បរទេស ៖ តម្លៃមាសអន្តរជាតិហក់ឡើងដល់កម្រិតខ្ពស់បំផុតមិនធ្លាប់មាន នៅថ្ងៃទី១៩ ខែមករា ឆ្នាំ២០២៦ ជំរុញដោយតម្រូវការខ្លាំងនៃលោហៈធាតុដ៏មានតម្លៃមួយនេះ បន្ទាប់ពីប្រធានាធិបតីអាមេរិក លោក ដូណាល់…
បរទេស ៖ តម្លៃមាសអន្តរជាតិហក់ឡើងដល់កម្រិតខ្ពស់បំផុតមិនធ្លាប់មាន នៅថ្ងៃទី១៩ ខែមករា ឆ្នាំ២០២៦ ជំរុញដោយតម្រូវការខ្លាំងនៃលោហៈធាតុដ៏មានតម្លៃមួយនេះ បន្ទាប់ពីប្រធានាធិបតីអាមេរិក លោក ដូណាល់ ត្រាំ (Donald Trump) បានគំរាមដាក់ពន្ធគយបន្ថែមលើបណ្តាប្រទេសអឺរ៉ុប ជុំវិញការប្រឆាំងរបស់ពួកគេទៅនឹងការចង់គ្រប់គ្រងកោះហ្គ្រីនឡែន (Greenland) ដោយសហរដ្ឋអាមេរិក។ នេះបើយោងតាមការចេញផ្សាយពីទីភ្នាក់ងារសារព័ត៌មាន Reuters។
តម្លៃមាសអន្តរជាតិបានកើនឡើងដល់កម្រិតខ្ពស់បំផុត ៤ ៦៨៩ ដុល្លារក្នុង១អោន ឬ ៥ ៦៤៩ ដុល្លារក្នុង១តម្លឹង មុនពេលរក្សាតម្លៃនៅត្រឹម ៤ ៦៦៨ ដុល្លារ/អោន ឬ ៥ ៦២៤ ដុល្លារ/តម្លឹង គិតត្រឹមម៉ោង៣រសៀលថ្ងៃទី១៩ ខែមករា ឆ្នាំ២០២៦ (ម៉ោងនៅកម្ពុជា)។
នៅថ្ងៃទី១៧ ខែមករា កន្លងទៅ លោក ត្រាំ បានសន្យាថានឹងអនុវត្តការដំឡើងពន្ធគយលើបណ្តាប្រទេសអឺរ៉ុប រហូតដល់អាមេរិកត្រូវបានអនុញ្ញាតឱ្យទិញកោះហ្គ្រីនឡែន ដែលនេះបង្កើនជម្លោះលើអនាគតកោះអាកទិកដ៏ធំរបស់ប្រទេសដាណឺម៉ាកមួយនេះ។ អ្នកការទូតសហភាពអឺរ៉ុបបានថ្លែងថា ឯកអគ្គរដ្ឋទូតសហភាពអឺរ៉ុបកំពុងរៀបចំវិធានការសងសឹក ប្រសិនបើពន្ធរបស់លោក ត្រាំ នៅតែបន្ត។
ភាពតានតឹងផ្នែកភូមិសាស្ត្រនយោបាយបានផ្តល់ហេតុផលមួយទៀត ដល់ការកើនឡើងតម្លៃមាសអន្តរជាតិ ដើម្បីរុញតម្លៃលោហៈដ៏មានតម្លៃមួយនេះឡើងដល់កម្រិតខ្ពស់បំផុតថ្មីមួយទៀត។ ជាមួយគ្នានោះផងដែរ កិច្ចសន្យាអនាគតសម្រាប់ភាគហ៊ុនអាមេរិក និងប្រាក់ដុល្លារអាមេរិកបានធ្លាក់ចុះ ខណៈដែលការគំរាមកំហែងពន្ធចុងក្រោយរបស់លោក ត្រាំ បានបង្កើនការផ្តោតរបស់វិនិយោគិនចំពោះមាស ដែលជាទ្រព្យសម្បត្តិដ៏មានសុវត្ថិភាព អំឡុងពេលភាពមិនប្រាកដប្រជាភូមិសាស្ត្រនយោបាយ៕
ចែករំលែកព័តមាននេះ