ចំណេះដឹង៖ យោងតាមការផ្សាយរបស់សារព័ត៌មានបរទេស ការបន្ថែមគ្រឿងក្នុង CV ឬការបំផ្លើសសមត្ថភាពឱ្យលើសពីការិតពិត មើលទៅហាក់ដូចជាផ្លូវកាត់ដើម្បីទទួលបានការងារដែលអ្នកស្រមៃចង់បាន។ ប៉ុន្តែ នៅក្នុងសម័យកាលដែលក្រុមហ៊ុននីមួយៗមានប្រព័ន្ធត្រួតពិនិត្យយ៉ាងម៉ឺងម៉ាត់ “ការភូតកុហក” គឺជាគ្រាប់បែកពេលវេលាដែលអាចផ្ទុះបំផ្លាញកេរ្តិ៍ឈ្មោះ និងអនាគតរបស់អ្នកបានគ្រប់ពេល។

ផលវិបាកទីមួយគឺ ការបាត់បង់ទំនុកចិត្តតាំងពីវគ្គសម្ភាសន៍។ អ្នកសម្ភាស​ដែលមានបទពិសោធ​ នឹងប្រើប្រាស់បច្ចេកទេសសាកសួរដែលទម្លាយឱ្យឃើញពីភាពមិនច្បាស់លាស់របស់អ្នកភ្លាមៗ ហើយនៅពេលពួកគេចាប់បានថាអ្នកកុហក ឱកាសរបស់អ្នកនឹងក្លាយជាសូន្យ។ ទីពីរគឺ ការធ្លាក់ក្នុងស្ថានភាពស្ត្រេសខ្លាំង។ ប្រសិនបើអ្នកចៃដន្យបានចូលធ្វើការ ការព្យាយាមធ្វើការងារដែលលើសពីសមត្ថភាពពិតរបស់អ្នក នឹងធ្វើឱ្យអ្នកហត់នឿយ និងមានសម្ពាធផ្លូវចិត្តយ៉ាងធ្ងន់ធ្ងរ ព្រោះអ្នកត្រូវចំណាយពេលលាក់បាំងការពិតផង និងរៀនការងារថ្មីដែលអ្នកធ្លាប់អះអាងថាចេះផង។

អ្វីដែលគ្រោះថ្នាក់បំផុតគឺ ការខូចកេរ្តិ៍ឈ្មោះក្នុងវិស័យការងារ​។ ក្រុមហ៊ុនធំៗតែងតែមានការទំនាក់ទំនងគ្នា ហើយប្រសិនបើអ្នកត្រូវបានគេបណ្ដេញចេញដោយសារការភូតកុហក វានឹងក្លាយជា “ស្នាមប្រឡាក់” ដែលតាមលងបន្លាចអ្នករាល់ពេលដាក់ពាក្យនៅកន្លែងថ្មី។ ក្រៅពីនេះ អ្នកក៏នឹង បាត់បង់ឱកាសក្នុងការរៀនសូត្រពិតប្រាកដ ព្រោះអ្នករវល់តែសម្ដែងឱ្យគេឃើញថាអ្នកជាមនុស្សពូកែ។

ការកសាងអាជីពដោយផ្អែកលើភាពស្មោះត្រង់ និងការអភិវឌ្ឍសមត្ថភាពពិតប្រាកដ គឺជាវិធីសាស្ត្រតែមួយគត់ដែលនាំអ្នកទៅរកភាពជោគជ័យប្រកបដោយនិរន្តរភាព និងមោទនភាព​៕