ប្រទេសស៊ីរី ៖ តាមទីបញ្ជាការដ្ឋានកណ្ដាលកងទ័ពអាមេរិកនៅមជ្ឈឹមបូព៌ាថា អ្នកទោសជាសមាជិកក្រុមរដ្ឋអ៊ិស្លាម១៥០នាក់ ត្រូវបានបញ្ជូនរួចហើយពីទីក្រុងស៊ីរីហាស់សាកេទៅកាន់អ៊ីរ៉ាក់ ។ ក្នុងសេចក្ដីប្រកាសមួយកងទ័ពអាមេរិកអះអាងថា ការផ្ទេរនោះសំដៅចៀសវាងការរត់គេចចេញ និងបង្ការរាល់គ្រោះថ្នាក់ខាងសន្តិសុខទាក់ទិននឹងអស្ថេរភាពកាន់តែខ្លាំងក្នុងតំបន់។ អាមេរិកគ្រោងផ្ទេរអ្នកទោសជាមនុស្សក្រុមរដ្ឋអ៊ិស្លាមដល់៧០០០នាក់ពីស៊ីរីទៅកាន់អ៊ីរ៉ាក់ ។
ការប្រកាសនោះ កាលពីថ្ងៃទី២១ មករា បណ្ដាលឲ្យប្រជាជនអ៊ីរ៉ាក់មានការភ្ញាក់ផ្អើល និងព្រួយបារម្ភ ។ អ្នកវិភាគមួយចំនួនលើកឡើងថា ការផ្ទេរពួកអ្នកទោសជាមនុស្សក្រុមរដ្ឋអ៊ិស្លាមនេះទៅកាន់អ៊ីរ៉ាក់ពិតជាប្រសើរជាជាងបណ្ដោយឲ្យពួកនោះ អាចមានឱកាសរត់គេចខ្លួនចូលព្រៃ ។
ការភ័យខ្លាចនោះ មានកាន់តែខ្លាំងពេលគេឃើញបណ្ដារូបភាពចេញផ្សាយនាប៉ុន្មានថ្ងៃចុងក្រោយនេះ បង្ហាញបណ្ដាពន្ធនាគារបើកចំហនៅភាគឦសានស៊ីរី ខណៈមានការដកថយរបស់កងកម្លាំងឃើតចេញ ប្រឈមមុខនឹងការវាយរុលទៅមុខរបស់កងទ័ពស៊ីរី ។ បណ្ដាអ្នកសង្កេតការណ៍បានបរិហារអវត្តមាន នៃសេចក្ដីជូនដំណឹងរបស់រដ្ឋាភិបាលអ៊ីរ៉ាក់ពីគ្រោះថ្នាក់ទាក់ទិន ការវិលត្រឡប់របស់ពួកយុទ្ធជនក្រុមរដ្ឋអ៊ិស្លាមនៅអ៊ីរ៉ាក់ខណៈពន្ធនាគារទាំងឡាយនៅអ៊ីរ៉ាក់មានអ្នកទោសពេញណែនស្រាប់រួចហើយ។
ការប្រកាសនោះ ធ្វើឡើងក្នុងបរិយាកាសតានតឹងរវាងអ៊ីរ៉ាក់ និងស៊ីរី ។ អាជ្ញាធរអ៊ីរ៉ាក់បានពង្រឹងកម្លាំងនៅតាមព្រំដែន រយៈពេលប៉ុន្មានសប្ដាហ៍ចុងក្រោយនេះ ដើម្បីបង្ការរាល់ការវាយប្រហារមកពីខាងលិច ។ ខាងកងទ័ពអាមេរិកវិញអះអាងថា ការផ្ទេរដែលមានការរៀបចំនិងការពារសន្តិសុខ នៃពួកអ្នកទោសទាំងនេះគឹចាំបាច់ ដើម្បីចៀសវាងការរត់គេចខ្លួន ដែលនឹងជាការគំរាមកំហែងមួយសម្រាប់សហរដ្ឋអាមេរិកនិងសន្តិសុខតំបន់។
ក្រុងវ៉ាស៊ីនតោនក៏យល់ឃើញដែរថា បេសកកម្មដំបូងរបស់កងកម្លាំងឃើតស៊ីរីគឹការប្រយុទ្ធប្រឆាំងក្រុមរដ្ឋអ៊ិស្លាម ដែលមួយផ្នែកធំសម្រេចបានហើយ ខណៈក្រុងដាម៉ាស់ចង់ដណ្ដើមត្រួតត្រាបណ្ដាមជ្ឈមណ្ឌលឃុំឃាំងដែលមកទល់ពេលនេះស្ថិតក្រោមការត្រួតត្រារបស់អាជ្ញាធរឃើត៕
ចែករំលែកព័តមាននេះ