សហរដ្ឋអាមេរិក ៖ មន្ត្រីអាមេរិកម្នាក់ កាលពីថ្ងៃទី២២ ខែមករា ឆ្នាំ២០២៦ បានបង្ហើបថា រដ្ឋបាលលោកត្រាំ កំពុងអនុញ្ញាតឱ្យប្រទេសចិនទិញប្រេងឆៅរបស់ប្រទេសវ៉េណេស៊ុយអេឡា ប៉ុន្តែមានលក្ខខណ្ឌត្រូវទិញតាមតម្លៃទីផ្សារជំនួសឱ្យតម្លៃទាបជាងទីផ្សារ…
សហរដ្ឋអាមេរិក ៖ មន្ត្រីអាមេរិកម្នាក់ កាលពីថ្ងៃទី២២ ខែមករា ឆ្នាំ២០២៦ បានបង្ហើបថា រដ្ឋបាលលោកត្រាំ កំពុងអនុញ្ញាតឱ្យប្រទេសចិនទិញប្រេងឆៅរបស់ប្រទេសវ៉េណេស៊ុយអេឡា ប៉ុន្តែមានលក្ខខណ្ឌត្រូវទិញតាមតម្លៃទីផ្សារជំនួសឱ្យតម្លៃទាបជាងទីផ្សារ ដែលចិនធ្លាប់ទិញពីមុន ពោលគឺនៅមុនពេលសហរដ្ឋអាមេរិកដកប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) ចេញពីតំណែង។ នេះបើតាមការចេញផ្សាយពីទីភ្នាក់ងារសារព័ត៌មាន Reuters។
មន្ត្រីរដ្ឋបាលរូបនោះបង្ហើបប្រាប់ Reuters នៅក្នុងលក្ខខណ្ឌមិនបង្ហាញឈ្មោះថា ខណៈពេលដែលប្រេងឆៅនឹងត្រូវលក់ក្នុងទីផ្សារពិភពលោក រដ្ឋបាលលោក ត្រាំ បានទាមទារឱ្យប្រេងឆៅភាគច្រើនរបស់វ៉េណេស៊ុយអេឡា ត្រូវបានលក់ទៅឱ្យទីផ្សារក្នុងស្រុករបស់សហរដ្ឋអាមេរិក ដើម្បីធានាការផ្គត់ផ្គង់ និងការពារតម្លៃ ។
ស្របទៅតាមអ្វីដែលសហរដ្ឋអាមេរិកបានប្រកាសហើយថា នឹងគ្រប់គ្រងការលក់ប្រេងឆៅរបស់វេណេស៊ុយអេឡាដោយគ្មានកំណត់ បន្ទាប់ពីចាប់ខ្លួនលោក ម៉ាឌូរ៉ូ នៅថ្ងៃទី៣ ខែមករា ឆ្នាំ២០២៦។ លោក ត្រាំ ក៏បានបញ្ជាក់ថា ប្រទេសចិន រុស្ស៊ី ឬប្រទេសដទៃទៀតមានសិទ្ធិទិញប្រេងរបស់វ៉េណេស៊ុយអេឡា ដរាបណាឆ្លងកាត់សហរដ្ឋអាមេរិក។
មន្ត្រីអាមេរិករូបនោះបាននិយាយថា រដ្ឋបាលលោកត្រាំ កំពុងអនុញ្ញាតឱ្យប្រទេសចិនទិញប្រេងឆៅក្នុងតម្លៃទីផ្សារសមរម្យ មិនមែនតម្លៃអយុត្តិធម៌ និងទាបជាងទីផ្សារ ដែលលោក ម៉ាឌូរ៉ូ បានលក់ទៅឱ្យប្រទេសចិនដើម្បីសងបំណុលនោះទេ។
ប្រទេសចិន គឺជាអ្នកទិញប្រេងកំពូលរបស់វ៉េណេស៊ុយអេឡាអស់រយៈពេលជាច្រើនឆ្នាំមកហើយ ហើយការលក់ទៀតសោតបានជួយទីក្រុងការ៉ាកាស (Caracas) សងប្រាក់កម្ចីយ៉ាងច្រើនដល់ទីក្រុងប៉េកាំងនៅក្នុងកិច្ចព្រមព្រៀងប្រេង សម្រាប់ដោះបំណុល។
គួររំលឹកថា រដ្ឋមន្ត្រីក្រសួងថាមពលអាមេរិក លោកគ្រីស រ៉ាយត៍ (Chris Wright) កាលពីសប្តាហ៍មុន បានថ្លែងថា សហរដ្ឋអាមេរិកលក់ប្រេងឆៅវ៉េណេស៊ុយអេឡាបានប្រហែល៤៥ដុល្លារក្នុង១បារ៉ែល បើធៀបទៅនឹងតម្លៃប្រហែល៣១ដុល្លារ/បារ៉ែល ដែលប្រទេសនៅអាមេរិកឡាទីនមួយនេះទទួលបានក្រោមការដឹកនាំរបស់លោកម៉ាឌូរ៉ូ ដូច្នេះ បង្ហាញពីការកើនឡើងគួរឱ្យកត់សម្គាល់នៃប្រាក់ចំណូលរបស់វ៉េណេស៊ុយអេឡាពីការលក់ប្រេង ។
ការកែសម្រួលគោលនយោបាយនេះ គឺជាការផ្លាស់ប្តូរយុទ្ធសាស្ត្រដ៏សំខាន់មួយរបស់ទីក្រុងវ៉ាស៊ីនតោន ដើម្បីឆ្ពោះទៅរកឧស្សាហកម្មប្រេងរបស់វ៉េណេស៊ុយអេឡា ដោយមានគោលបំណងទាំងកំណត់ឥទ្ធិពលរបស់ចិន និងបង្កើនតម្លៃនាំចេញប្រេងឱ្យបានអតិបរមាសម្រាប់ប្រទេសមួយនេះ និងដៃគូលោកខាងលិចរបស់ខ្លួន ៕
ចែករំលែកព័តមាននេះ