ទីក្រុងឡុង៖ នាយករដ្ឋមន្ត្រីអង់គ្លេស លោកខៀស្តាមើ (Keir Starmer) និយាយប្រាប់លោកត្រាំថាលោកសម្រេចចិត្តខុសហើយដែលដំឡើងពន្ធទៅលើប្រទេសខ្លះនៅអឺរ៉ុបដែលប្រឆាំងនឹងផែនការគ្រប់គ្រងកោះហ្គ្រីនលែន។ លោកស្តាមើថ្លែងដូច្នេះបន្ទាប់ពីជជែកគ្នាជាមួយថ្នាក់ដឹកនាំដាណឺម៉ាក សហភាពអឺរ៉ុប និងអង្គការណាតូ។
អ្នកនាំពាក្យអង់គ្លេសថ្លែងថាលោកស្តាមើបាននិយាយទូរស័ព្ទជាមួយនាយករដ្ឋមន្ត្រីដាណឺម៉ាក លោកស្រីហ្វ្រេដេរីកសឹន (Frederiksen), ប្រធានគណៈអឺរ៉ុប លោកស្រីឡីយឹន (Leyen) និងអគ្គលេខាធិការអង្គការណាតូ លោកម៉ាករូតថឺ (Mark Rutte)។ បន្ទាប់មក លោកស្តាមើនិយាយទូរស័ព្ទទៅកាន់លោកត្រាំ។ អ្នកនាំពាក្យអង់គ្លេសថ្លែងថាតំបន់ខាងជើងជាចំណុចអាទិភាពនៃរដ្ឋជាសមាជិកអង្គការណាតូទាំងអស់ដើម្បីការពារផលប្រយោជន៍អឺរ៉ុប និងអាមេរិក។
ក្រុមអ្នកតំណាងរាស្ត្រអង់គ្លេសខ្លះបានទូលថ្វាយព្រះមហាក្សត្រឆាលសូមព្រះអង្គលុបចោលគម្រោងទស្សនកិច្ចទៅអាមេរិកនាខែមេសាខាងមុខនេះបើសិនលោកត្រាំមិនព្រមលុបចោលការដំឡើងពន្ធទៅលើប្រទេសដែលប្រឆាំងជំទាស់នឹងផែនការគ្រប់គ្រងកោះហ្គ្រីនលែន។ លោកអិតដេវី (Ed Davey) ជាប្រធានគណបក្សអ្នកប្រជាធិបតេយ្យសេរី។ លោកបង្ហោះសារនៅលើបណ្ដាញអ៊ិចថាអង់គ្លេសមិនត្រូវធ្វើអន់ឱ្យគេជាន់ស្រេចតែនឹងចិត្តនោះទេ ហើយក៏មិនត្រូវធ្វើអ្វីផ្គាប់ចិត្តលោកត្រាំនោះដែរ។
លោកត្រាំបញ្ជាក់ច្បាស់ហើយតាំងពីពេលគាត់ឡើងកាន់អំណាចដំបូងៗថាគាត់ចាំបាច់ត្រូវតែគ្រប់គ្រងកោះហ្គ្រីនលែនដែលជាកោះធំជាងគេនៅលើពិភពលោក និងជាដែនដីពាក់កណ្ដាលស្វយត្យរបស់ដាណឺម៉ាក។ លោកចាត់ទុកថាកោះនេះមានសារសំខាន់ផ្នែកសន្តិសុខសម្រាប់អាមេរិក។ កាលពីថ្ងៃសៅរ៍ លោកប្រកាសដំឡើងពន្ធគយលើប្រទេសចំនួន៨នៅអឺរ៉ុប។
ក្នុងនោះមានដាណឺម៉ាក ន័រវេ ស៊ុយអែត បារាំង អាល្លឺម៉ង់ អង់គ្លេស ហូឡង់ និងហ្វាំងឡង់ដែលសុទ្ធសឹងជាប្រទេសប្រឆាំងជំទាស់នឹងផែនការគ្រប់គ្រងកោះហ្គ្រីនលែន។ លោកនឹងដំឡើងពន្ធគយលើប្រទេសទាំងនេះ១០%ចាប់ពីថ្ងៃទី១ ខែកុម្ភៈតបើសិនពួកគេនៅតែប្រឆាំងបែបនេះទៀត។ មិនតែប៉ុណ្ណោះចាប់ពីថ្ងៃទី១ ខែមិថុនាតទៅ លោកនឹងដំឡើងពន្ធគយ២៥%បើសិនគ្មានកិច្ចព្រមព្រៀងទិញ-លក់កោះហ្គ្រីនលែនទេ។
ឥឡូវនេះ ប្រទេសនានានៅលើពិភពលោកបានប្រមូលផ្ដុំគ្នានៅខាងកោះហ្គ្រីនលែន និងប្រទេសដាណឺម៉ាក។ ពួកគេយល់ថាត្រូវតែការពារអធិបតេយ្យភាពរបស់កោះនេះ ហើយត្រូវគោរពសិទ្ធិស្វ័យសម្រេចរបស់ប្រជាជនកោះនេះ។ ប្រជាជននៅទីនោះប្រាថ្នាចង់រស់នៅក្នុងជីវភាពដូចសព្វថ្ងៃ។ មានន័យថាពួកគេមិនចង់ក្លាយជាទឹកដីរបស់អាមេរិកទេ៕ ប្រភព៖ ញូស្វីក (Newsweek), រ៉យទ័រ (Reuters) និងប្រភពដទៃទៀត
ចែករំលែកព័តមាននេះ