ខេត្តស្ទឹងត្រែង ៖ កម្លាំងចម្រុះ នៃរដ្ឋបាលក្រុងស្ទឹងត្រែង សហការជាមួយមន្ទីរសុខាភិបាលខេត្ត បានចុះអនុវត្តវិធានការរដ្ឋបាល បិទផ្អាកសកម្មភាពផ្តល់សេវាសុខាភិបាល ជាបណ្តោះអាសន្ន នៅបន្ទប់ពិគ្រោះ និងព្យាបាលជំងឺ…
ខេត្តស្ទឹងត្រែង ៖ កម្លាំងចម្រុះ នៃរដ្ឋបាលក្រុងស្ទឹងត្រែង សហការជាមួយមន្ទីរសុខាភិបាលខេត្ត បានចុះអនុវត្តវិធានការរដ្ឋបាល បិទផ្អាកសកម្មភាពផ្តល់សេវាសុខាភិបាល ជាបណ្តោះអាសន្ន នៅបន្ទប់ពិគ្រោះ និងព្យាបាលជំងឺ “ឥសាន្ត” កាលពីព្រឹកថ្ងៃចន្ទ ទី១៩ ខែមករា ឆ្នាំ២០២៦ ។
យោងតាមការបញ្ជាក់ពីអាជ្ញាធរ មូលហេតុចម្បង នៃការចុះផ្អាកនេះ គឺដោយសារទីតាំងខាងលើ គ្មានលិខិតអនុញ្ញាត។ បន្ទប់ពិគ្រោះជំងឺនេះ មានទីតាំងស្ថិតនៅផ្ទះលេខ៣៧២ ផ្លូវលេខ២៨ ភូមិកណ្តាល សង្កាត់ស្ទឹងត្រែង ក្រុងស្ទឹងត្រែង ដែលគ្រប់គ្រងដោយលោក Nguyen Van Trong ។
លោក អ៊ុង សូវៀត ប្រធានមន្ទីរសុខាភិបាលខេត្តស្ទឹងត្រែង បានលើកឡើងថា អាជ្ញាប័ណ្ណហួសសុពលភាព ម្ចាស់ទីតាំងមានច្បាប់ អនុញ្ញាតតាំងពីឆ្នាំ២០២១ ប៉ុន្តែបានហួសសុពលភាពតាំងពីឆ្នាំ២០២៤ មកម្ល៉េះ ដោយមិនបានមកដាក់ពាក្យស្នើសុំបន្តសុពលភាពតាមនីតិវិធីច្បាប់ ។
កន្លងមកម្ចាស់ទីតាំង បានធ្វើកិច្ចសន្យាជាមួយមន្ទីរសុខាភិបាល រួចហើយថា នឹងផ្អាកសកម្មភាពរហូតដល់មានច្បាប់អនុញ្ញាតថ្មី ប៉ុន្តែជាក់ស្តែង ម្ចាស់ទីតាំងមិនបានគោរពតាមកិច្ចសន្យា ហើយនៅតែបន្តលួចលាក់បើកបម្រើសេវាដដែល ។
បច្ចុប្បន្ន អាជ្ញាធរបានតម្រូវឱ្យម្ចាស់ទីតាំងបញ្ឈប់រាល់សកម្មភាពព្យាបាលទាំងអស់ជាដាច់ខាត រហូតដល់មានការសុំច្បាប់អនុញ្ញាតពីក្រសួង ឬស្ថាប័នពាក់ព័ន្ធជាថ្មី។ វិធានការនេះ ធ្វើឡើងដើម្បីធានាបាន នូវសុវត្ថិភាពជូនប្រជាពលរដ្ឋ និងពង្រឹងការអនុវត្តច្បាប់ក្នុងវិស័យសុខាភិបាលឱ្យមានប្រសិទ្ធភាព ៕
ចែករំលែកព័តមាននេះ