ព្រឹកស្អែក រដ្ឋបាលខេត្តឧត្តរមានជ័យ នឹងសម្ពោធជាផ្លូវការ ព្រះបដិមាលោកេស្វរៈ
ខេត្តឧត្ដរមានជ័យ ៖ លោក មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ បានឲ្យដឹងថា ពិធីសម្ពោធជាផ្លូវការ ព្រះបដិមាលោកេស្វរៈនឹងចាប់ផ្ដើមនៅស្អែកនេះ…
ខេត្តឧត្ដរមានជ័យ ៖ លោក មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ បានឲ្យដឹងថា ពិធីសម្ពោធជាផ្លូវការ ព្រះបដិមាលោកេស្វរៈនឹងចាប់ផ្ដើមនៅស្អែកនេះ នាវេលាម៉ោង៦និង៣០នាទីព្រឹកថ្ងៃទី២៤ ខែមករា ឆ្នាំ២០២៦ នៅបរិវេណរង្វង់មូលដៃប្រាំបី ផ្ទាល់តែម្ដង ។
ពិធីនេះ នឹងមានការរាប់បាត្រព្រះសង្ឃចំនួន ១០៨អង្គ ដើម្បីឧទ្ទិសកុសល ជូនវិញ្ញាណក្ខន្ធវីរកងទ័ពកម្ពុជា ការពារព្រំដែន ដែលបានពលីជីវិតក្នុងបុព្វហេតុការពារជាតិមាតុភូមិ។ និងសូមអញ្ជើញបងប្អូនប្រជាពលរដ្ឋ និងសាធារណជនទាំងអស់ ដែលមានបំណងចូលរួម សូមមេត្តាចូលរួមក្នុងពិធីខាងលើតាមកម្លាំងសទ្ធាជ្រះថ្លារៀងៗខ្លួន។
យោងតាមលោក ឈួរ សុបញ្ញា រដ្ឋលេខាធិការក្រសួងធម្មការ និងសាសនា បានបង្ហោះក្នុងគណនីហ្វេសប៊ុក(Chhour Sopannha)របស់លោក ដោយបានពន្យល់ពីបដិមាព្រះពោធិសត្វលោកេស្វរៈ ដូច្នេះថា «បដិមាព្រះពោធិសត្វលោកេស្វរៈ ក្នុងព្រះពុទ្ធសាសនាមហាយាន និងប្រវត្តិសាស្ត្រខ្មែរ»ព្រះពោធិសត្វលោកេស្វរៈ គឺជាព្រលឹងនៃវប្បធម៌ខ្មែរ និងព្រះពុទ្ធសាសនាមហាយាន ដែលនៅតែមានតម្លៃខ្ពស់សម្រាប់ការអប់រំយុវជន ការដឹកនាំ និងការរស់នៅរបស់សង្គមខ្មែរសព្វថ្ងៃ។ បដិមាព្រះពោធិសត្វលោកេស្វរៈ គឺជាទេវរូបដ៏សំខាន់មួយនៃ ព្រះពោធិសត្វអវលោកេស្វរៈ ក្នុងព្រះពុទ្ធសាសនាមហាយាន និងវជ្រយាន។ ព្រះអង្គតំណាងឱ្យករុណាធម៌ខ្ពស់បំផុត និងការប្តេជ្ញាចិត្តក្នុងការជួយសង្គ្រោះសត្វលោកឲ្យរួចផុតពីទុក្ខវេទនា។ នៅក្នុងបរិបទជំនឿប្រជាជនខ្មែរ បច្ចុប្បន្ន ព្រះអង្គត្រូវបានគោរពសក្ការៈយ៉ាងទូលំទូលាយ ក្នុងនាមជា ព្រះអង្គដងទង់ដង្កើរ ដែលជារូបសញ្ញានៃមេត្តាករុណា និងការពារ។
ពាក្យ Avalokiteśvara (អវលោកេស្វរៈ) មានន័យថា ព្រះអាទិទេពនៃលោក ឬ ព្រះអាទិទេព ដែលមើលពីលើសត្វលោក។ អត្ថន័យនេះបង្ហាញថា ព្រះពោធិសត្វលោកេស្វរៈ គឺជាព្រះអង្គដែលមើលឃើញទុក្ខវេទនានៃសត្វលោកទាំងអស់ ដោយព្រះករុណាធម៌ និងប្រាជ្ញា ហើយមិនបោះបង់អ្នកណាម្នាក់ឡើយ។
នៅក្នុងទស្សនៈពុទ្ធសាសនាមហាយាន និកាយវជ្រយាននោះព្រះពោធិសត្វលោកេស្វរៈ គឺជាគំរូនៃ មហាករុណា ដែលលើសពីមេត្តាធម្មតា។ ព្រះអង្គប្តេជ្ញាមិនចូលនិព្វានដរាបណាសត្វលោកនៅតែរងទុក្ខ ហើយអាចបំលែងរូបរាងបានច្រើនទម្រង់ ដើម្បីសម្របសម្រួលទៅតាមស្ថានភាព និងសមត្ថភាពទទួលយកធម៌របស់សត្វលោកនីមួយៗ។ ដោយហេតុនេះ ព្រះពោធិសត្វលោកេស្វរៈ ត្រូវបានចាត់ទុកជាគំរូនៃការរស់នៅដើម្បីអ្នកដទៃ និងការលះបង់អត្តខ្លួន។
ក្នុងប្រវត្តិសាស្ត្រខ្មែរ បដិមាព្រះពោធិសត្វលោកេស្វរៈបានទទួលការគោរពយ៉ាងខ្លាំងក្លា ជាពិសេសក្នុងរាជ្យ ព្រះបាទជ័យវរ្ម័នទី៧ (ចុងសតវត្សទី១២ ដល់ដើមសតវត្សទី១៣)។ សម័យនេះ គឺជាសម័យកំពូលនៃព្រះពុទ្ធសាសនាមហាយាននៅកម្ពុជា ហើយព្រះបាទជ័យវរ្ម័នទី៧ ត្រូវបានយល់ថា ជាព្រះមហាក្សត្រដែលអនុវត្តគោលការណ៍ព្រះពោធិសត្វក្នុងការគ្រប់គ្រងប្រទេស។ ព្រះពុទ្ធសាសនាលទ្ធិមហាយាន គឺជាសាសនារបស់រដ្ឋ ដែលក្នុងនេះព្រះពោធិសត្វលោកកេស្វរៈបានបំពេញតួនាទីយ៉ាងសំខាន់ ដោយថែមទាំងមានការ គោរព និងមានជំនឿយ៉ាងលើសលប់នៅក្នុងសង្គមខ្មែរទៀតផង ។ នៅគ្រប់មជ្ឈដ្ឋានសង្គមខ្មែរមានរួមទាំងមេទ័ព និងព្រះមហាក្សត្រ តែងតែមានការគោរពបូជាដល់ព្រះពុទ្ធអង្គលោកកេស្វរៈពុំដែលអាក់ខាន ។ចម្លាក់ព្រះពោធិសត្វលោកេស្វរៈ រូបសាលាបារាំងចុងបូព៌ាប្រទេស (ម.ត ១៩៩៤)តាមឯកសារបានតំណាលឲ្យដឹងថា ព្រះពុទ្ធសាសនាហិនយានដែលព្រះអង្គបានចូលនិព្វានរួចទៅ ហើយនោះ ឯព្រះពុទ្ធនិយានមហាយានទ្រង់កំពុងត្រៀមព្រះកាយចូលព្រះនិព្វាននៅឡើយ ។ ការរងចាំមិនទាន់ចូលបរិនិព្វានរបស់ព្រះពោធិសត្វលោកកេស្វរៈ ដោយសារតែព្រះអង្គទុកពេលវេលាចង់ជួយមនុស្សលោកឲ្យរួចផុតពីគ្រោះថ្នាក់ ។ ព្រះពោធិសត្វលោកេស្វរៈ សព្វព្រះទ័យមិនទាន់ចង់ចូលនិព្វាន ព្រោះព្រះអង្គនៅមានការអាណិតអាសូរដល់ពុទ្ធបរិស័ទក្នុងការស្រោចស្រង់ មនុស្សលោកឲ្យបានច្រើន ។
បដិមាព្រះពោធិសត្វលោកេស្វរៈ ក្នុងសិល្បៈខ្មែរ សម័យបាយ័ន តែងតែមាននិមិត្តរូបជាក់លាក់៖
១. ព្រះហស្ត ២, ៤ ឬ ៨ តំណានូវសមត្ថភាពជួយសង្គ្រោះសត្វលោក
បានគ្រប់ទិស
២. កេតនភណ្ឌ ដែលកាន់ក្នុងព្រះហស្ត ដូចជា ផ្កាឈូក (ភាពបរិសុទ្ធ និងការត្រាស់ដឹង), គម្ពីរ (ប្រាជ្ញា និងព្រះធម៌), ថូ (ព្រះករុណាដែលបំពេញទុក្ខ) និងខ្សែផ្គាំ ឬខ្សែប្រាក់–មាស (ការភ្ជាប់សត្វលោកឲ្យរួចផុតពីទុក្ខ)
៣. ព្រះអមិតាភភគង់លើផ្នួងសក់ ដែលបង្ហាញថា ព្រះពោធិសត្វលោកេស្វរៈ ទទួលប្រាជ្ញាពីព្រះពុទ្ធអមិតាភ ដូចដែលឃើញក្នុង
បដិមា ប្រាជ្ញាបារមិតា
បដិមាព្រះពោធិសត្វលោកេស្វរៈ មិនមែនគ្រាន់តែត្រឹមជារូបសក្ការៈសាសនាប៉ុណ្ណោះទេ ប៉ុន្តែជាគំរូអប់រំសង្គមដ៏សំខាន់។ ព្រះអង្គបង្រៀនឲ្យមនុស្ស៖
-មានមេត្តាករុណាចំពោះអ្នកដទៃ
-ស្តាប់ទុក្ខ និងយល់ពីបញ្ហារបស់សង្គម
-ត្រូវចេះប្រើអំណាច និងតួនាទីដោយធម៌ ប្រាជ្ញា និងការទទួលខុសត្រូវ ៕
ចែករំលែកព័តមាននេះ