រាជធានីភ្នំពេញ ៖ កម្ពុជាប្រកាន់ខ្ជាប់នូវការដោះស្រាយបញ្ហាព្រំដែនជាមួយប្រទេសថៃ ដោយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងដែលមានស្រាប់ ។ នេះបើតាមអ្នកនាំពាក្យរាជរដ្ឋាភិបាលកម្ពុជា ។ ថ្លែងនៅក្នុងការធ្វើបច្ចុប្បន្នភាពស្តីពីការវិវត្តន៍នៃស្ថានការណ៍ព្រំដែនកម្ពុជា-ថៃ…
រាជធានីភ្នំពេញ ៖ កម្ពុជាប្រកាន់ខ្ជាប់នូវការដោះស្រាយបញ្ហាព្រំដែនជាមួយប្រទេសថៃ ដោយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងដែលមានស្រាប់ ។ នេះបើតាមអ្នកនាំពាក្យរាជរដ្ឋាភិបាលកម្ពុជា ។
ថ្លែងនៅក្នុងការធ្វើបច្ចុប្បន្នភាពស្តីពីការវិវត្តន៍នៃស្ថានការណ៍ព្រំដែនកម្ពុជា-ថៃ នៅទីស្តីការគណៈរដ្ឋមន្ត្រី ព្រឹកថ្ងៃទី២២ ខែមករា ឆ្នាំ២០២៦ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជាបានបញ្ជាក់ជាថ្មីថា លទ្ធផលកិច្ចព្រមព្រៀងឈប់បាញ់ថ្ងៃទី២៨ ខែកក្កដា ឆ្នាំ២០២៥ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពទីក្រុងគូឡាឡំពួរ ថ្ងៃទី២៦ ខែតុលា ឆ្នាំ២០២៥ និងសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) ថ្ងៃទី២៧ ខែធ្នូ ឆ្នាំ២០២៥ ដែលផ្តល់កំណើតដល់បទឈប់បាញ់ជាលើកទី២ សុទ្ធសឹងតែជាផ្លែផ្កានៃកិច្ចខិតខំប្រឹងប្រែងក្នុងស្មារតីស្រឡាញ់ និងការពារសន្តិភាពរបស់ថ្នាក់ដឹកនាំកម្ពុជា ក្រោមការជួយជ្រោមជ្រែងពីសហគមន៍អន្តរជាតិជាពិសេសសហរដ្ឋអាម៉េរិក សាធារណរដ្ឋប្រជាមានិតចិន និងម៉ាឡេស៊ី ក្នុងនាមប្រធានប្តូរវេនអាស៊ានឆ្នាំ២០២៥ ។
ឯកឧត្តមបានលើកឡើងដែរថា ក្នុងសារទៅកាន់ប្រជាពលរដ្ឋ កាលពីថ្ងៃទី២៩ ខែធ្នូ ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានសង្កត់ធ្ងន់ថា ការសម្រេចចិត្តទទួលយកបទឈប់បាញ់បានបង្ហាញថា កម្ពុជាសម្រេចយកមាគ៌ាសន្តិភាព និងការតម្កល់អាយុជីវិតមនុស្ស និងសុខទុក្ខរបស់ប្រជាពលរដ្ឋជាអាទិភាពចម្បងបំផុត និងខ្ពស់បំផុតរបស់ខ្លួនតាមរយៈការបញ្ឈប់កុំឱ្យមានអ្នកស្លាប់ អ្នករងរបួស និងការខូចខាតផ្សេងទៀត។
ពាក្យថា «កម្ពុជាត្រូវការសន្តិភាព» (Cambodia Needs Peace) បានលាន់ព្ញនៅគ្រប់ទិសទី និងបានទាក់ទាញចំណាប់អារម្មណ៍មេដឹកនាំពិភពលោក ឱ្យចោលក្រសែភ្នែកមកមើលប្រទេសដ៏តូចមួយនេះដែលកំពុងឈរការពារបុព្វហេតុសន្តិភាពយ៉ាងសកម្ម ។
ឯកឧត្តម ប៉ែន បូណា បានលើកឡើងថា ពាក្យថា «អរគុណសន្តិភាព» ត្រូវបានដាក់បង្ហាញនៅគ្រប់ទិសទីដើម្បីជាការដឹងគុណ ជាការចងចាំ និងការចូលរួមថែរក្សាការពារ ខណៈដែលស្មារតីស្រឡាញ់សន្តិភាពបានចាក់ឬសកាន់តែជ្រៅទៅក្នុងក្រអៅបេះដូងប្រជាពលរដ្ឋខ្មែរទាំងក្នុងនិងក្រៅប្រទេស ។ សន្តិភាពមិនត្រឹមតែត្រូវបានចាត់ទុកថា មានសារសំខាន់សម្រាប់ប្រទេសជាតិនិងប្រជាពលរដ្ឋខ្មែរប៉ុណ្ណោះទេ ក៏ប៉ុន្តែថ្នាក់ដឹកនាំកម្ពុជាបានចាត់ទុកសន្តិភាព គឺជាមូលដ្ឋានគ្រឹះមិនអាចខ្វះបានសម្រាប់ស្ថិរភាពក្នុងតំបន់ និងក្នុងពិភពលោកទាំងមូល ។
អ្នកនាំពាក្យរាជរដ្ឋាភិបាលបានថ្លែងដោយបញ្ជាក់បន្តែមថា ក្នុងន័យនេះហើយដែលថ្នាក់ដឹកនាំកម្ពុជា ជាពិសេស សម្តេចតេជោ ហ៊ុន សែន និងសម្តេចបវរធិបតី ហ៊ុន ម៉ាណែត តែងតែចែករំលែកអំពីទស្សនទានសន្តិភាព និងនយោបាយឈ្នះ-ឈ្នះ ដល់ពិភពលោកតាមរយៈវេទិកាអន្តរជាតិជាច្រើន ក្នុងរយៈពេលជិត៣ទសវត្សរ៍ចុងក្រោយនេះ ។
នេះគឺជាហេតុផលដែលធ្វើឱ្យសន្តិភាពក្លាយជាអត្តសញ្ញាណរបស់កម្ពុជា ក្នុងសម័យទំនើបនេះដោយមិនអាចប្រកែកបាន ។ កិច្ចខិតខំប្រឹងប្រែង និងការលះបង់របស់ថ្នាក់ដឹកនាំកម្ពុជាដើម្បីសន្តិភាព និងការពារអាយុជីវិតរបស់ប្រជាជនកម្ពុជា ត្រូវបានពិភពលោកទទួលស្គាល់យ៉ាងទូលំទូលាយ ៕
ចែករំលែកព័តមាននេះ