់ជាមួយសាប៊ូ និងទឹក ចៀសវាងការប៉ះពាល់ជាមួយសត្វប្រចៀវ ច្រឹង ឬជ្រូកឈឺ ចៀសវាងការប៉ះពាល់ជាមួយឈាម ឬសារធាតុរាវក្នុងរាងកាយរបស់អ្នកជំងឺ ដែលមានមេរោគ Nipah ។ អ្នកដែលមានជំងឺ Nipah ជាធម្មតាឈឺរយៈពេល ៣ ទៅ ១៤ថ្ងៃ ដោយមានគ្រុនក្តៅ ឈឺក្បាល ក្អក ឈឺបំពង់ក និងពិបាកដកដង្ហើម។ ក្រោយមក នៃការឆ្លងមេរោគ មនុស្សមួយចំនួនអាចជួបប្រទះនឹងការហើមខួរក្បាល ឬរលាកខួរក្បាល ដែលរោគសញ្ញាធ្ងន់ធ្ងរអាចរួមមានការភាន់ច្រឡំ ងងុយដេក ប្រកាច់ ។ អ្នកដែលមានរោគសញ្ញាទាំងនេះអាចសន្លប់ក្នុងរយៈពេល ២៤-៤៨ម៉ោង ។
CDC បានបញ្ជក់បន្ថែមថា រហូតដល់ពេលនេះ ប្រទេសកម្ពុជា មិនដែលរកឃើញ ជំងឺ នីប៉ាហ៍ កើតលើមនុស្សនៅឡើយទេ តែនាយកដ្ឋានប្រយុទ្ធនឹងជំងឺឆ្លង កំពុងយកចិត្តដាក់ធ្វើការតាមដាន និងត្រៀមលក្ខណៈឆ្លើយតបនឹងការរាត្បាតជំងឺនេះជាប់ជានិច្ច ។ ក្នុងករណីសង្ស័យសូមផ្ដល់ព័ត៌មានបន្ថែមមកលេខ ១១៥ ឬ ០១២៤៨៨៩៨១ ដោយមិនគិតថ្លៃ ៕
ចែករំលែកព័តមាននេះ