ខេត្តតាកែវ ៖ ករណីប្រធានសុរិយោដី និងភូមិបាលស្រុកត្រាំកក់ ខេត្តតាកែវ និងប្រធានមន្ទីររៀបចំដែនដី នគរូបនីយកម្មខេត្តតាកែវ រួមទាំងមន្ត្រីសំខាន់ៗជាច្រើនក្នុងនោះមានទាំងលោក កៅ វគ្គសែល…
ខេត្តតាកែវ ៖ ករណីប្រធានសុរិយោដី និងភូមិបាលស្រុកត្រាំកក់ ខេត្តតាកែវ និងប្រធានមន្ទីររៀបចំដែនដី នគរូបនីយកម្មខេត្តតាកែវ រួមទាំងមន្ត្រីសំខាន់ៗជាច្រើនក្នុងនោះមានទាំងលោក កៅ វគ្គសែល អភិបាលស្រុកសំរោង បានកសាងឯកសារក្លែងដើម្បីធ្វើប្លង់ដីរំលោភយកដីស្ទឹងស្លាគូ មិនទាន់មានការបកស្រាយជាសាធារណៈពីក្រសួងពាក់ព័ន្ធផង ស្រាប់តែធ្លាយ ចៅហ្វាយស្រុកបាទី លោក ភួង ឈីម និងអតីតប្រធានសុរិយោដី និងភូមិបាលស្រុកបាទី លោក ទូច សារុន និងលោក ម៉ឹង វុធី អភិបាលរងខេត្តតាកែវ ត្រូវបានក្រសួងមហាផ្ទៃកំពុងអង្កេតស្រាវជ្រាវពាក់ព័ន្ធបណ្ដឹងឃុបឃិតគ្នាប្រើប្រាស់អំណាចគំរាមកំហែងប្រជាពលរដ្ឋ និងយកដីដែលមានម្ចាស់កម្មសិទ្ធិឱ្យទៅបុគ្គលផ្សេង ។
ដោយឡែក នៅស្រុកអង្គរបូរីឯណោះវិញក៏លេចឮមិនខុសពីស្រុកបាទីដែរ ដោយប្រភពប្រជាពលរដ្ឋនិយាយតៗគ្នាថា ចៅហ្វាយស្រុកបច្ចុប្បន្នគាត់ខំទៅរៀននៅសាលាភូមិន្ទរដ្ឋបាលបង្កើនចំណេះ ជំនាញយកមកបម្រើរាស្ត្រ បែរជាត្រូវដកចេញយកទៅសាលាខេត្ត តើរឿងនេះពិត ឬទេ ?
ក្នុងនោះបានលេចឮថា អ្នកត្រូវទ្បើងជាចៅហ្វាយស្រុកថ្មីអាចជាលោក រស់ រ័ត្ន ជាអភិបាលរងនៅអង្គរបូរីនេះស្រាប់ ដែលជាបុគ្គលមានប្រវត្តិមិនល្អតាំងពីនៅជាអភិបាលរងស្រុកបូរីជលសារ ហើយជាបុគ្គលតែងមានពាក្យសំដីអាក្រក់អសុរោះដាក់មន្ត្រីថ្នាក់ក្រោម និងប្រជាពលរដ្ឋ រឺអាចជាលោក សាយ វណ្ណ: មកពីស្រុកត្រាំកក់ ។
មហាជនវែកញែកទៀតថា តាមពិតលោក សាយ វណ្ណ: មានអតីតគ្រាន់តែជាមេប៉ុស្តិ៍របស់យោធាខេត្តតាកែវដែលឱ្យទៅឈរជើងនៅច្រកព្រំដែនឈ្មោះថា ច្រកកាំងទ្បា ក្នុងទឹកដីស្រុកបូរីជលសារ ហើយលោកមានជំនាញតែខាងពូកែខាងទារលុយពីប្រជាពលរដ្ឋប៉ុណ្ណឹងឯង ។
ប្រជាពលរដ្ឋមានការបារម្ភ ខ្លាចតែដកមន្ត្រីល្អចេញ ហើយយកមន្ត្រីគ្រាប់ល្ពៅមកដាក់ទេជំនួស ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ