រាជធានីភ្នំពេញ ៖ បុរសម្នាក់បានជិះម៉ូតូ ១គ្រឿង វ៉ាជែងខាងស្ដាំរថយន្តដឹកកញ្ចក់ ១គ្រឿង ស្រាប់តែមានម៉ូតូ ១គ្រឿងទៀត ជិះក្នុងទិសដៅស្របគ្នាវ៉ាជែងរថយន្តដែរ ទាក់ដៃចង្កូតគ្នា…
រាជធានីភ្នំពេញ ៖ បុរសម្នាក់បានជិះម៉ូតូ ១គ្រឿង វ៉ាជែងខាងស្ដាំរថយន្តដឹកកញ្ចក់ ១គ្រឿង ស្រាប់តែមានម៉ូតូ ១គ្រឿងទៀត ជិះក្នុងទិសដៅស្របគ្នាវ៉ាជែងរថយន្តដែរ ទាក់ដៃចង្កូតគ្នា បណ្ដាលឲ្យដួលខ្ទាតបុរសខាងលើចូលក្រោមកង់ដឹកកញ្ចក់នោះ ត្រូវរថយន្តកិនរងរបួសធ្ងន់ ចំណែកអ្នកជិះម៉ូតូ ដែលទាក់ដៃចង្កូតជាមួយម៉ូតូជនរងគ្រោះនោះ របួសស្រាល រួចជិះគេចខ្លួនបាត់ ។
ឧប្បត្តិហេតុនោះបានកើតឡើងកាលពីវេលាម៉ោង១០ព្រឹកថ្ងៃទី២២ ខែមករា ឆ្នាំ២០២៦ នៅលើផ្លូវបេតុង ស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
បើតាមបុរសអ្នកលក់ដូរនៅជិតកន្លែងកើតហេតុ បាននិយាយថា ជនជនរងគ្រោះរូបនោះ មិនត្រូវបានស្គាល់ឈ្មោះនោះទេ បានរងរបួសធ្ងន់ ដោយបាក់ដៃ និងបែកប្រអប់ដៃ ព្រមទាំងបែកក្បាល និងបែកទាំងមួកសុវត្ថិភាពថែមទៀតផង។ នៅមុនពេលកើតហេតុ គាត់បានឃើញបុរសរងគ្រោះ ជិះម៉ូតូ ១គ្រឿង ម៉ាក Honda Click ពណ៍ក្រហមលាយខ្មៅ ពាក់ស្លាកលេខ ភ្នំពេញ 1FG-2625 ធ្វើដំណើរក្នុងទិសដៅពីជើងទៅត្បូង វ៉ាជែងខាងស្ដាំរថយន្តដឹកកញ្ចក់១គ្រឿង ម៉ាកហ៊ីយ៉ានដាយ ពណ៌ស ពាក់ស្លាកលេខ ភ្នំពេញ 3C-1933 ដឹកកញ្ចក់ ។
បុរសនោះបាននិយាយបន្តថា ខណៈនោះក៏មានម៉ូតូ មិនចាំម៉ាក១គ្រឿងទៀត បើកស្របគ្នាបានឡើងវ៉ាជែងរថយន្តនោះដែរ រួចក៏ទាក់ដៃចង្កូតជាមួយម៉ូតូជនរងគ្រោះ បណ្ដាល្យដួលខ្ទាតជនរងគ្រោះចូលក្រោមកង់រថយន្តខាងលើកិនរងរបួសធ្ងន់តែម្ដង។ បន្ទាប់មកជនបង្ក ដែលជិះម៉ូតូទាក់ដៃចង្កូតជាមួយម៉ូតូជនរងគ្រោះបង្កឲ្យមានគ្រោះថ្នាក់នោះរងរបួសស្រាល រួចបានលើម៉ូតូ ជិះគេចខ្លួនបាត់ស្រមោល ។
បុរសដដែលនោះ បានបញ្ជាក់ប្រាប់ថា ដោយឡែករថយន្តបានឈប់នៅក្បែរកន្លែងកើតហេតុ រួចអ្នកបើកបរបានចុះរត់គេចខ្លួនបាត់ដែរ បន្ទាប់មករថយន្តមន្ទីរពេទ្យបង្អែកដង្កោ បានដឹកជនរងគ្រោះបញ្ជូនទៅសង្គ្រោះភ្លាមផងដែរ ។
ក្រោយពេលកើតហេតុ នគរបាលប៉ុស្តិ៍ចោមចៅទី១ សហការជាមួយនគរបាលចរាចរណ៍ខណ្ឌពោធិ៍សែនជ័យ ចុះវាស់វែង រួចនាំយកម៉ូតូ និងរថយន្តយកទៅរក្សាទុកនៅអធិការដ្ឋាននគរបាលខណ្ឌ រង់ចាំដោះស្រាយនៅពេលក្រោយ ៕
ចែករំលែកព័តមាននេះ