រាជធានីភ្នំពេញ ៖ យុវតី២នាក់ បានជិះម៉ូតូ១គ្រឿង ជែងរថយន្តដឹកដែក ១គ្រឿង ដែលកំពុងបើកបរធ្វើដំណើរក្នុងទិសដៅស្របគ្នា ហើយខណៈពេលវ៉ាផុតបន្តិច ក៏ស្រាប់តែដួលម៉ូតូនៅពីមុខរថយន្តនោះ។ ខណៈនោះក៏ត្រូវរថយន្តកិនទាំងម៉ូតូ…
រាជធានីភ្នំពេញ ៖ យុវតី២នាក់ បានជិះម៉ូតូ១គ្រឿង ជែងរថយន្តដឹកដែក ១គ្រឿង ដែលកំពុងបើកបរធ្វើដំណើរក្នុងទិសដៅស្របគ្នា ហើយខណៈពេលវ៉ាផុតបន្តិច ក៏ស្រាប់តែដួលម៉ូតូនៅពីមុខរថយន្តនោះ។ ខណៈនោះក៏ត្រូវរថយន្តកិនទាំងម៉ូតូ និងមនុស្សអូសជាច្រើនម៉ែត្រ បណ្ដាលឲ្យម៉ូតូដាច់កង់មុខ រីឯពួកនាងរងរបួសធ្ងន់ និងស្រាលតែម្ដង នេះបើយោងតាមរូបភាពកាមេរ៉ាសុវត្ថិភាព ។
ឧប្បត្តិហេតុគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង២រសៀល ថ្ងៃទី១៧ ខែមករា ឆ្នាំ២០២៦ ស្ថិតនៅលើផ្លូវលេខ២១៧ ហៅផ្លូវចំការដូង សង្កាត់ជើងឯក ខណ្ឌដង្កោ រាជធានីភ្នំពេញ ។
យុវតីទាំង២នាក់ខាងលើនោះ មិនទាន់ត្រូវបានស្គាល់អត្តសញ្ញាណនៅឡើយទេ ពួកនាងទាំងពីរនាក់បានជិះម៉ូតូ ១គ្រឿង ម៉ាក Honda Beat ពណ៌ស ពាក់ស្លាកលេខ ភ្នំពេញ1KG-6820 ។ ដោយឡែករថយន្តដឹកដែក ១គ្រឿង ខាងលើនោះ ម៉ាកហ៊ីណូ ពណ៌លឿងពាក់ស្លាកលេខភ្នំពេញ 3D-2703 បើកបរដោយបុរសមិនស្គាល់ឈ្មោះម្នាក់ ។
យោងតាមរូបភាព ដែលថតជាប់កាមេរ៉ាសុវត្ថិភាពនៅកន្លែងកើតហេតុនោះ គេឃើញយុវតីទាំង២នាក់ខាងលើ ជិះម៉ូតូឌុបគ្នា ធ្វើដំណើរក្នុងទិសដៅពីត្បូងទៅជើង ស្របគ្នាជាមួយរថយន្តនោះដែរ។ លុះពេលទៅដល់ត្រង់ចំណុចកើតហេតុ ពួកនាងបានវ៉ាជែងខាងឆ្វេងរថយន្ត ហើយពេលជែងផុតបន្តិច ក៏ស្រាប់តែដួលនៅពីមុខរថយន្តដោយខ្លួនឯង ក៏ត្រូវបានរថយន្តនោះកិនអូសទាំងមនុស្ស និងម៉ូតូជាច្រើនម៉ែត្រ ទើបឈប់ស្ងៀម ។
តាមប្រភពពីកន្លែងកើតហេតុបានឲ្យដឹងថា ខណៈនោះបានបណ្ដាលឲ្យម៉ូតូដាច់កង់មុខ ដូចគេកាត់ផ្ដាច់ រងការខូចខាតទាំងស្រុង ចំណែកឯពួកនាងម្នាក់បានរងរបួសធ្ងន់ធ្ងរ និងម្នាក់ទៀតរងរបួសស្រាល ។
ក្រោយពេលកើតហេតុ ត្រូវបានរថយន្តពេទ្យដឹកបញ្ជូនទៅកាន់មន្ទីរពេទ្យ ដើម្បីសង្គ្រោះ និងព្យាបាលភ្លាមៗ បន្ទាប់មកកម្លាំងប៉ុស្តិ៍រដ្ឋបាលនគរបាលជើងឯក និងកម្លាំងនគរបាលចរាចរណ៍ខណ្ឌដង្កោ ចុះទៅធ្វើការវាស់វែង និងពិនិត្យមើលកាមេរ៉ា នៅទីតាំងកើតហេតុ ព្រមទាំងនាំខ្លួនអ្នកបើកបររថយន្តដឹកដែកខាងលើយកទៅធ្វើការសាកសួ និងដោះស្រាយគ្នាតាមផ្លូវច្បាប់ ៕
ចែករំលែកព័តមាននេះ