ខេត្តព្រៃវែង : ផ្លូវមួយខ្សែប្រវែងជាង 1,000 ម៉ែត្រដែលជាខ្សែបន្ទាត់ខណ្ឌចែកឃុំព្រែកខ្សាយ ( ខ ) និងឃុំអ្នកលឿង ត្រូវបានអាជ្ញាធរស្រុកពាមរក៍…
ខេត្តព្រៃវែង : ផ្លូវមួយខ្សែប្រវែងជាង 1,000 ម៉ែត្រដែលជាខ្សែបន្ទាត់ខណ្ឌចែកឃុំព្រែកខ្សាយ ( ខ ) និងឃុំអ្នកលឿង ត្រូវបានអាជ្ញាធរស្រុកពាមរក៍ សាងសង់ធ្វើជាផ្លូវបេតុងបានប្រវែងជាង 600 ម៉ែត្រហើយ កាលពី២ឆ្នាំមុន។
ប៉ុន្តែនៅសល់ប្រមាណជាង 500 ម៉ែត្រទៀតរហូតមកដល់ពេលនេះ គេនៅមិនទាន់បានសាងសង់នៅឡើយទេ គឺវានៅជាផ្លូវដីនៅឡើយនៅខែវស្សា ផ្លូវនេះពោរពេញទៅដោយភក់ល្បាប់ មិនអាចធ្វើដំណើរឆ្លងកាត់បានទេ ហើយនៅរដូវប្រាំងវិញ តួផ្លូវប្រេះបែកក្រហែង ជង្ហុករដឹបរដុបពិបាកធ្វើដំណើរខ្លាំងណាស់។ ដូច្នេះហើយទើបប្រជាពលរដ្ឋទាំងពីរឃុំ បានស្នើសុំឲ្យអាជ្ញាធរ ជួយបន្តសាងសង់ផ្លូវនេះបង្ហើយ ដើម្បីឱ្យពួកគាត់មានភាពងាយស្រួល ពេលធ្វើដំណើរទៅស្រែចម្ការ ពិសេសទៅធ្វើបុណ្យទាន នៅវត្តទួលសមាធិ ដែលនៅចុងភូមិតែម្ដង។
ឆ្លើយតបការស្នើសុំនេះលោក ជុំ ជា មេឃុំព្រែកខ្សាយ ( ខ ) និងលោក ភោគ ថានី មេឃុំអ្នកលឿង បានឆ្លើយដូចគ្នាថា ផ្លូវនេះជាបន្ទាត់ខណ្ឌ័ចែកដែនរដ្ឋបាល រវាងឃុំព្រែកខ្សាយ ( ខ ) និងឃុំអ្នកលឿង ហើយវាស្ថិតនៅក្រោមការ ទទួលខុសត្រូវរបស់អាជ្ញាធរស្រុក ដូច្នេះសូមឲ្យសួរទៅខាងស្រុកទើបដឹង។
ចំណែកលោក កែវ ពិសី អភិបាលស្រុកពាមរក៍បានឲ្យដឹងថា កំណាត់ផ្លូវនេះគឺស្ថិតនៅក្រោមការទទួលខុសត្រូវ របស់រដ្ឋបាលស្រុកពិតមែន ហើយរូបលោកបានជជែកជាមួយនឹងអាជ្ញាធរឃុំនិងបានរៀបចំផែនការរួចរាល់ហើយ គឺគ្រោងនឹងសាងសង់បង្ហើយផ្លូវនេះ នៅឆ្នាំ 2027 ដូច្នេះសូមបងប្អូនប្រជាពលរដ្ឋយោគយល់ និងអត់ទ្រាំមួយឆ្នាំទៀត ឆ្នាំក្រោយនឹងបានផ្លូវបេតុងធ្វើដំណើរបានស្រួលហើយ ៕
ចែករំលែកព័តមាននេះ